الاسكافى والدنيا - قصة قصيرة

المشرفون: Ghadat2009،نبضة...

أضف رد جديد
ماهر طلبه
أكاديمى فعال
أكاديمى فعال
مشاركات: 44
اشترك في: 28 يونيو 2009, 1:45 am
Favorite Quote: اكتب حتى لا تنتحر

الاسكافى والدنيا - قصة قصيرة

مشاركة بواسطة ماهر طلبه »

الاسكافى والدنيا
من زمان .... زمان قوى .. بيعيش اسكافى طيب عنده محل صغير جدا قد رجل الطفل اللى لسه ما دس ع الدنيا .. كل يوم الصبح يروح الدكان يكنس.. يرش الميه قدام الباب ويبدأ يدق فى الجزم .. فى يوم .. هى دخلت عليه .. ست الحسن يمكن ، ليلى يمكن ، عبله يمكن ، ويمكن تكون قطر الندى ... حس إن الدنيا داخله معاها عليه.. فتح دراعاته وحضن الدنيا .
- آتفضلى ...
قعدت .. مدت الرجل.. مرمر يمكن ، لؤلؤ يمكن ، مرجان يمكن ، ويمكن تكون مجرد لحم .
- أمرك
- جزمه
- أى نوع ؟ ..أى شكل ؟ .. أى لون ؟
شاورت ...مد إيده ... رفع الجزمه ....لبستها .. ماس يمكن ، بلور يمكن ، قزاز يمكن .. لكن أكيد مش جلد ...اتمشت ....
- مناسبه ؟
- مناسبة
- عايزه جزمه نفس الشكل ، نفس النوع ، لكن مش نفس اللون ....
- بكره تكون جاهزه .
خرجت ....خرجت الدنيا معاها .. حس إن صدره فاضى شرب بق الميه وسأل نفسه ... "ياترى دى مين ؟"
طول الليل سهران .. دق أول مسمار فى النعل .. شد أول خيط .. عمل أول عقدة ربطت بين النعل وبين الجلد وسرح ..." نفسى.." .. ونسى نفسه فى إيه .. لكن لما عدى أول واحد ورمى عليه السلام .. كان لسه طرف الخيط مشدود فى أول عقده .. سابه ووقف ع الباب مستنى ...ع الظهر هلت عليه .. ضوء يمكن ، نور يمكن ، نار يمكن ، ويمكن تكون برق ..
سألته ...
- خلاص
مد إيده سلم .. رجع صوتها فى حلقه .. صدم صورتها بعينه وساب الإيد ...
- معلش بكره بإذن الله
خرجت .. لقى الكرسى وراه وإلا كان مات واقف .. طول اليوم إبرته فى ايده لكن لاشاف وش ولا لمس نعل ، لادق مسمار ولا ربط خيط ..
بالليل خدته أحلام اليقظه لشوارع المدينه وحواريها .. لف كثير .. دخل بيوت كثيره لحد ما عثر عليها ... وهم يمكن ، سراب يمكن ، حلم يمكن ، ويمكن كمان حقيقه لأنه لما أول واحد رمى فى وشه السلام لقى الحال غير الحال و الهدوم غير الهدوم .. بص لنفسه فى مرايته ومد إيده حاول يخلص جزمتها لكن ما قدرش ... جسمه يمكن ، عقله يمكن ، قلبه يمكن ، ويمكن كمان روحه ...
ع الظهر .. مد إيده وسلم وطوّل السلام ...
- شاى
- شكرا
- استريحى
- شكرا
- خلاص
- معلش احنا عايزين نعمل حاجة تستاهل الرجل دى .. بكره وعليكى خير ...
خرجت ... قلبه اللى شافه لسه راجع ... خرج تانى ما حاولش يجرى وراه ولا يعرف طريقه لأنه متأكد إنه هيرجع لإنه ماسكه من رجله ...
كام سنه .. ميه ... ألف ... مليون ... عدت ماحسبتش ولا هو حسب ولا هى حسبت .. لكن فى يوم بعد حلم الليل وسلام النهار هو شد الكرسى ولضم الابرة وربط الفتله وشد الجلد ع النعل وخزأ الجلد بابرته وعمل أول غرزة إللى جرت الثانيه و الثالثه و الرابعه .. ع الظهر قطع الخيط .. كان الجلد وكان النعل اصبحوا جزمه ... عدت
- خلاص ؟
- خلاص
- سلام عليكم
- هنشفكوا ؟
- لما ربنا يريد
ومشيت .. ليل يمكن ، حريق يمكن ، خراب يمكن ، ويمكن كمان يكون موت
لما جه الليل .. إللى عمره ما جاب له معاه نوم... خدته أحلامه لشوارع المدينه وحواريها .. لف كثير .. شوارع وحوارى .. دكاكين وبيوت .. أسواق ..زحام .. كثير .. كثير ... لكن ملقهاش أبدا فى أى مكان م أللى كل يوم بالليل كان فى حلمه بيقابلها فيه ... بكى يمكن ، صرخ يمكن ، شد الشعر يمكن ، ويمكن كمان قطع الهدوم ونام بردان ...سنه ولا ميه ولا ألف ولا مليون ... برضه محسبناش لكن عمرها ما عدت وعمره مانسى ....فتح محله يمكن ، اشتغل يمكن ، خرج جزم من تحت إيده يمكن ، ويمكن كمان دخل الليل من غير ما يلف شوارع المدينه وحواريها .. لكن أكيد منسهاش .. ولسه جواه بحر ندم يمكن ، حزن يمكن ، الم يمكن ويمكن كمان غضب .. بيخرجه من عينه دموع كل ما سن ابرته يلمس جلد جزمه ..
عارفين ... غريب قوى الدنيا دى بقى لما الواحد يعمل اللى عليه تسيبه وتمشى وترفض حتى أنها تديله قلبه إللى أكيد ميساويش عندها فردة جزمه ...
http://mahertolba.maktoobblog.com" onclick="window.open(this.href);return false;
صورة العضو الرمزية
سندريلا
مشرفة قسم الخواطر
مشاركات: 795
اشترك في: 28 إبريل 2009, 8:51 pm
Real Name: جيهان راضي
Favorite Quote: المرأة عاشت ألوف السنين مثل مرآة تعكس صورة للرجل أكبر و أجمل من الحقيقة !
verification: ID verified and trusted writer
مكان: my own world
اتصال:

Re: الاسكافى والدنيا - قصة قصيرة

مشاركة بواسطة سندريلا »

جميلة جدا يا استاذ ماهر ... اسلوبك حلو اوي لانه مسلي و شيق مش بيسبب ملل للقاريء ...

و كمان سلس و بسيط .. و طبعا كالعادة حضرتك عملت اسقاط حلو اوي عن الدنيا ...

لكن الفكرة انا شفتها غريبة شوية لكن حلوة great1

يعني لو فكرنا حنلاقي فعلا ان حضرتك عندك حق لما كان مش بيعمل اللي عليه كانت دايما تيجي و لما عمل اللي عليه سابته ..

فعلا الدنيا كدة لكن عامة انا في نظري ان اهم حاجة هي ان الانسان يعمل اللي عليه مهما كانت النتيجة ...

بشكرك على القصة الحلوة دي ... و ارجو ان ارى اعملا اخرى مليئة بالابداع لك هنا في الاكاديمية .. :)
ماهر طلبه
أكاديمى فعال
أكاديمى فعال
مشاركات: 44
اشترك في: 28 يونيو 2009, 1:45 am
Favorite Quote: اكتب حتى لا تنتحر

Re: الاسكافى والدنيا - قصة قصيرة

مشاركة بواسطة ماهر طلبه »

hopeless dream كتب:جميلة جدا يا استاذ ماهر ... اسلوبك حلو اوي لانه مسلي و شيق مش بيسبب ملل للقاريء ...

و كمان سلس و بسيط .. و طبعا كالعادة حضرتك عملت اسقاط حلو اوي عن الدنيا ...

لكن الفكرة انا شفتها غريبة شوية لكن حلوة great1

يعني لو فكرنا حنلاقي فعلا ان حضرتك عندك حق لما كان مش بيعمل اللي عليه كانت دايما تيجي و لما عمل اللي عليه سابته ..

فعلا الدنيا كدة لكن عامة انا في نظري ان اهم حاجة هي ان الانسان يعمل اللي عليه مهما كانت النتيجة ...

بشكرك علىالص القصة الحلوة دي ... و ارجو ان ارى اعملا اخرى مليئة بالابداع لك هنا في الاكاديمية .. :)
الصديقة العزيزة جيهان
اشكرك جدا على كلامك الرقيق واتمنى ان يظل هذا رايك الدائم فى اعمالى القادمة واتفق تماما معاكى فى ان اهم حاجة هى ان الانسان يعمل اللى عليه مهما كانت النتيجة لان وبالتأكيد هتيجى لحظة نقدر نضحك فيها على الدنيا وناخد اللى احنا عايزينه منها
اشكرك واتمنى نقرى باستمرار تعليقك على اعمالنا
http://mahertolba.maktoobblog.com" onclick="window.open(this.href);return false;
أضف رد جديد

العودة إلى ”قصص عامية“