موضوع جميل بجد..يعنى مع أن أسمائنا بتبقى أول بداية لينا فى الدنيا بس نادر لما بنتكلم عن علاقتنا بيها..بجد فكرة هايلة كالعادة
1- يقولو الجواب بيبان من عنوانه " تفتكر ده صحيح دايما ؟
لأ ما أعتقدش إن ده دايما صحيح..وخصوصا فى المجالات الأدبية...ساعات اسم عمل يبقى مش حلو ومع ذلك العمل رائع و أعمال تانية عناوينها براقة جدا و داخل العمل لا شئ...وفى الدنيا نفس الفكرة...
2- بتحب إسمك؟ ليه ؟ هو معناه إيه ؟
وليد...بحبه طبعا..معناه واضح أكيد وده اللى محببنى فيه لأن الغريبة إن فيه من شخصيتى وحياتى كتير أوى..يعنى أنا ساعات كتير بحس إن قلبى لسه قلب طفل وليد..مع إن عقلى وشخصيتى من كتر التجارب بحس عمرى بيها 60 ولا 90 سنة كده..يمكن عشان كده بحب إسمى عشان يفكرنى دايما بلحظة ما تولدت...
3 - لو كنت هتسمّي نفسك ...تختار أي اسم ؟
ساعات كتير بحس إنها رحمة إن أهلنا بيختارولنا اسمنا..لأنى كنت شخصيا هأحتار أوى فى إختيار اسم وأفكر كتير أوى عشان ألاقى أحسن اسم..كنت هأختار كمان اسم وليد..بس عموما لو فكرت فى اسم تانى ممكن يبقى أمير
4 - لو ربنا رزقك بولدين و بنتين ... تفتكر ممكن تسمّيهم إيه ؟ و ليه ؟
سؤال جميل أوى..هو طبعا إن شاء الله هيبقى موضوع إختيار مع شريكة حياتى.. بس لو هأختار للولدين يبقى أدهم..و أمير..طبعا أدهم عشان اسم عربى جميل أوى بحبه وبيدل على الأصالة و القوة...وأمير..طبعا عشان حبى شخصيا فى الإسم وكمان عشان أمير أخويا
بالنسبة للبنتين..نور..و نغم...نور من النور...ونغم..مش عارف...بس حابب الإسم..وبعدين متهيألى هيبقى وقعه جميل أوى..يعنى نغم وليد
5 - لمّا تتعرّف لأول مرة على إنسان ... إسمه بيكون من العوامل اللي بيها بتحكم عليه ؟
لأ طبعا..هو الشخصية أكيد هى العامل الوحيد... بغض النظر عن الإسم أو الشكل أو أى شئ أخر..بس بعد كده الإسم أكيد بيبقى ليه وقع وبيتشكل على شخصية الشخص ده فى عقلك وعلى مدى علاقتك بيه...وده هيبقى جزء من إجابة السؤال اللى بعد الجاى...
6 - تفتكر الإنسان اسمه بيأثر عليه ؟
طبعا..لو اسم مش عادى و مصدر سخرية وتهكم على صاحبه بيأثر بالسلب على نفسيته حتى من طفولته..وبالتالى ساعات بيأدى لعدم الثقة بالنفس..وبيبقى من الأفضل تغييره زى ماناس كتير بتعمل لما بتكبر..طبعا أنا مش بتكلم عن اسم عادى أنا بكلم عن أسماء غريبة جدا عشان ماحدش يفهم فكرتى غلط أو إن يبقى تغيير الأسماء من قبيل الموضة هو كمان!
7 - لو عرفت إنسان تصرفاته سيئة أو غير مسؤولة أو ضايقك بأي شكل ... هل هتكره اسمه؟
يعني لو قابلت شخص تاني و كان بيحمل اسم الشخص اللي انت متضايق منه هل تنفر منه عشان اسمه بيفكرك بإنسان مش بتحبّه ؟
هو ده الجزء اللى علقت عليه فى سؤالى اللى فات..الإسم على حسب احساسنا ليه بيبقى ليه وقع علينا..عشان بنحب حد اسمه كده..بيبقى فيه شعور طبيعى و تلقائى بالراحة للإسم..زى ما بيحصل إن حد يقول لحد ( ده أنت اسمك على اسم حد بحبه أوى ) وهكذا..يعنى مع إن دى حاجة مش ليها أساس أو تأثير على الشخصية بس هو شعور طبيعى ومنطقى فى رأيى..
8- تحب أصدقاءك ينادوك بإسمك و لا بلقب محبب ليك ... أو اسم مختصر مثلا ؟
بحب أوى اللى يكلمنى بإسمى...يعنى بحسه أقرب أوى للنفس إن حد يكلمك بإسمك..بعكس الألقاب ( أسماء الدلع ) اللى بحسها مصطنعة أوى..إنما لو على الألقاب فمتهيألى أمير عادى مش بضايق منه وعشان كده بأختاره كإسم ليا دايما...أما أكتر أسماء بتضايقنى: يا باشا..يا زعيم..يا برنس...وكل الألفاظ دى الخاصة بفن التثبيت أو النفاق ساعات..
9 - لمّا تختار تقرا كتاب ... بيجذبك أول حاجة اسمه ...و لا الغلاف و لاّ المحتوى و لاّ الحجم ...و لاّ النوع (رواية أو موسوعة ...الخ)
مش عارف لأنى نادر لما بأختار كتاب مش رايح عليه مخصوص..وبقالى مدة كبيرة مش دخلت مكتبة قريت أو نزلت اشتريت كتب..بس عموما اللى هيجذبنى أكتر هو نوع العمل مش العنوان..هأميل لرواية أو مجموعة قصصية أكتر.
كالعادة سرحت وطولت عشان أسألتك دايما ياغادة عميقة وفلسفية بطريقة جميلة جدا ومشجعة على الرد...متهيألى إن يضاف مجال أدبى جديد خاص بيكى اسمه " فن كتابة الأسألة "
و بإنتظار اختباراتك الجميلة دايما
)
