أكاديمية ايجيبت رايت الأدبية
http://egyptwrite.com/w/

تيجى نحلم لسنة الجديدة
http://egyptwrite.com/w/viewtopic.php?f=17&t=130
صفحة 1 من 2

الكاتب:  تنهيدة [ 24 نوفمبر 2008, 1:15 am ]
عنوان المشاركة:  تيجى نحلم لسنة الجديدة

أنا طبعا أول مرة بكتب فى قسم أحلام مجنونة بس دة مايمنعش انى بموت فى الأفكار المجنونة ........
بما اننا على مشارف سنة جديدة فأنا فكرت نشارك بعض أحلامنا ونحكى لبعض عن كل الا نفسنا يتحقق وبما اننا فى قسم أحلام مجنونة فأنا حخلى كل واحدمعاه تلات أحلام يحلمهم معانا (زى تلات وردات وليد كدة) وأنا متأكدة ان السنه دى مش حتفوت الا واحلامنا الا حلمناها مع بعض حتحقق بس كلنا نحلم ويكون عندنا أمل فى تحقيق الحلم يلا نحلم مستنه أسمع أحلامكم وانا كمان حروح أحلم

الكاتب:  المهاجر [ 24 نوفمبر 2008, 10:35 am ]
عنوان المشاركة:  Re: تيجى نحلم لسنة الجديدة

جميل يا تنهيدة بس تفتكرى الاحلام هتتحقق بالكلام ما علينا
بالنسبة ليا اول حلم عايز احققه انى انجح فى كلية تجارة بقى واخلص مش عارف واقفة فى زورى ليه
ثانى حلم ان اشوف رئيسنا يقف ويقول تعيين جميع الخريجين فورا
ثالث حلم ودا الاهم اشوف الامة العربية واقفة على قلب رجل واحد

الكاتب:  همسه [ 24 نوفمبر 2008, 11:08 am ]
عنوان المشاركة:  Re: تيجى نحلم لسنة الجديدة

مبادره جميله منك ياتنهيده موضوع حلو قوىانا عن نفسى احلامى اللى اتمناها مع بداية السنه الجديده هى:
الحلم الاول:انى انجح بتقدير عالى فى الكليه وابقى معيده فيها.
الحلم التانى:انى اشوف بلدنا مصر فى افضل حال واغمض عينى وافتحها الاقى مصر اتحولت من دوله ناميه الى دوله متقدمه والفساد اللى فيها انتهى.
الحلم الثالث: ان السنه الجديده تكون خير علينا كلنا ومنشوفش فيها حاجه وحشه.
ويارب احلامى تتحقق هى احلام بسيطه بس صعبه تتحقق

الكاتب:  قلب حزين [ 24 نوفمبر 2008, 8:13 pm ]
عنوان المشاركة:  Re: تيجى نحلم لسنة الجديدة

موضوع جامد جدا ياتنهيدة
وانا احلامى كتير اوى بس هاقول اهم 3 واللى مش شخصيين اوى لان فيه احلام شخصية اوى مش ينفع اقولها
اول حلم ان بابايا يخف من مرضه ويرجع زى الاول لينا يضحك فى وسطنا زى الاول يارب......

تانى حلم ليكى انتى ووليد بعد ماقريت روايتكو بتمنى والله فى السنة الجديدة بعد ماتكونو خلصتو الرواية ان حد من السينما او كده يشوفها لانها والله انتو مش واخدين بالكو قد ايه الرواية اللى انتو بتعملوها دى مهمة لانها مشاركة مننا كمصريين مع شعب شقيق محتل وانتو كاتبنها انتو الاتنين حلو جدا يعنى زى ماتكون سيناريو وحوار فباحلم بجد ليكو انتو الاتنين ان الرواية دى توصل لمخرج او حد يتبناها كقصة فيلم وينكتب اسمه عليكو وبحييكو على التيم الهايل ده واكتبو حاجات اكتر ان شاء الله مع بعض لانى حبيت اوى روايتكو

تالت حلم ان بلدنا تبقى اكبر بلد فى الدنيا ونبقى مش بس بنحبها عشان تاريخها لأ نحبها كمان عشان حاضرها نبقى من الدول الكبرى بمجهودنا واحلامنا
شكرا ياتنهيدة على موضوعك الجميل وكويس انكو ابتديتو تكتبو فى الفروع اللى تحت لانها كانت فاضية مع جمالها وعلى فكرة انتى لسه ماكتبتيش احلامك

الكاتب:  تنهيدة [ 25 نوفمبر 2008, 4:28 am ]
عنوان المشاركة:  Re: تيجى نحلم لسنة الجديدة

ياسلام على جمال أحلام الشباب كلها أمل وتفاؤل
بالنسبة لأحلام صقر الأكاديمية أحمد ففيها السهل تحقيقة ومنها الا ممكن يتحقق ومنها الا موعدكش بالنسة لنجاحك فى الكلية فده طبعا حيتحقق بس انت اتعب نفسك شوية وهو أكيد حيحصل اما حكاية تشغيل الشباب فده طبعا صعب ان كل الشباب تتعين فى وظائف فى الدولة لكن ممكن كل الشباب تشتغل وتبتكر مشاريع صغيرة تطور بيها نفسها وكمان بلدها زى الصين كدة مثلا كل صناعته الكبرى قامت على صناعات صغيرة اما موضوع الأمة فدا حلم بنشترك فيه كلنا وبنتمنى تحقيقة أحلامك جميلة يأحمد يارب تتحقق
اما فراشة الأكاديمية آيه فأنتى انشاء الله حتنجحى وانشاء الله حتكونى معيدة لكن لو دة محصلش وبقيتى معيدة فامتزعليش أكيد حتلاقى فرصة أحلى بكتير من حكاية التدريس فى الجامعة
وحلمك لمصر دة مش حيحصل غير بايدك وايدى وايد كل شباب مصر الا عايزين يطورة البلد عشان تكون متقدمة وأخر حلم ليكى فكان لكل الناس وانا كمان ياآيه بتمنى تكون سنه سعيدة عليكى وعلى مصر كلها يارب كل أحلامك ياآيه تتحقق
نيجى بقة لبسمة الأكاديمية مريم وأحلامها الجميلة الا بنتمنالها تحققها اول حلم كان لوالدك الا انشاء الله ربنا حيشفيه وحيرجعلكم بألف سلامه بس انتى ادعى بأستمرار واكيد ربنا حيستجيب لدعاكى واحنا كمان حندعى معاكى الف سلامه ليه يامريم
اماحلمك التانى فده أسعدنى جدا واكيد حيسعد وليد كمان وبشكرك يامريم على حلمك الجميل ده الاحسسنى انتى اد ايه بتتمنى الخير لكل الا حواليكى
وكان حلمك الأخير لمصر الا كلنا بنتمنالها التقدم ويكون التقدم ده بأيدينا زى ماقولتى طبعا أحلامك كلها جميلة ويارب تتحقق
تعرفوا أحلى حاجة عجبانى فى أحلامكو أيه اننا كلنا بنشترك فى حلم واحد وهو اننا نشوف مصر عظيمة
بالنسبة لأحلامى فأنا حستنى لما أسمع أحلام باقى الأعضاء وعايزه كمان أعرف أحلام وليد وكمان اخوه أميرعايزين نشارك بعض فى أحلامنا

الكاتب:  الأمير الحائر [ 25 نوفمبر 2008, 8:55 pm ]
عنوان المشاركة:  Re: تيجى نحلم لسنة الجديدة

يا أحلامك الجميلة ياتنهيدة...فعلا موضوع جميل كده وشكرا انك وحدتى العدد الخاص بالتيم
بصى هو انا يمكن اكتر انسان فى الدنيا دى بحلم...مجنون احلام يعنى...بس فيا ميزة انى بحلم وبعمل للحلم ده...بس فيه ساعات أحلام مابتبقاش بإيدى ورهن للظروف وبس...ودى اللى بتغلبنى...لو اقول احلامى كلها مش هتكفى هنا بس انا اقول يعنى اقرب واخر 3 احلام ليا...وشكرا يامريم على ذوقك فى ردك الجميل بالنسبة للرواية وبتمنى من قلبى لوالدك الشفاء ان شاء الله
حلمى الأول انى ابقى كاتب...بس مش اى كاتب...كاتب يخلى كلامه حقيقة...ويخلق من خياله واقع..حتى لو كتبت أحلام أحاول احققها...مش عايز كل الدنيا تعرفنى...بس انا عايز انا اعرف نفسى...واتشرف بمعرفتها.... مش عايز يبقى عندى فلوس...المهم يبقى عندى طموح...وعندى حاجة عملتها أفتخر بيها طول عمرى....الناس مش هتفتكر وتقول ده عمل كام...انما هتقول ده عمل ايه.....
حلمى التانى هيبقى بالنسبة لمصر وللأكاديمية....لمصر انها تبقى أكبر بلد فى الدنيا بحالها مع انه حلم صعب بس مش عايز أكون متشائم وزى ماقلتى ياتنهيدة عندى أمل فى تحقيقه ان شاء الله بس احنا نحب بلدنا ونحترمها ونحترم اننا مصريين... و للأكاديمية انها ان شاء الله تبقى زى ماعيزاها الإدارة وعايزينها احنا..بيت تانى لينا ومؤسسة كبيرة مش بس موقع عالنت...ويارب حلمهم ده وحلمنا يتحقق
حلمى الأخير انى الاقى مرة واحدة فى حياتى بنت أحبها و تحبنى بجد.. تحبنى لأنى... أنا...مش لأنى... ولد والسلام...حد ممكن يفكر ده سهل...بس بجد فى الزمان ده بقى صعب جدا ان حد يلاقى بنت تحبه لشخصه ولذاته....بعيد عن اى اعتبارات تانية....وللأسف انى من النوع المعاند يعنى ممكن هأفضل طول عمرى متمسك بالشرط ده...لو حتى فضلت من غير حب....جايز فى السنة الجديدة ده يتحقق مين عارف....انا عندى أمل فى تحقيقه...بس ماينفعش أعمل ليه حاجة....ده نصيب والنصيب مالوش معاد.....فلازم استنى...زى مااستنيت كتير من بعد أخر تجربة حب ليا...3 سنين تقريبا...ويارب السنة الجاية ماتبقاش الرابعة....
بجد شكرا ياتنهيدة على موضوعك وفكرتك الجميلة جدا وكويس ان حب القسم ده انتقل لزميلتى فى التيم.... وعايزينه يبقى قسمنا هو كمان...
وهأستنى أحلامك أنتى...

الكاتب:  تنهيدة [ 26 نوفمبر 2008, 2:19 am ]
عنوان المشاركة:  Re: تيجى نحلم لسنة الجديدة

انا كمان ياوليد احلامى اد الدنيا كلها وكلها أحلام بريئة
انا بحلم اكون كاتبة مميزه تحقق كل أحلامها من خلال قلمها وافكارها ونفسى اكون كاتبه دارسه كل أصول الكتابة عشان ادافع عن بلدى من خلال قلمى ..
وتانى حلم ليا انى احب شخص يحترمنى ويحترم أفكارى ويكون عايز شريكة لحياته مش راجل يملك ست ويتحكم فيها ...
واخر أحلامى انى اشوف شباب مصر لهما راى فى قيادتها وتكون مصر اعظم بلاد الدنيا بأيدينا ...نفسى احلامى واحلامكو تتحقق يارب تكون السنة الجديدة سنة سعيدة علينا وعلى كل العالم العربى

الكاتب:  محمد محمود [ 05 ديسمبر 2008, 7:07 pm ]
عنوان المشاركة:  Re: تيجى نحلم لسنة الجديدة

أولا ً لقد اخترت اللون الأخضر لكتابة حلمي لأني واثق مهما طال الزمن انه سيتحقق
وهو ان نرى أمتنا صفا واحدا نحقق به كل طموحات شبابنا التي لو تتحقق لسدنا العالم بأسره
والحلم الثاني هو السبيل لتحقيق الحلم الأول فأنا أحلم أن نرى نفوسنا صافية خالية من النفاق والحقد
يكون شغلنا الشاغل أن نسعد غيرنا قبل أن نسعد أنفسنا بل لا نرى سعادتنا مكتملة إلا بسعادة من حولنا
وأن نخلص في عملنا لله وليس لإرضاء رؤساءنا في العمل
وقتها سنرى أمتنا سادة الأمم . قولوا يا رب

الكاتب:  الامير الصغير [ 05 ديسمبر 2008, 8:01 pm ]
عنوان المشاركة:  Re: تيجى نحلم لسنة الجديدة

موضوع جميل جداً يا تنهيده... وانا هكتب ثلاث احلام... اسيبكوا بقى مع احلام سعيده...
الحلم الاول:انى استيقظ صباحاً اجد نفسى كبرت...
الحلم الثانى:ان مصر تبقى جميلة واجمل بلد فى الدنيا
الحلم الثالث:ان المدرسه بتاعتنا تبقى نظيفه وجميله والمدرسين يتغيروا...
الحلم الرابع:وهذا الحلم حلمتوا فى الحقيقه وقمت من النوم مجنون حلمت ان العماره بتاعتنا شايلها ونش....والحلم الرابع من عندى يا تنهيده...
بس انا مش عايز الحلم الرابع ده يتحقق طبعا
وشكرا على موضوعك الجميل ياتنهيدة

الكاتب:  هبة الله محمد [ 13 ديسمبر 2008, 6:18 pm ]
عنوان المشاركة:  Re: تيجى نحلم لسنة الجديدة

آه..أحلام..موضوع جميل..الأحلام العادية الممكنة سهلة ومش لازم اقولها لأنها عادية أكثر من اللازم..عندي أحلام ثانية شبه مستحيلة..نفسي القيود تقل على البني آدم..ما بتكلمش عن القيود الدينية لا بتكلم عن القيود اللي الانسان مخترعها لنفسه..زي الحدود والفيزا وجوازات السفر..واختراعات القوانين الجديدة طول النهار..والأحزاب المتعددة والحزب الواحد..أنا حاسة إن أحنا بقينا الآلآت واتخنقنا خلاص..ونفسي الناس تقدر تتقبل اختلافات بعضها في الرأي بسهولة..الأب وأولاده..والناس بين بعضها..وطبعا دي أحلام مش هتتحق إلا إن شاء الله أما تقوم الحرب النووية والعالم يرجع بدائي تاني..بس أهي أحلام وخلاص..

صفحة 1 من 2 جميع الأوقات تستخدم UTC + 2 ساعتين
Powered by phpBB © 2000, 2002, 2005, 2007 phpBB Group
http://www.phpbb.com/