صفحة 1 من 1

حزن بلا حدود

مرسل: 26 فبراير 2010, 2:53 pm
بواسطة محمد جمال الدين
هفضل أسير لعذابى
الحزن قافل بابى
محبوس ما بين جدران
والاسم ايه انسان
انسان ضعيف مكسور
والجرح حاوطه بسور
انسان حزين مولود
وطريق طويل مسدود
وجراح تجيب فى جراح
والفرح سابنى وراح
والدنيا تلف بيا
ودمعتى فى عينيا
حبيب طلع كداب وصديق طلع غدار
غرقان فى بحر عذاب وأسير فى سجن النار
وده كنت فاكره قريب
وطلع بجد غريب
وده كنت فاكره ملاك
ولقيت جواه هلاك
وده جرحنى وده ظلمنى
وده ألمنى وده قسمنى
وده خاننى وده باعنى
وده سابنى وده وجعنى
مافيش مكان لجراح
ياريتنى أموت وأرتاح
أيام غريبة عجيبة مصرة تجرحنى
مش راضية ليه تنسانى ولا راضية ليه تريحنى
بقا حزنى هو الغالب
مرسوم على كل قالب
من جدران قصر العذاب
حتى مسابش الباب
ورسم بجرحه السور
وانا أهو ضعيف مكسور
محبوس ما بين جدران
والاسم ايه انسان
من برا بس عايش ومن جوايا ميت
الجرح عليا خيم والحزن فى قلبى بييت
وغريب قريب يألمنى
وعذاب سنين يهزمنى
وذكرى صعبة وذكرى مرة
وكدب مرة وغدر مرة
وحب مافيش
وجرح يعيش
وصمت كلام
وبحر الام
وحلم رجوع
وبحر دموع
وشمعة أملى تنطفى
وخيط النور بيختفى
ولسه برده فى قصرى أسير
حاضر يببكى وماضى مرير
مش الاسم الصحيح انسان
انا اسمى الصحيح بركان
بركان عذاب بركان ندم
بركان دموع بركان عدم
مخلوق عشان أتألم
أخرس ومش بتكلم
مبنى عشان أنهار
غريق فى بحر النار
عايش عشان أموت
كلامى كله سكوت
بفرح عشان أبكى
بسمع عشان أحكى
بددى عشان أخد حرمان
بحترم الناس عشن أتهان
بوفى بوعدى ألاقى ردود
كل اللى فيها اخلاف وعود
جاهل عشان لسه بتعلم
ساكت عشان غيرى يتكلم
واقف عشان مش بتحرك
ومن خيرى بشوف شررك
يا زمان ارحم كفاية
بجد طوولت الحكاية
لا سايبنى أموت ولا حتى أعيش
تعبت وفين الحل مافيش
رفعت راية الاستسلام
مافيش أفراح مافيش أحلام
ده مكتوبى وده نصيبى
خلاص جرحى بقا حبيبى
ده الحاضر وده الموجود
حياتى حزن بلا حدود

Re: حزن بلا حدود

مرسل: 27 فبراير 2010, 4:24 pm
بواسطة elsayad
الزميل / محمد جمال الدين
عنوان قصيدتك يلائم كم الألم والحزن بداخلها .
أحييك وأتمنى لك دوام التوفيق . flower1

Re: حزن بلا حدود

مرسل: 27 فبراير 2010, 7:30 pm
بواسطة dr asmaa
ياااااااااااااااه اه كل الحزن والالم ده

طبعا انا مش بستعجب فالدنيا عاملة فينا كدا واكتر كمان

كلماتك جميلة ومعبرة وخارجة بأحساس تلقائى

بس لو كنت قسمتها إلى فقرات بينهما فواصل كانت كانت تزداد متعى وجمال
( أقبل ملاحظتى فهى ملاحظة قارئ لا يفهم الكثير فى صياغة الشعر )

تحياتى لك

Re: حزن بلا حدود

مرسل: 05 مارس 2010, 3:16 pm
بواسطة malakyenta
ايه ياعم محمد مش ناوى تكتب بامل شويه القصيده جميله جدا بس الحزن اللى فيها كتير بس انت بتاكد المعنى اللى بيقول اقوى معانى الشعر ما يكتب عن الحزن

Re: حزن بلا حدود

مرسل: 05 مارس 2010, 3:26 pm
بواسطة fromayka
كتاباتك ميختلفش عليها اتنين جميله وبتوصل بسرعه كميه الالم كبيره ف كتاباتك بس احساسها الصادق دايما يعليها استمر ف كتابه ما تحس سواء الم او فرح مادام من القلب اكيد هيبقى ممتاز

Re: حزن بلا حدود

مرسل: 05 مارس 2010, 7:59 pm
بواسطة رحمة
قصيدة مليئة ممتلئة بالحزن و ليس كأي حزن

هو حزن عميق عميييييييييييق يؤثر في النفس و هذا سر جمال الاسلوب

أحييكم أخي و بورك اسلوبكم الجميل

Re: حزن بلا حدود

مرسل: 05 مارس 2010, 10:10 pm
بواسطة محمد محمود
رغم كم الحزن الذي حوته القصيدة ، لكنك أخي الكريم عبرت عن هذا الحزن بأسلوب بارع
صورت الحزن وجسدته بتمكن عالي وأسلوب جذاب ، وهذا هو سر جمال القصيدة " صدق الإحساس "
تحياتي لك وتمنياتي لك بمزيد من الأعمال الجميلة .

Re: حزن بلا حدود

مرسل: 18 مارس 2010, 9:25 pm
بواسطة محمد جمال الدين
بجد بجد مش عارف اشكركم ازاى متشكر قوووووووووووووووووووووووووووووووووووووووووووووووووووووووووووووى ليكم انتوا بترفعوا من روحى المعتوية والله ومتأسف على التأخير فى الرد