تحت التهديد !!

hala · Post by **hala** » 14 Feb 2009, 1:31 am

تحت التهديد !!

بصراحة بقى وع المكشوف

كـنت بحب و كلى كسـوف

لكن حبى ملانى شجـاعة

مبقاش فيه ولا ذرة خوف

وسط ميدان رمسيس راح انادى :

ياللى بحبك ... قرب شوف

حالى ف حبك ليه متلخبط ؟

شوف لك حل اعمل معروف

يا تنسينى هواك يا حبيبى

و تقـسى القـلب الملهـوف

يا ترجع لى هـداوة بالى

وترجع لونى المخطوف

قلبى ف حبك بيدوب لكن

قلبك ليه .. زى الخرشوف !!

ياللى ف حبك ميلة بختى

عصفورة والريش منتوف

انا ب اديلك آخـر فرصة

تتأسف لى احسن هتشوف

يا تحبنى زى انا ما بحبك

أو عمرك ... هيكون مقصوف !!

(( هاله ))

Post by **Ghadat2009** » 14 Feb 2009, 3:58 am

خطيرة ياهالة ... حلوة جدا و دمها خفيف بشكل ! بجد مش عارفة اقولك ايه ؟ تقريبا أنا كنت حاسة انك ممكن تعملي اكتر من كده كمان !
أهنيكي جدا عالأسلوب و الموضوع بس هو قلبه زي الخرشوف ازاي يعني ؟

Post by **تنهيدة** » 14 Feb 2009, 4:14 am

ياسلام على الحب اهو ده الحب ولا بلاش ياهالة بس يسلام لو تجيبى مسدس وسكينة كده بقة أتاكدى أنه حيعترف حيعترف

دمك عسل واللهى ياهالة ..بس انا بضم صوتى لغاده وهى يعنى اية قلبه زى الخرشوف..أكيد انتى كنتى بتأكلى خرشوف فأقلتى تكتبيه عنه بالمرة..

بحيكى ياهالة على هذا التهديد الجميل

hala · Post by **hala** » 14 Feb 2009, 3:08 pm

اشكركم كثيرا على كل هذا الاطراء ... لكن يعنى ايه المقصود ب ( قلبه قلب خصاية ؟) يعنى قلبه ابيض وصافى ونقى ولم يصل اليه التلوث بعد لان الورق الخارجى للخص بيحمى القلب ... اما الخرشوف فليس من السهل التعامل معه بسبب اوراقه التى تنتهى باطراف حاده زى الشوك ... وحتى بعد تهذيب هذه الاوراق و الوصول للقلب فهو ايضا ب يسود بسرعة ..... يبقى قلبه زى الخرشوف بقى وللا لأ ؟!

Post by **لارا** » 14 Feb 2009, 11:45 pm

هو ده الحب ولا بلاش. مش معقوله ياهاله دمك خفيف موووووووووووووووووووووووت

ومش معقول تحليلك للخرشوف

وداد الهوارى · Post by **وداد الهوارى** » 12 May 2009, 8:25 pm

الحب تحت التهديد .. صعب لكنه ممكن لمن لا يأتى بسلام

أنت شاعرة ساخرة والغنائية ظاهـــــــــرة فيما تكتبين والموسيقى فى النص عالية

دمت مبدعـــــــــة خفيفة الدم .. متمكنة من أدواتك

وداد الهـــــــــــــــــوارى

شاعـــــــــــرة عامية

fromayka · Post by **fromayka** » 13 May 2009, 3:58 pm

عسل عسل عسل
فرحانه بالادب الساخر اللى انتى بتكتبيه كلماتك موزونه ودمك ف الكتابه شربات
مستنيه خرشوفات زى دى واحسن بإذن الله
عسل عسل عسل

أكاديمية ايجيبت رايت الأدبية