سلامي ليكي يا ذكريات

[Ezz]

سلامي ليكي يا ذكريات
سلامي ليكي ولكل إللي فات
صحيح بحاول أعمل فيها شجاع
وانسى إللي حصل وأقول بعلو صوتي
عادي يعني إهي ذكرى ضاعت مع إللي ضاع
وانا عارف ومتأكد إنها مش أي حاجه
عشان دي البراءه
والبراءه لما تفوت
وتموت جوا الواحد
بتهون بعد كده كتير من الحاجات
ولا إيه يا ذكريات ؟؟
مانساش يوم ما كانت العين بتنام
والقلب هادي ومرتاح البال
والدمع لما ينزل
ويجري على الخد
كان برضه على القد
زي أحلامنا برده
وآه من أحلامنا
منا منساش كمان أحلامنا
إللي مليانا ف كرارسنا
ومخبينها تحت مرتبة السرير لحد يشوفها
وينجرح مع جروحنا
لما يعرف حكاية إللي فات
ياه على إللي فات وواحشني
تصدقي إنك واحشاني يا ذكريات؟
وحشاني برغم الآلام ..
و الشكوك و الظنون و كتر الكلام
إللي إكتشفت إنو لا كان ليه لا قيمه و لا معنى
ورغم كده إللي فرق ما بنا
مجموعه صغنتوته من الثواني والساعات
وحشاني يا ذكريات
وحشاني و نفسي ألاقيكي رجعالي من تاني
زي ما غيري كتير قلوب نفسها ترجعي
وتغيري القلوب من وحوش لعصافير كناريا تحب الدنيا و الحياة
أهو نفسي و خلاص
و عارف إن مهما إديتنا من كل حاجه فيها الدنيا
مش هتدينا إللي عدا من الذكريات
و رغم كده
وحشاني يا ذكريات

[الأمير الحائر]

شعر جميل جدا...وعجبتنى محاورة الذكريات اللى عملتها بأسلوب جميل ونهيتها نهاية أجمل بإفتقاد الذكريات رغم وداعك ليها
يمكن بس المأخذ الوحيد هو استخدام ألفاظ ممكن تخرج اللى بيقرا من الكلام بدهشة أوى زى كلمة " مرتبة " أو كلمة " صغنتونة "
حسيتها مش مناسبة جدا للمعنى ورقته...وسورى إذا كان من أول مشاركة ليك بأنقد كده بس إحنا هنا فعلا بنحاول كلنا ننقد ونطلع الأخطاء بس بكل حب بجد...
بداية جميلة جدا وأهلا بيك زميل فى الأكاديمية ياعز

[تنهيدة]

أولا برحب بيك ياعز فى أسرتنا الجميلة ...وبجد شعرك جميل ورقيق ...وبداية جميلة ..ومنتظرين المزيد وبالتوفيق انشاء الله

[Ghadat2009]

أهلا بيك في أرقى و أجمل أكاديمية

جميل أوي ان الواحد يبقى راضي عن اللي فات من حياته بحلوها و بمرها .. و حاسس ان ذكرياته هي جزء منه و من حياته ... و جميل ان الواحد يفتكر كل تفاصيل ذكرياته.. الجميلة بالذات !
مناجاة جميلة ..خيالية .. لذكريات الحياة ... بس بيتهيألي لازم الواحد يفكر اكتر في المستقبل و يحاول يعيش الحاضر صح .. اما الماضي ... فهو في الآخر مش اكتر من ذكريات
عبرت عن الموضوع الرقيق ده بطريقة عذبة و جميلة ... و كأننا فتحنا دفتر خواطر لإنسان مرهف الحس !
ومادام اسلوبك بالجمال ده ... استمر في امتاعنا به لو سمحت !

[Ezz]

الأمير الحائر : أشكرك على ردك الجميل وبالعكس أتمنى أن تنتقد أعمالي لأعرف رأي الآخرين فيها

تنهيدة : أشكرك على ردك وأتمنى أن أستمر في المنتدى معاكم

ghadat2009 : شكرا ليكي و هحاول إني أجيب حاجه جديده قريب إن شاء الله

[Ezz]

وأشكركم على ترحبكم بيا جميعا في المنتدى

[لوسفير]

بالنسبه لى مفيش نقد الان .....لكن سوف انقد عندما تزيد فى الكتابه فى المنتدى ....واهلا بيك مره تنيه معانا فى احسن منتدى واحسن اداره