المواضيع التى لم يرد عليها | عرض المواضيع النشطة التوقيت الحالى 19 نوفمبر 2018, 7:18 am





الرد على الموضوع  [ 9 مشاركة ] 

Share |


مذكرات المهندس مشمش ! :D 
الكاتب رسالة
مشرف قسم الروايات

الصورة الشخصية للعضو

مشاركات:
859
الإسم الحقيقى:
وليد توفيق
الحكمة المفضلة:
و تبقى الكلمات...
حالة التأكيد:
كاتب موثوق و مؤكد هويته
مشاركة مذكرات المهندس مشمش ! :D


ملحوظة كده لابد منها...أولا ياجماعة أنا أول مرة أكتب حاجة فى قسم المذكرات الكوميدية ده...و أول مرة اكتب اصلا حاجة بالطريقة دى....وبقالى يومين بكتب وبمسح اللى بكتبه عشان خايف حد يقيمنى على اساس المذكرات دى غلط..وفى الأخر زهقت وقلت هتفرق ايه؟ فأقروها و انتو عارفين كتابتى الأصلية ماتحكموش عليا من خلال كتابتى هنا خالص لأن دى معتبرها شخبطة...ساخرة...وحزينة فى نفس الوقت....وأى تشابه بين أحداث هذه القصة و احداث فى الواقع هو تشابه مقصود مع سبق الاصرار والتصنت! وياريت ماحدش يحدف طوب
ملحوظة تانية: أنا مبحبش مريام فارس ولاروبى ولاماريا حتى
........................


المكان: قدام كلية الهندسة فى أى جامعة فى الدنيا!
الأشخاص: مانعرفهمش! ولا هما حتى يعرفو بعض!
الحدث: امتحان ميد تيرم هندسة وصفية ( مش اسم دوا )!
التفاصيل: اقرى ومش هتفهم حاجة...!

" ميدوووو......"
" ايه ياسيد انت بتنادينى كأنى فى أخر الشارع....ما انا جمبك اهو يا محسن"
" جمبى ايه ياتامر انت كمان! ده أنا بناديك بقالى ساعة ولا انت هنا ياعلى! "
" مش شايفنى مشغول ياهيثم! سيبنى أحضر..."
" يابنى احنا داخلين امتحان بتحضر ايه دلوقتى ياعبده...."
" عارف ان احنا داخلين امتحان الأخت الهندسة الوصفية...بتاعة الحج دكتور عبد الله عبد الهادى عبد الحميد سيد....وعارف انى مش فاهم اى حاجة فى اى حاجة وعارف انك دحيح وعارف كل حاجة ياسيد....سبنى بقى ابرشم يا اسمك ايه هتضيع مستقبلى! "
" ياحسين برشم براحتك انا ماعنديش مانع بس اديك قلتها...هندسة وصفية يعنى رسم ومساقط وأبعاد...أنت بقى بتبرشم ايه ياسيد؟ "
" ايه ده بتتكلم بجد ياأحمد؟! "
" اه والله يامحمد! ما انا عشان كده مش عارف انت بتعمل برشام ايه ده...ورينى كده ياعلى كنت بتبرشم ايه؟ قلوب؟ راسملى قلوب فى قلب الورقة وتقولى برشام ياعم الرومانسى "
" طب انا اعمل ايه ياهانى اذا كنت انا دخلت كلية غلط..اديك قلتها رومانسى وقلوب وحاجات كده...ايه اللى جابنى انا فى وسط الخرسانة والمسلح والمسقط الأفقى والرأسى....ده انا رأسى وجعتنى يا محمود...أعمل ايه نفسى اعرف؟ "
" هتعرف دلوقتى حالا ياحمادة! يالا اللجنة دخلت جاى ياخليل ولا هتقلب الامتحان ده زى اللى فات؟! "
" لأ أقلب ايه..ده انا بموت فى الهندسة الوصفية..دى مادتى ياعم الحج!...أنا جاى ياعبد الله عبد الهادى عبد الحميد سيد! أنا جاى ياوصفية! قولى يابنى انت الطريق منين عشان نسيت مكان اللجنة! "
المكان : داخل لجنة امتحان ( متربة ) فى كلية الهندسة فى نفس الجامعة أو فى غيرها ماتفرقش!
الأشخاص: كائنات كده من كوكب تانى قاعدين وقدامهم لوح بيضة بيقولو عليهم اعدادى هندسة!
الحدث: امتحان ميد تيرم وصفية بتاع الدكتورعبد الله عبد الهادى عبد الحميد سيد عبد الهادى حسين ولن نذكر الاسم كاملا لعدم التطويل!
التفاصيل: كله قاعد بردو مش فاهم حاجة..!
" سيد...ياسيد...أنت ياكابتن ياللى هناك....ياللى ماسك مسطرة اقليدس انت ولاسقراط! "
بصله الطالب التانى بخنقة من تحت النضارة ( الكعب الكباية ) الأنيقة وهو بيقول: " عايز ايه ياض؟! "
" ياض؟ ده بيقولى ياض...ماشى طب بعد اللجنة نتحاسب..ان كان ليك حاجة عند ابو فصادة قله يامشمش! ماتقولى والنبى يامشمش هو اجابة السؤال الأول ايه؟ "
" انت هتهزر ده امتحان وصفية ياباشمهندش! السؤال الاول رسم والتانى رسم والتالت رسم! حدد الأبعاد...ارسم واسقط المساقط! "
" الاهى تسقط عليك كلية الهندسة يابعيد! طب بعد اذنك ياكابتن ممكن تقرب لوحتك شوية عشان مش شايف؟ خلاص ياعم انت هتبلغ عنى بنضارتك دى...خليك فى ورقتك بقى ومساقطك الاهى تسقط! "
بص حواليه...كله مشغول فى لوحته...مافيش حد قريب منه يعرف ينقل...بص لأبو نضارة تانى
" طب بص يامشمش اخر طلب بس "
" قول ياسيدى خلصنى ده ايه اليوم ده "
خلاص ياعم براحة..ممكن بس تسلفنى القلم السنون بتاعك وعلبة السنون التو اتش وعلبة السنون البى اتش والاتش والاتش كمان وياريت لو البرجل بقى والمنقلة واللذى منه عشان انا جديد هنا والنبى! "
" انت مجنون يابنى انت....يادكتور يادكتور.......... "
" فيه ايه يابنى انت بتزعق ليه؟! "
" الواد ده هيجننى! عمال يقوللى هات قلم وسنون ومنقلة ومشمش! "
" مشمش؟! ايه يابنى انت انت بتتكلم مع زميلك ليه؟! "
" لأ يادكتور ولاحاجة انا بس كنت بقوله هات منديل و باقله مشمش عشان هو امور كده شبه ابن خالتى تفيدة اللى اسمه مشمش ودول سموه مشمش عشان كان فى يوم عندهم قطة حولة مطلقة وبعدين............."
" بس! مشمش ايه وقطة ايه! انت هتحكيلى تاريخ حياة خالتك! "
" ياباشا وليه بس الغلط بقى وكده ده انا خالتى جوزها راجل كبير فى البلد يعنى حاسب! "
" اه ...احم..معلش...ماكانش قصدى.....وهو حضرته بيشتغل ايه؟ "
" مخبر ياباشا! "
" مخبر؟! "
" اه ياباشا بش مش اى مخبر...ده لامؤاخذة عليه كف بيضرب قفا مالوش حل! فى مرة مسك حرامى كان عايز يسرق القط مشمش عشان كانت عنده قطته مابتخلفش و بعدين....."
" بس ياطالب! كلمة زيادة وهأفصلك, خليك فى ورقتك ولو سمعت صوتك ولا قططك تانى هأحولك للتحقيق! سامع؟! "
" سامع ياباشا طبعا هو انا واقع على ودانى...مش عارف انتو مخنوقين من مشمش كده ليه بس...."
بص فى ورقته...وقرى السؤال الأول للمرة الستين.." ارسم مسقط رأسى ومسقط مش رأسى...ومسقط افقى ومسقط نص افقى..لواجهة أمامية وخلفية والواجهة المستخبية الداخلية لشاليه فى العجمى أو بورتو مارينا! ويكون بيطل على البحر الأحمر أو الأخضر! وجمبه سياح من روسيا! ويكون شرح وبرح كده مش شبه بيتكوا! الابعاد المطلوبة....."
" ده امتحان ده ولااعلان جرنان! "
" بص فى ورقتك يامشمش! "
"ماشى يادكتور من عنيا! " " جتك نيلة وأنت شبه الببغان بتاع خالتى! "
الوقت بدأ يعدى..مسك القلم الجاف اللى كان سالفه من صاحبه قبل اللجنة وابتدى الرسم....
بعد ساعتين....
" أنت ياباشمهندس...أنت يابتاع مشمش! "
" أؤمر يابيه! "
" بيه ايه ياطالب انت قاعد على قهوة...وبعدين مش شكلك دحيح ولاحاجة قاعد واللجنة كلها مشيت...طب بأمارة ايه؟ "
بص حواليه لقى نفسه لوحده... " معلش يادكتور اصلى سرحت فى تفاصيل اللوحة! "
" طب بابو تفاصيل..هات ورقتك خلينا نروح! "
ٌ قلب الورقة على ضهرها وادهاله وهو بيقوم بسرعة " أمشى يادكتور؟ "
" اه يابنى امشى...بس امضى فى..." سكت وبرق فى اللوحة...
" ايه اللى انت راسمه ده ياباشفاشل! راسملى بنات وفساتين فى اللوحة؟! "
" لأ أبدا يادكتور..ركز أنت بس كده...ده مسقط ( رقصى ) من واجهة فستان ميريام فارس فى الكليب بتاعها الجديد!...شوقته ياباشا؟! "
" شوفت يومك يابعيد! انت فاكر نفسك بتمتحن فى ميلودى!
" ياباشا ليه بس التريقة...مش المفروض انتو بتشجعو على الابداع الفنى؟! وبعدين انا راسم كل حاجة صح وبص تحت حتى هتلاقى الأبعاد...اهى... 150 سم فوق الركبة! الكتف ساقط تماما بزاوية 360 درجة ! وفيه هنا فى الوسط فتحة تهوية عشان الحر و كده انت عارف الكليبات والاستديو الجو بيبقى حر...! "
" بس! كلمة زيادة وهأفصلك...مع ان كده كده هتتفصل لما دكتور عبد الله عبد الهادى عبد الحميد سيد يشوف الرسمة المسخرة بتاعتك دى ياباشروتانا! "
" ايه ده؟ تفتكر؟ هو الدكتور مابيحبش ميريام فارس؟! "
" بررررررررررررررررررررررررره !! "
.......
طلع من مبنى الامتحان بيصفر ومبتسم زى عادته لما بيخرج من الامتحان حالل...لقى صاحبه بتاع قبل الامتحان مستنيه...
" ايوة ياعم على...طالع بتصفر وشكلك قفلت المادة! وعامللى نفسك مش عارف حاجة "
ابتسم وبصله وهو ساكت...
" بقولك ايه يامحسن..بما انك اخر واحد طالع ومقفل المادة كنت عايز أسألك على المسقط البينى اللى فى السؤال ال 15 نمرة ج.... "
" بقولك انت ياسيد سيبك من الموضوع ده عشان كنت عايز أسألك سؤال خطير..."
" سؤال خطير ايه...خير قلقتنى..."
" كنت عايز أسألك...هو فى الكليب الأخير بتاع روبى...كانت راكبة عجلة ولاسكوتر....؟؟؟؟؟؟ "
......................................................................................
يتبع...أو مايتبعش....ماتفرقش

_________________
ثمة أسماء و ألقاب تبقى..بقاء الأرض..بقاء السماء..و بقاء الكلمات...
ثمة أشياء تتعلق حياتها بأماكنها..بتوابيت مغلقة تخشى الإبتعاد عنها...
رغم أن الحياة..قد تكمن فى هذا البعد...

.....

...:: و تبقى الكلمات ::...

...... صفحتى فى الأكاديمية ......



29 نوفمبر 2008, 11:08 pm
الملف الشخصى
مشرف قسم المقالات و النقد الفنى

الصورة الشخصية للعضو

مشاركات:
779
مكان:
مصر
الإسم الحقيقى:
أحمد جمال الدين أحمد
الحكمة المفضلة:
دائما إفعل ما تحب ان يراك الناس عليه
دائماً لا تفعل ما يحب الناس ان يروك عليه
حالة التأكيد:
كاتب موثوق و مؤكد هويته
مشاركة Re: مذكرات المهندس مشمش ! :D


ايه دا يا بشمهندش مشمش لا نكتة حلوة اوى يا وليد بقولك ايه يا ابراهيم تعمل كام واحدة من دى يا حسن وهكلملك الناس تيجى ايه رايك يا حسين تمام يا برنس اتفقنا يا ذكريا

_________________


30 نوفمبر 2008, 12:27 am
الملف الشخصى Yahoo الموقع الشخصي
مشرفة قسم أدب الأطفال

الصورة الشخصية للعضو

مشاركات:
1291
مكان:
بنت مصر
الإسم الحقيقى:
نهاد نعمان
الحكمة المفضلة:
لوسرقت منا الأيام قلباً معطاء بسام لن نستسلم للآلام ...لن نستسلم للألام .....
حالة التأكيد:
كاتب موثوق و مؤكد هويته
مشاركة Re: مذكرات المهندس مشمش ! :D


مكنتش أعرف يا......مش فاكرة انتى لاغبطنى عالأخرأه.. ياوليد انك كمان كاتب كوميدى جامد كدة انا حاسة انى بقراة ليوسف معاطى بس بصراحة حلووووووووووه اوى انا حسيت انك جننت المراقب واللهى حرام عليك لو بتوع الهندسة قرو الكلام دة حيتجننو اكتر
حلو اوي انك غيرت من الكتابات فى الأكاديمية الا انا حاسة ان فى رقود فى الأكاديمية بقالها كام يوم
يارب بالتوفيق عالطول فى كل كتاباتك وكنت عايزة ققولك ان ميكتبش نوع زي دة من الكتابة غير الأنسان المتمكن من جميع أساليب الكتابة عالفكرة انت هاااااااااايل

_________________


30 نوفمبر 2008, 1:24 am
الملف الشخصى
أكاديمى نشيط
أكاديمى نشيط

الصورة الشخصية للعضو

مشاركات:
261
مشاركة Re: مذكرات المهندس مشمش ! :D


مشمش تصدق نفسى فيه...هاهاهاهاهها يا استاذ مشمش شكلك يا وليد كاتب قصة حياتك و انتا مش حاسس بس بجد جميلة و واقعية ده الى ممكن كثير من الاعضاء مش يصدقوه بس فعلا بيحصل كده و اكثرمن كده بجد يا و ليد اشكرك على هذه المذكرات المشمشية هاهاههاهاهاهاه

_________________
ابن مصر
على اسم مصر التاريخ يقدر يقول ما شاء

أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء

واكرهها وألعن أبوها بعشق زي الداء
----------------------------------------
يالا يا مصرى نشترى المنتج المصرى
--------------------------------




30 نوفمبر 2008, 7:29 am
الملف الشخصى
مشرفة قسمى الشعر, كلام فى الحب

الصورة الشخصية للعضو

مشاركات:
119
مكان:
مصر
الإسم الحقيقى:
آيه الشحات أحمد
الحكمة المفضلة:
اطلبوا اللعلم من المهد الى اللحد
حالة التأكيد:
كاتب موثوق و مؤكد هويته
مشاركة Re: مذكرات المهندس مشمش ! :D


ايه الجمال ده يابشمهندس مشمش والله روعه بس بجد بحييك عليها هايله اوى

_________________
همسه


01 ديسمبر 2008, 11:08 am
الملف الشخصى
مشرف قسم الروايات

الصورة الشخصية للعضو

مشاركات:
859
الإسم الحقيقى:
وليد توفيق
الحكمة المفضلة:
و تبقى الكلمات...
حالة التأكيد:
كاتب موثوق و مؤكد هويته
مشاركة Re: مذكرات المهندس مشمش ! :D


ياجمااااااااااااعة انا مش مشمش
ههههه حبيت بس أوضح انا مش لازم عشان كتبت حاجة تبقى أنا أو بتعبر عن سيرة ذاتية...دى حالة عامة...وعلى فكرة بجد مش فانتزيا ولاحاجة..الكلام اللى قولته ده حصل وبيحصل لناس كتير دخلو هندسة بسبب المجموع أو بسبب ضغط الأهل على الشخص..وبالتالى بيبقى حالته فى الكلية كده لأنه مش فى مكانه الطبيعى ولا المواضيع بتلاقى اهتمام عنده
ياريت اكون قدرت اوصل رأيى وفكرتى لأن الموضوع مش مجرد سخرية وبس لأن بجد اللى بيقرا ورا المعانى كويس هيلاقى ورا السخرية دى حزن....وده هتلاحظوه اكتر لو قررت انى اكتب فصول تانية من المذكرات دى ان شاء الله....
أحمد شكرا بجد على ردك وعلى فكرة موضوع الأسامى ده بجد مش بهذار وعشان اوضح فكرتى للناس اللى ماخدتش بالها...انا قصدى من لغبطة الأسامى دى اوصل حقيقة ان كلية الهندسة بالذات والكليات العملة بوجه عام بتبقى الصداقة الحقيقية فيها نادرة أوى...ولأنى عاشرت التجربة بنفسى من منظور كاتب...فشفت ان فيه ناس بيبقو الاسم صحاب...وعارفين بعض مع انهم مش عارفين بعض! حد فاهمنى؟ يعنى بيبقو عارفين اسامى...ده شاطر ولاخايب...ده حل شيت الماتريال ولا ماحلوش ده يعرف الدكتور ( واسطة يعنى ) ولا لأ...كله مصالح فى مصالح...انا مش بعمم بس بجد نادر أوى لما تلاقى صاحب بجد يصاحبك عشان شخصك ومايقربلكش عشان مصلحة...وده كان قصدى من لغبطة الأسامى...يعنى مش بس هذار...وشكرا يا أحمد مرة تانية على ردك
.........
منور يامحمد...وفعلا ممكن يكون فيه تشابه فى الأحداث ( مع بعض أجزاء من حياتى ) بس دى بجد مش قصة حياتى ولا أنا المهنس ( مشمش ) أبدا.... زى ماقلت انت بالظبط.. انا ( وليد ) وكاتب احساس اى مهندس ممكن يدخل هندسة غلط! بس...دى فكرتى...ويارب اكون قدرت اوصلها...واللى يقرا اللى فوق لو قرى ردى ده يارب يعرف قصدى الحقيقى لأن مش قصدى أبدا سخرية من حد ولا شخص ولا كلية...أنا قصدى واضح جدا...سخرية مريرة من وضع غلط...وزى ما أنت قلت بالظبط يامحمد بيحصل أكتر من كده....وشكرا يامحمد على ردك وتشجيعك
.........
تنهيدة...بجد شكرا لأنك أول واحدة تكلم عن العمل كعمل وكتابة مش كسيرة شخصية...لأن كون ان فيه ناس تعرف حياتى الشخصية دخلت ده فى ده....وبجد انا مش ده...ولا انا اللى جننت المراقب...( مشمش ) هو اللى جننه ...أقصد اقول ان الشخصية الخيالية اللى بتكلم عنها هى اللى عملت ده...وبجد شكرا على رأيك فى كتابتى الكوميدية ...ومع اعتبارى انها شخبطة...بس بجد شكرا على رأيك اللى بعتز بيه دايما...وكون إنى بكتب كل الأنواع فدى حاجة انا بحلم بيها وبحاول اعمالها اهو فعلا فى الأكاديمية...وعلى فكرة هو ده سبب الركود الأيام اللى فاتت فى الأكاديمية...لأن أغلب الأعضاء كل واحد ماسك قسم ومش راضى يطلع منه...لكن لو حاولنا كلنا نغير من كتابتنا وننوع فيها هيطلع حاجات هايلة جدا زى مسرحية أحمد الجديدة كده...ويارب كله يعمل كده فعلا ويبتدو يكتبو قصص قصيرة ورايات ومسرحيات ومذكرات كوميدية..أو مقالات ومواضيع نقاشية وأحلام مجنونة...كل حاجة...هى بس الفكرة اللى بتعمل المعجزات....ويارب نفكر فى جديد دايما....ننسى القديم ونفكر فى حاجات جديدة ونألف بدال احساسنا و عقلنا لسه شغال يبقى فيه أفكار وبحر كتابات مالوش أخر....ويارب كله يفهم رسالتى دى....وشكرا ياتنهيدة بجد على رأيك الجميل والمشجع جدا جدا....
.........

ياهمسه مش اناااااااا والله ما أنا خالص اقرى اللى كتبته فوق..دى شخصية خيالية لحالة ممكن تحصل مع اى حد ومش شرط فى كلية الهندسة بس...ممكن فى أى مكان مابيناسبش صاحبه ( الشخص الغلط فى المكان الغلط ) ولازم هتحصل مشاكل وسخرية ومفارقات ومواقف كوميدية وده اللى حاولت أوصله...فياريت اللى يعرف عن حياتى الشخصية مايربطش بينها وبين المذكرات دى ...لأنها مذكرات خيالية مش شخصية...ويارب أكون قدرت أوصلك وجهة نظرى يا أية...وكمان ياريت من ردودى فوق تكونى قدرتى تفهمى المغزى ورا الكوميديا والسخرية اللى فى العمل...وشكرا يا أية بجد على رأيك وتشجيعك ونورتى الأكاديمية بعد غياب

_________________
ثمة أسماء و ألقاب تبقى..بقاء الأرض..بقاء السماء..و بقاء الكلمات...
ثمة أشياء تتعلق حياتها بأماكنها..بتوابيت مغلقة تخشى الإبتعاد عنها...
رغم أن الحياة..قد تكمن فى هذا البعد...

.....

...:: و تبقى الكلمات ::...

...... صفحتى فى الأكاديمية ......



01 ديسمبر 2008, 11:56 am
الملف الشخصى
مشرف قسم الأشعار

الصورة الشخصية للعضو

مشاركات:
1070
مكان:
الإسكندرية
الإسم الحقيقى:
محمد محمود حسن
الحكمة المفضلة:
إلهــــي لا تعذبني فإني
مقر ٌ بالذي قد كان مني
حالة التأكيد:
كاتب موثوق و مؤكد هويته
مشاركة Re: مذكرات المهندس مشمش ! :D


والله القصة واللي كاتبها أحلى من المشمش يا باشمهندس مشـ...... أسف يا باشمهندس وليد
كاتب كوميدي بنفس كفاءة ما اعتدناه منك

_________________
تواضع تكن كالبدر لاح لناظر ٍ على صفحات الماء وهو رفيع ُ
ولا تك كالدخان يعلو بنفســه إلى طبقات الجو وهو وضيـــع ُ




صفحتي الشخصية


01 ديسمبر 2008, 4:03 pm
الملف الشخصى Yahoo الموقع الشخصي
مشرفة قسم المناقشات

الصورة الشخصية للعضو

مشاركات:
77
مكان:
مصر
الحكمة المفضلة:
الحب هى النار الوحيدة التى تحب أن تحرق منها!
مشاركة Re: مذكرات المهندس مشمش ! :D


بقى كده ياوليد تكتب حاجة زى دى ومش تقولى وتسيبنى اشوفها بالصدفة كده....طب ادينى رسالة ميسد اى حاجة قولى انك كتبت قصة حياتك يامريم
والله روعة وزى ماقال محمد دى بتحصل فى الواقع وهنروح بعيد ليه انا كنت مجننة المراقبين والدكاترة فى كلية الاداب قبل ما اسيبها وكنت مع ذلك بخرج من اللجنة فى نص الوقت ما انا مش عارفة اكتب حاجة وكنت بكتب قصيدة شعر او قصة جوه ورقة الاجابة او اغنية رومانسية و زملاتى فى اللجنة فكرونى دحيحة بقى وكده وهاتك يامجاملات بقى وكله عشان يغش.....والله زى ما انت وضحت فى ردك يا وليد الجامعة ماحدش بيطلع منها بصحاب بجد الا فى النادر و فى الكليات النظرية او العملية سيان لأنه الغالب بيبقى معرفة عشان شيت ولا معرفة دكتور ولاعشان غش فى الامتحان......ودى بتبقى حاجة بايخة اوى موضوع صحوبية المصالح دى لأن الواحد نفسه فى صحاب بجد
والله ياوليد هايل انك كتبت حاجة زى دى لأنها مع الكوميديا الهايلة اللى فيها بس توصل حاجة مهمة جدا اكيد غيرنا كتير عاشها.....وبعدين مايتبعش وماتفرقش ايه والله لو انت مش كملتها ياوليد انا هاكملها وساعتها هتبقى كارثة

_________________

لو ماقدرتش تضحك ماتدمعش وماتبكيش وان مافضلش معاك غير قلبك مش هتموت هتعيش


08 ديسمبر 2008, 10:46 am
الملف الشخصى
مشرفة قسم الخواطر

الصورة الشخصية للعضو

مشاركات:
795
مكان:
my own world
الإسم الحقيقى:
جيهان راضي
الحكمة المفضلة:
المرأة عاشت ألوف السنين مثل مرآة تعكس صورة للرجل أكبر و أجمل من الحقيقة !
حالة التأكيد:
كاتب موثوق و مؤكد هويته
مشاركة Re: مذكرات المهندس مشمش ! :D


مساء الخير يا وليد ...
مذكرات رائعة جدا ... ضحكت فيها كثيراً ... استطعت أن تعبر عن مشكلة خطيرة بسخرية و تهكم ذكرني بإسلوب محمد هشام عبية و يوسف معاطي كما قالت نهاد ... و حقا نستطيع أن نشعر بحزن ذلك الطالب من حاله ... فشر البالية ما يضحك ...
سأقرأ الأجزاء الآخرى ... تحياتي لك .. :)

_________________



11 أبريل 2010, 10:55 pm
الملف الشخصى الموقع الشخصي
عرض المشاركات السابقة منذ:  مرتبة بواسطة  
الرد على الموضوع   [ 9 مشاركة ] 



المتواجدون الأن

الأعضاء المتصفحون لهذا القسم لا يوجد أعضاء متصلين و 1 زائر


لا تستطيع كتابة مواضيع جديدة في هذا القسم
لا تستطيع كتابة ردود في هذا القسم
لا تستطيع تعديل مشاركاتك في هذا القسم
لا تستطيع حذف مشاركاتك في هذا القسم
لا تستطيع إرفاق ملف في هذا القسم

البحث عن:
الإنتقال إلى:  

cron
Powered by phpBB © phpBB Group, Almsamim WYSIWYG
Style by ST Software for PTF.
Translated by http://EgyptWrite.com

All Rights Reserved.
Copyright © 2008-2009 - EgyptWrite.com


cool hit counter