جوه معمل الكيميا 2 ( مذكرات المهندس مشمش )

هذا القسم لليوميات أو المذكرات المسلسلة والمكتوبة فى قالب كوميدى أو اجتماعى ساخر.

المشرف: الأمير الحائر

أضف رد جديد
صورة العضو الرمزية
الأمير الحائر
مشرف قسم الروايات
مشاركات: 859
اشترك في: 31 أكتوبر 2008, 8:06 pm
Real Name: وليد توفيق
Favorite Quote: و تبقى الكلمات...
verification: ID verified and trusted writer

جوه معمل الكيميا 2 ( مذكرات المهندس مشمش )

مشاركة بواسطة الأمير الحائر »

المكان: معمل الكيميا فى كلية العلوم جامعة سيد بيه النموذجية!
الحدث: إمتحان الكيميا العملى لإعدادى كلية الهندسة!
الأشخاص: نفس الولاد والبنات بعد ماسابوا الأسكيما - قهرا - على باب المعمل ( واللى ما بيلقوهاش طبعا بعد الإمتحان عشان بيتقلبوا من مجهولين..احم...)
" الإمتحان سهل جدا "
نطق عشماو...احم...مراقب اللجنة الشاب بالعبارة وهو بيبص على الصف اللى قدامه اللى مليان ولاد.. بصوت جهورى رج الأنابيب الإزاز اللى قدامهم...بعدها تقدم خطوات ليجد صفا أخر مليان بنات - فينعم - صوته المرة دى لزوم " البرستيج "
" كل طالبة أمورة...احم...أو طالب...معاه كيسة عليها رقم وفيها مادة..المطلوب منكم ياباشمهندسين ياحلوين يا عساسيل يا متمكيجيــ...أقصد يامتنبهين! انكم تعرفوا المادة دى ايه...! قدامكوا أزايز المواد المختلفة...اعملوا التجارب والتفاعلات على المادة اللى معاكوا لحد ماتعرفوا المادة اللى معاكوا ايه! يلا كل واحد فى كيسته! مش عايز أى أسألة "
قالها قبل أن يميل على أذن البنت فى أول الصف قائلا فى حنان ( أخوى ) خالص :
" إنما أنتى ياقمر لو عايزة تسألى على أى حاجة أسألى.." ضحكت البنت ضحكة ( محترمة ) فإنتفض المراقب الشهم معتدلا فى إرتباك
" كل واحد فى كيسته..."
" يادى الواد حمادة المسهوك ده...مش لاقيين غير المعيد الروش ده ييجى يراقب علينا..."
نطق بالجملة فى خفوت وهو ينظر إلى المراقب الشاب وهو يتبادل الضحكات والهمسات مع الطالبة إياها فى أول صف...استخبى ورا اللى جمبه و صرخ بصوت جهورى:
" كبسة..العميد جاى "
ارتعد المراقب هذه المرة وهو ينظر حوله فى رعب قبل ان ينظر إلى البنت ويعود لصوته الجهورى
" بصى فى كيستك! "
أخذ الجميع من حوله يكتمون الضحكات..بينما هو انهمك فى " كيسته " قال ايه بيفحصها!
" عالم تخاف ما تختشيش...يلا أما نشوف المادة دى إيه نظامها...قال يقولك اعرف هى ايه! يا حلاوة...حزر فزر المادة ايه...لعبة جامدة والله...بس مافيش إختيارات "
نظر ساخرا إلى المادة قبل أن ينظر - كعادته - حوله ليرى زملائه المحيطين به ليجد المفاجأة فى أن المجاور له هو نفس الطالب بتاع لجنة الوصفية أبو نضارة كعب كباية!
" مشمش! يخرب عقلك! أنت لسه عايش! ده أنا فكرتك انقرضت! "
" أنت تانى! ومشمش تانى! والله لأناديلك المراقب! يادكتور... "
" ههههه خلاص يامشمش خلاص...بلا مراقب بلا بتاع..هو فاضى...خليك فى كيستك بقى! الاهى يكيسوك فى كرتوتة فراخ تطلع منها بريش! "
نظر حوله مرة أخرى ليجد مفاجأة تانية خلفه
" شوزى! أنتى هنا! ده ايه الحظ ده...والله من كتر معزتك عندى ربنا خلانا ورا بعض فى اللجنة! "
نظرت إليه شوزى من تحت لفوق كعادتها...
" سوفاج...! "
" إيه ده؟! أنتى عرفتى المادة بتاعتك بسرعة كده...؟! "
أخذت تنظر إليه من بين بحثها عن شئ ما وسط الزجاجات أمامها وهى ترفع الزجاجات وتنظر تحتها فى ضيق وتضعها مرة أخرى..
" ياااااى! خنقتنى...بليز سيبنى فى حالى...لو أنت فاشل أنا مش فاشلة خلينى أركز! "
" ههههه أنا فاشل ياشوزى؟! طيب....إن ما فجرت العمل فيكى ما أبقاش أنا..."
نظر مرة أخرى لما حوله...كان زميله " اللدود " مشمش عمال يطلع حتت من الكيسة اللى فيها المادة ويحطها على حاجات تانية...وكان واضح عليه إنه مش عارف يحل حاجة...بص لشوزى لقى نفس الكلام...
" ايه يامشمش؟! الإمتحان صعب ولا إيه...؟! "
" بقولك ايه...خليك فى كيستك أحسنلك...وسيبنى أحل بقى! مش كفاية الإمتحان معقد...! "
" تستساهل...إيه اللى خلاك تختار هندسة لما أنت فاشل...تلاقيك كنت ناجح بالغش! "
" وأنت اللى عارف تحل...ده أنت حتى مامسكتش المادة أصلا ولا عملت تفاعلات! ايه بقى اللى دخلك هندسة..."
" حكم القوى يامشمش...ربنا يجازى اللى كان السبب...خليك فى كيستك بقى بدل ما أرش عليك يورانيوم! "
نظر إلى كيسة المادة مرة أخرى...قبل أن يلحظ جزء ظاهر من ورقة تحت أحد الأنابيب..
" إيه ده بقى ياترى...؟
" خرج الورقة...لقى متكوب فيها كلام كتير وابتدى يقرا
( شوزى...اسمعى..دى طريقة معرفة المادة بالتفصيل! )
" اه يا فاشلة...كده فهمت...وبتنجحوا فى الأخر..وياترى مين روميو " الأحول " اللى حطلك الورقة دى....طب يلا بقى استلمى اللى هيحصل..."
( سيبك من كل الخطوات العادية ياحبيبة قلبى و ادخلى على المهم...)
" حبيبة قلبك...! خش على قلبك كارو بحمار أهبل يابعيد! "
( حطى المادة اللى معاكى على الصودا الكاوية..لو طلع اللون أصفر تبقى المادة بوتاسيوم...ولو..................)
" ميه ميه...ده إحنا شكلنا هنضحك ضحك! "
أخذ يتبع الخطوات وفى ظرف دقيقة كان قد عرف المادة...و كتب ما فعله فى سرعة على ورقة الإمتحان زى التعليمات اللى فى الورقة...
( هأستناكى بعد اللجنة ياقمر اللجنة!..عازمك على فسحة جميلة على النيل وسط المية والهوا والسمك!...دكتور حمادة )
" هو أنت ياحمادة...صحيح..الأسماك على شوكها تقع! "
" بقولك يامشمش...أنا خلصت حل...مش عايزنى أغششك حاجة..."
" أنت خلصت! تلاقيك سايب الورقة فاضية! ده أنا شم عارف أحل الإمتحان أنت هتحله يافاشل! "
" ههههه والله ظريف يا مشمش...أدى الورقة...بص شوف...ايه رأيك..."
" إيه ده! ده أنت حليت بجد! والنبى يا فاشــ...أقصد يا اسمك ايه والنبى قوللى الطريقة لأحسن أنا اتعقدت "
" دكتور! يادكتور! "
" أيوة يابنى...فيه حاجة..."
" اه...مشمش عايز يغش منى! "
" مشمش؟! "
" أيوة يادكتور حمادة...ده اسمه مشمش...وبيقولى عايز يغش منى! "
" إزاى يا مشمـ...احم..إزاى ياطال تحاول تغش فى قلب اللجنة...هى سايبة..."
" معلش يادكتور والله...أنا بس كنت بسأله على معلومة بسيطة..."
" معلومة بسيطة! طب اطلعلى قدام يلا...اقعد لوحدك على الترابيزة اللى قدام دى عشان ما تفكرش تغش تانى..وأنت يابنى كمل حل خلاص "
" شكرا يادكتور حمادة...ربنا يخليك للغلابة...إلاهى ربنا يكرمك زى ماكرم تامر حسنى قادر ياكريم! "
" تامر حسنى؟! ششش خليك فى كيستك بقى و حل وأنت ساكت! "
ضحك فى سره ونظر خلفه ليجد شوزى وهى تكاد تبكى بينما حمادة ينظر إليها بغرام و " يغمز " لها من تحت لتحت قبل أن يذهب بعيدا دون أن يفهم إشاراتها اليائسة..
" شوزى...زميلتى الغالية...مش عايزة حاجة منى قبل ما أمشى...مش عايزة أحللك أى حاجة؟! "
" أنت تحللى أنا؟! أنت عارف حاجة فى أى حاجة أصلا..."
" أعرف كتير...أصلى لقيت رسالة تحت الماء! من عاشق ولهان! "
" إيه ده...الورقة دى....لأ...إزاى...مش ممكن...."
" هههههه أنتى ماتعرفيش إن دكتور حمادة عنده حول نصفى ولا إيه...! "
" بليز...بليز هات الورقة...أنا كده هأسقط..."
انقلبت لهجتها مرة واحدة لـ ( سهوكة )
" بليز..عارف لو اديتنى الورقة...هأحبك جدا...وهتبقى زميلى الوحيد فى الجامعة..."
" الله...الله على الجمال...وإيه كمان يا شوزى...قولى ياحبيبتى..."
" وهنخرج سوا...ونروح الأهرامات...وأبو الهول..وأبو فصادة كمان...هات الورقة بقى والنبى !
" ههههه طب ما أنتى بتكلمى زى الناس اهو...امال كنتى قالبة لسانك ليه...عموما أنتى صعبتى عليا برقتك وجمالك يا شوزى...وعشان كده...مش هأديكى الورقة! "
ضحك بسخرية وهو يضع الورقة على موقد البنزين أمامه
" سلام ياشوزى...ابقى سلميلى على حمادة! "
خرج بإبتسامة واثقة ظافرة ليسلم ورقته...وسط نظرات الجميع الحاسدة بإعتباره " الدحيح " و أول واحد يخلص الإمتحان...
غادر مبنى كلية العلوم بخطوات أكثر ثقة...قبل أن يخرج ويرى أمام الكلية الخالى إلا منه هو...فإبتسم فى فخر
" ممتاز من يومك يابنى..ماكنتش أعرف إن النجاح سهل كده...بركاتك يا شيخ حمادة...! صورة "
.........................

يتبع أو مايتبعش..ماتفرقش... صورة
ثمة أسماء و ألقاب تبقى..بقاء الأرض..بقاء السماء..و بقاء الكلمات...
ثمة أشياء تتعلق حياتها بأماكنها..بتوابيت مغلقة تخشى الإبتعاد عنها...
رغم أن الحياة..قد تكمن فى هذا البعد...

.....

...:: و تبقى الكلمات ::...

...... صفحتى فى الأكاديمية ......
صورة العضو الرمزية
Ghadat2009
مشرفة قسم الكتابة
مشاركات: 1481
اشترك في: 02 فبراير 2009, 12:00 pm
Real Name: غادة يسري
Favorite Quote: كن جميلا ..... ترى الوجود جميلا :)
verification: ID verified and trusted writer
مكان: مصر الجميلة

Re: جوه معمل الكيميا 2 ( مذكرات المهندس مشمش )

مشاركة بواسطة Ghadat2009 »

صورة دي لجنة تحفة أوي ! و البطل شرير شويتين بس بشكل كوميدي !
بس المذكرات المرة دي أحلى كمان من اللي قريتها و فيها نقد لاذع للنظام التعليمي و نظام التنسيق و حتى نظام اللجان و الامتحانات و الأساتذة اللي فيه منهم اللي لازم يمر باختبارات نفسية قبل مايدرّس او يتعامل مع طلبة ... كأن فيه صرخة بضرورة التغيير الشامل في المنظومة التعليمي كلها ! بس في قالب كوميدي راقي وواقعي ..صورة

باحييك جدا على تناولك المميز الجميل للموضوع الحيوي الخطير اللي بيهم كل بيت في مصر ! صورة

صورة بس ده فيه كده هجوم شامل : قصة ... وشعر ...و مذكرات كوميدي ! اعلان :اجتماع طاريء لحزب البنات للرد السريع و المكثف !! صورة
صورة

.
.
.
[highlight=#ffff40]*** لــزيارة صــفـــحـــتــي *** [/highlight]
صورة العضو الرمزية
لارا
مشرفة قسم إهداء إلى
مشاركات: 151
اشترك في: 22 ديسمبر 2008, 12:00 am
Real Name: سها محمد حسن
Favorite Quote: من الذكاء ان تكون غبيا بعض الوقت
verification: ID verified and trusted writer

Re: جوه معمل الكيميا 2 ( مذكرات المهندس مشمش )

مشاركة بواسطة لارا »

صورةبجد تحفه ولذيذه خالص . بس عندى سؤال هو ممكن يحصل كده بجد ؟؟
cowards die many times before thier dies
صورة العضو الرمزية
الأمير الحائر
مشرف قسم الروايات
مشاركات: 859
اشترك في: 31 أكتوبر 2008, 8:06 pm
Real Name: وليد توفيق
Favorite Quote: و تبقى الكلمات...
verification: ID verified and trusted writer

Re: جوه معمل الكيميا 2 ( مذكرات المهندس مشمش )

مشاركة بواسطة الأمير الحائر »

ghadat2009 كتب:صورة دي لجنة تحفة أوي ! و البطل شرير شويتين بس بشكل كوميدي !
اه فعلا تقدرى تقولى عليها كده لجنة المجانين صورة والبطل أنا متعمد أخليه فيه حتة المقالب والسخرية دى عشان كده يبان شرير وبالذات مع مشمش وشوزى صورة
ghadat2009 كتب: بسالمذكرات المرة دي أحلى كمان من اللي قريتها و فيها نقد لاذع للنظامالتعليمي و نظام التنسيق و حتى نظام اللجان و الامتحانات و الأساتذة الليفيه منهم اللي لازم يمر باختبارات نفسية قبل مايدرّس او يتعامل مع طلبة... كأن فيه صرخة بضرورة التغيير الشامل في المنظومة التعليمي كلها ! بسفي قالب كوميدي راقي وواقعي ..صورة

باحييك جدا على تناولك المميز الجميل للموضوع الحيوي الخطير اللي بيهم كل بيت في مصر ! صورة
بجد ياغادة بأبقى سعيد لما حد زيك بيفهم العمل كعمل فعلا مش كضحك وهزار بس...وأنا من رحلة عذابى الجامعية واللى شفته ولا زلت بأشوفه فيها.. حبيت أعبر عن القضايا الكبيرة دى بشكل كوميدى خفيف ومش جارح فى حد...وفى نفس الوقت أوصل مشكلة أكيد كتير عانو وبيعانوا منها فى جامعاتنا....
وأنا اللى بحييكى جدا ياغادة على أرائك وتحليلك القيم بجد للعمل صورةصورة
ghadat2009 كتب: صورة بس ده فيه كده هجوم شامل : قصة ... وشعر ...و مذكرات كوميدي ! اعلان :اجتماع طاريء لحزب البنات للرد السريع و المكثف !! صورة
صورة كويس إنك ماخدتيش بالك ياغادة إلا متأخر صورة ده لسه كمان فيه قصة كمان ورواية وقصيدة جايين فى السكة...عشان تبقوا تقولوا انسحاب و أحرار ونازيين ومماليك صورة
ثمة أسماء و ألقاب تبقى..بقاء الأرض..بقاء السماء..و بقاء الكلمات...
ثمة أشياء تتعلق حياتها بأماكنها..بتوابيت مغلقة تخشى الإبتعاد عنها...
رغم أن الحياة..قد تكمن فى هذا البعد...

.....

...:: و تبقى الكلمات ::...

...... صفحتى فى الأكاديمية ......
صورة العضو الرمزية
الأمير الحائر
مشرف قسم الروايات
مشاركات: 859
اشترك في: 31 أكتوبر 2008, 8:06 pm
Real Name: وليد توفيق
Favorite Quote: و تبقى الكلمات...
verification: ID verified and trusted writer

Re: جوه معمل الكيميا 2 ( مذكرات المهندس مشمش )

مشاركة بواسطة الأمير الحائر »

لارا كتب:صورةبجد تحفه ولذيذه خالص . بس عندى سؤال هو ممكن يحصل كده بجد ؟؟
الأول حمد الله عالسلامة يا لارا...صورة
كويس إنك سألتى السؤال ده...لأن هتستغربى بس أنا كنت بفكر أكتب فى أخر الجزء ده بالذات " حدث بالفعل " صورة
بجد نفس الموقف ده حصل فعلا معايا أنا.. و لقيت الورقة المستخبية دى وحليت منها فى ثوانى وأنا مش قادر أمسك نفسى من الضحك على الموقف كله والناس المحتاسة حواليا بالكيسةصورة لأن الإمتحان كان صعب فعلا ... وطلعت أول واحد فى اللجنة والكل فكرنى الدحيح بتاع الدفعة بس مخبى عشان الحسد صورة بس طبعا ما كانش فيه شوزى ولا حمادة صورة دول شخصيات اتخيلتها وزودتها للموقف..بس اتأثرت بشخصيات حقيقية فى وصفهم...لأن مثلا شخصية " المعيد الروش " دى ومعاكسة بنات الدفعة دى شفتها شخصيا كذا مرة...وهتستغربى لو قلتلك إنى شفت دكتور جامعى محترم بيعمل نفس الموقف ده كمان مع بنات كتير..وبالذات " السهوكة " اللى اتكلمت عليها صورة
بلاش كلام على الكليات أحسن يالارا...خلينى شايل فى قلبى منها وساكت صورة
بشكرك يا لارا وسعيد إنها عجبتك...ووحشتنا خواطرك صورةصورة
ثمة أسماء و ألقاب تبقى..بقاء الأرض..بقاء السماء..و بقاء الكلمات...
ثمة أشياء تتعلق حياتها بأماكنها..بتوابيت مغلقة تخشى الإبتعاد عنها...
رغم أن الحياة..قد تكمن فى هذا البعد...

.....

...:: و تبقى الكلمات ::...

...... صفحتى فى الأكاديمية ......
تنهيدة
مشرفة قسم أدب الأطفال
مشاركات: 1291
اشترك في: 04 نوفمبر 2008, 3:01 am
Real Name: نهاد نعمان
Favorite Quote: لوسرقت منا الأيام قلباً معطاء بسام لن نستسلم للآلام ...لن نستسلم للألام .....
verification: ID verified and trusted writer
مكان: بنت مصر

Re: جوه معمل الكيميا 2 ( مذكرات المهندس مشمش )

مشاركة بواسطة تنهيدة »

مأثره فيك أوى الهندسة ياوليد ...بس بصراحة المره ده مشمش متألق جدا ...وللأسف حينجح بس بالغش صورة....عجبنى أوى ياوليد أنك مستمر فى انتقاد أسلوب التعليم فى الكليات باأسلوبك الكوميدى الرائع ...بس لو مشمش سمع كلام سوزى كان دلوقت زمانة بيتفسح واخر روشنة صورةحقيقى انا بكون سعيدة أنك بتقدم الشكل الكوميدى بصورة هادفة بتحلم من خلاله بالتغير ..بحيك ياوليد على التلات أجزاء وطبعا مستنين الا بعده عشان نشوف مشمش حيعمل أيه تانى صورة
لازم فعلا ياغادة نقوى الصفوف ونستعد لان الهجوم باين علية شرس زى ماأنتى شايفة صورة
صورة
صورة العضو الرمزية
الأمير الحائر
مشرف قسم الروايات
مشاركات: 859
اشترك في: 31 أكتوبر 2008, 8:06 pm
Real Name: وليد توفيق
Favorite Quote: و تبقى الكلمات...
verification: ID verified and trusted writer

Re: جوه معمل الكيميا 2 ( مذكرات المهندس مشمش )

مشاركة بواسطة الأمير الحائر »

تنهيدة كتب:مأثره فيك أوى الهندسة ياوليد ...بس بصراحة المره ده مشمش متألق جدا ...وللأسف حينجح بس بالغش صورة....عجبنى أوى ياوليد أنك مستمر فى انتقاد أسلوب التعليم فى الكليات باأسلوبك الكوميدى الرائع ...بس لو مشمش سمع كلام سوزى كان دلوقت زمانة بيتفسح واخر روشنة صورةحقيقى انا بكون سعيدة أنك بتقدم الشكل الكوميدى بصورة هادفة بتحلم من خلاله بالتغير ..بحيك ياوليد على التلات أجزاء وطبعا مستنين الا بعده عشان نشوف مشمش حيعمل أيه تانى صورة
لازم فعلا ياغادة نقوى الصفوف ونستعد لان الهجوم باين علية شرس زى ماأنتى شايفة صورة
لازم طبعا تأثر فيا ياتنهيدة...هما سنتين شوية صورة
وبالنسبة لمشمش ففعلا هينجح بإمتياز ودى هتبقى قضية الجزء الجاى صورة وشوزى هى اللى هتسقط صورة
بجد سعيد إنك واصلة للفكرة من إنتقاد أسلوب التعليم...ويارب فعلا حاجة تتغير على الأقل لو مش لينا يبقى أخواتنا الصغيرين...
بالنسبة للهجوم والإستعداد فأكيد...أنتو افتكرتوا الإستسلام بالساهل كده صورة
وبشكرك جدا يانهاد على رأيك..صورة
ثمة أسماء و ألقاب تبقى..بقاء الأرض..بقاء السماء..و بقاء الكلمات...
ثمة أشياء تتعلق حياتها بأماكنها..بتوابيت مغلقة تخشى الإبتعاد عنها...
رغم أن الحياة..قد تكمن فى هذا البعد...

.....

...:: و تبقى الكلمات ::...

...... صفحتى فى الأكاديمية ......
صورة العضو الرمزية
walaa mohamed
أكاديمى نشيط
أكاديمى نشيط
مشاركات: 146
اشترك في: 08 فبراير 2009, 2:45 am
Favorite Quote: و من يتق الله يجعل له مخرجا و يرزقه من حيث لا يحتسب.
مكان: مصر

Re: جوه معمل الكيميا 2 ( مذكرات المهندس مشمش )

مشاركة بواسطة walaa mohamed »

:lol: :lol:
أسلوبك كوميدى رائع حقيقى
يعنى بغض النظر انك قلبت عليا المواجع..الموضوع جميل جدا
بس أول مرة أعرف ياوليد ات اعدادى هندسة بيشتغلوا اللسكيم والهبل ده زى عندنا ف علوم
المشكلة فعلا ان الواحد يدخل كلية على أساس حاجة معينة ويفاجأ بمواد مالهاش علاقة بالموضوع خالص
هو موضوع التعليم ده موضوع كبير وبصراحة محتاج يحصل فيه عندنا انقلاب جذرى كامل متكامل di1
ننتظر باقى الحلقات ok11
يا مقلب القلوب..ثبت قلبى على دينك


صورة
صورة العضو الرمزية
سندريلا
مشرفة قسم الخواطر
مشاركات: 795
اشترك في: 28 إبريل 2009, 8:51 pm
Real Name: جيهان راضي
Favorite Quote: المرأة عاشت ألوف السنين مثل مرآة تعكس صورة للرجل أكبر و أجمل من الحقيقة !
verification: ID verified and trusted writer
مكان: my own world
اتصال:

Re: جوه معمل الكيميا 2 ( مذكرات المهندس مشمش )

مشاركة بواسطة سندريلا »

من غشنا فليس منا ههههههه
برافو بجد يا وليد تكملة رائعة للأجزاء السابقة وضحت لنا فيها هدفك أكثر و أكثر ... انتقدت العديد من الأساليب المستخدمة بنظام التعليم المصري ... و بالرغم من حديثك و سردك لأحداث تتم بالجامعة إلا أننا نستطيع أن ننقد نظم تعليم سابقة للمرحلة الجامعية خاصة مرحلة الثانوية العامة و هذا واضح بين سطور الحوار بين الشخصيات ...
أحييك يا وليد و أتمنى أن تعود قريبا لتكمل لنا هذه السلسلة الرائعة بإذن الله ...
مع تمنياتي بدوام التوفيق ... :)
أضف رد جديد

العودة إلى ”مذكرات كوميدية“