Re: لا إستسلام .... اقتراح لعدم الغاء المسابقة
روح قتالية هايلة ... و أسلوب حماسي جميل جدا
طبعا كلمة : الغاء محبطة جدا و تشاؤمية فعلا ، بس واضح انها كانت بسبب الضغوط و الإحساس بالمسؤولية ، و الأفضل كتير كلمة ( تأجيل )
و المسابقة فعلا بتمثل عامل جذب و حركة في الأعضاء و المواضيع ، و بتلعب دور في تطوير أساليب الأعضاء و دفعهم للأفضل و الله أعلم
و بالنسبة لاقتراحك اللي انت كنت منظم جدا في عرضه ، فهو في نقطتين :
الأولى : باعترض عليها تماماً ! لأن التصويت أكيد هيبقى فيه مجاملات و قراءات انطباعية يعني مالهاش علاقة تقريبا بالتقييم الأدبي و أعتقد ده مش هيبقى مفيد للكاتب نفسه.
لكن أنا كنت باحاول أدعو أساتذة و بعض الكتّاب و أعتقد بس انهم بيتخوّفوا من المسؤولية و الالتزام الشهري ، لكن أتمنى كلنا نحاول تاني و لما يزيد العدد أعتقد العبء هيقل إن شاء الله ( يعني ممكن يكون فيه جدول لتنظيم تقييمهم للأعمال بشكل مريح إن شاء الله )
الثانية : فكرة النشر هايلة جدا ، بس بدل الجريدة إيه رأيك : يكون طباعة مجموعة قصصية أو إبداعية أو روايات للفائزين أو المتميزين كل فترة معينة يعني بشكل دوري، و بدل ما تكون الجايزة مالية تكون بالنشر + التوزيع و الإعلان عن الكتب دي ، و ده في حد ذاته هيكون مكافأة جميلة جداً و عامل محفّز على الإبداع
و ممكن حاجة كمان : يكون فيه إصدار موسمي خاص بالأكاديمية ، يعني مجلة مثلاً ؛ الكترونية ... أو حتى مطبوعة .
يعني الجايزة تكون عبارة عن نشر جماعي دوري لإبداعات كتّاب الأكاديمية .
في النهاية : باشكرك بجد يا أحمد على الروح الجميلة دي
و أعتقد في جميع الأحوال ممكن يكون فيه نوع من الإستراحة و إعادة شحن الهمم للجميع ، و إن شاء الله ما فيش استسلام
