معقول هى دى مصر ؟؟؟؟؟؟؟

لمناقشة مشاكل مصر المعاصرة ومحاولة إيجاد حلول عملية لها, بطريقة موضوعية بعيدا عن الإساءة لبلدنا وشعبها.

المشرفون: محمد محمود،المهاجر

أضف رد جديد
صورة العضو الرمزية
قلب حزين
مشرفة قسم المناقشات
مشاركات: 77
اشترك في: 31 أكتوبر 2008, 8:42 pm
Favorite Quote: الحب هى النار الوحيدة التى تحب أن تحرق منها!
مكان: مصر

معقول هى دى مصر ؟؟؟؟؟؟؟

مشاركة بواسطة قلب حزين »

صورة
معقول هى دى مصر؟؟؟ والله العظيم أنا مصدومة ومش مصدقة لحد دلوقتى! مين دول.......؟!
الحكاية ياجماعة انى وقعت لحظى الوحش وأنا بعمل بحث على النت فى مدونة من المدونات الكتير اللى بيسموها سياسية مع انها تهويلية وتستحق المصادرة لأنهم أعداء مصر الحقيقين!
ولقيت فى المدونة دى موضوع من وسط المواضيع الكتير اللى بتتكلم بكل وقاحة وأسلوب ولا أدبى ولا أصلا عامى محترم حتى! كله شتائم فى شتائم كأنهم مابيعرفوش غير لغة الشتايم, واللى هى اللغة السائدة فى المدونات دى! لقيت موضوع بعنوان ( يوم سقوط الصنم ) بتاريخ شهر أبريل اللى فات.... مع فيديو كامل مارضتش أعرضه هنا لوقاحته ولأنه بكانى شخصيا.... فيديو للناس المتجمهرة دى فى مدينة المحلة ( اللى المفترض مصرية ) وهما بيهتفو هتافات غاية فى الوقاحة وقلة الأدب على الرئيس والحكومة وكل حاجة فى البلد اصلا! وهما بيخبطو الإعلان الكبير لصورة الرئيس فى مشهد فكرنى بمشهد سقوط تمثال صدام حسين لما أميريكا دخلت العراق وكان سقوط التمثال ده معناه اليم جدا وهو سقوط دولة بحالها فى الإحتلال....
احنا بقى؟ والناس اللى أنتو شايفينهم فى الصورة واللى شفتهم فى الفيديو مابين أطفال وشباب حد قادهم اكيد وحركهم لحبة ( شقاوة ) وبحماس الشباب وكمان الأطفال عملو مظاهرة وتجمع كبير جدا وبيهتفو بالتحرير! زى مانكون فى وطن محتل, وبيوقعو تمثال الرئيس, وياسلام لما وقع, هتافات والله اكبر وتحيا العدل ولعب عيال ومنظر مؤسف وكأنك بتتفرج على فيلم كوميدى وتراجيدى مأساوى فى نفس الوقت, الله أكبر عشان وقعوا صورة محمد حسنى مبارك؟؟؟؟ رئيس جمهورية مصر العربية؟؟؟؟؟
مبارك اللى فى يوم كان قائد فى مقاتلة جوية وبيحارب عشان يحرر مصر من احتلال اسرائيل!
مبارك اللى عمر وطور وشال انقاض الحرب والخراب عن بلد كانت دايما ذليلة احتلال من كل الجنسيات على مدى الزمن!
مبارك اللى خلى صحة الأطفال شغله الشاغل وتطعيمهم حاجة أساسية وخطيرة بعد أما أطفال الريف وكمان المدينة كانو بيصابو بشلل الأطفال ولا الملاريا أو الحصبة!
مبارك اللى فى عهده قربت الأمية تنمحى من مصر بنسبة 100 % وبقى كله بيعرف يكتب ويقرا ويشارك برأى سياسى بطريقة محترمة!
مبارك اللى طور نظام الإتصالات فى مصر فى زمن قياسى خلى العالم كله من شرقه لغربه وخبراء الأتصالات فى العالم كله يوصفو ده بالمعجزة!
مبارك اللى علم كل واحد من اللى بيكسرو صورته ويدوسو عليها بالرجلين ازاى يكتب ويقرا !
مبارك اللى من غيره ماكنتش أنا ولا أنتو قاعدين على النت دلوقتى! ولا كان اللى بيشتموه فى المدونات هيعرفو يعنى ايه نت ولا ايه تكنولوجيا وكانو فضلو جهلة متأخرين زى العصور الوسطى لسه بيبتعو رسايل بالبوستة ولا الحمام!
مبارك.....طب أقول ايه ولا ايه...يمكن انا اللى منافقة طيب؟؟؟...لأ خلاص كل الكلام الحلو خلص....وخلاص نسينا بقى اللى اتعمل ده كله...نقوم بكل نكران جميل وكعادتنا الجميلة نتلكك......ونطلع الغلطات بس...كان أحسن اننا نبقى لحد دلوقتى فى جهل ومتأخرين عن العالم؟ لأ ازاى طبعا احسن...ونكسر بقى وندمر ونوقع صور ونحرق عربيات ومحلات ناس بتاكل منها عيش زى ماحصل فى خلفية الأحداث دى فى المحلة!
هو ده رد الجميل؟؟؟ وهو ده حب مصر؟؟؟
هى دى مصر؟؟؟؟ ما أعتقدش......
أنا أول ماشوفت الموضوع ده فكرت فى الأكاديمية هنا وفى قسم ( هى دى مصر ) بالذات.....لأنى عارفة انكو بتحبو مصر بجد مش بس كلام وكتابتكو بتقول كده....و من يوم ما عرفت الموقع ده وأنا عرفت ان فيه شباب لسه بيحبو مصر مهما حصل....وفاهمين الفرق بين الرأى....وبين قلة الأدب ونكران الجميل والتخريب والدمار.....
مش عارفة أقولكو أسمع رأيكوا...ولا أسمع أسفكوا.....
مريم
تم تعديل بعض الكلمات وحذف بعض الكلمات فى أول الموضوع من قبل الإدارة.
مريم, كما نذكر دائما استخدمى الفصحى عندما تريدى التعبير عن موضوع حساس كهذا الموضوع. ومادمتى فضلتى اللغة العامية فراجعى موضوعك جيدا لضمان خلوه من أى إساءة تتعدى حرية الرأى. رغم اتفاقنا الكامل على هدف موضوعك, ولكن الطريقة هى الفاصل.
إدارة الأكاديمية.
صورة
لو ماقدرتش تضحك ماتدمعش وماتبكيش وان مافضلش معاك غير قلبك مش هتموت هتعيش
صورة العضو الرمزية
المهاجر
مشرف قسم المقالات و النقد الفنى
مشاركات: 779
اشترك في: 04 نوفمبر 2008, 4:48 pm
Real Name: أحمد جمال الدين أحمد
Favorite Quote: دائما إفعل ما تحب ان يراك الناس عليه
دائماً لا تفعل ما يحب الناس ان يروك عليه
verification: ID verified and trusted writer
مكان: مصر
اتصال:

Re: معقول هى دى مصر ؟؟؟؟؟؟؟

مشاركة بواسطة المهاجر »

حمد الله على السلامة يا مريم اسف ولكنى هقول انى مش معاك فى كل الكلام هو صحيح ان محمد حسنى مبارك رمز مصر لا يصح ان يفعل بصورته هذا دى الحاجة اللى انا معاك فيها ومعاك كمان ان هو صاحب الانجازات ولكن انا لولا انى خايف ان حد يقول عنى ارهابى او معارضة كنت قولت كلام كبير يا مريم


تقدرى تقوليلى المواطن البسيط فى الشارع يعرف ايه عن النت ولا الكمبيوتر تعرفى تقوليلى المواطن فى الشارع لو سألتيه عن الحكومة هيقولك
يا بنتى الزيت بقى ب 15 جنيه - الشاى اللى كان باربعين قرش بقى بجنيه - الرز بقى ب 3 جنيه - والطماطم اللى كانت ببريزة دلوقتى باتنين جنيه


عفوا...... مريم .......... إننا نعانى ولم نذق طعم التقدم بعد




تم حذف ماكتب فى منتصف المشاركة.
أحمد قل رأيك لكن بأسلوب مهذب, وبالفصحى إذا كنت ستتطرق لنقد حساس مثل ماقلت, لانريد أن يتحول موقعنا إلى حوار دارج مثل عالم المدونات التى تتحدث عنه مريم, قل رأيك لكن هناك حدود لكل مكان تكتب فيه.

إدارة الأكاديمية
صورة العضو الرمزية
الأمير الحائر
مشرف قسم الروايات
مشاركات: 859
اشترك في: 31 أكتوبر 2008, 8:06 pm
Real Name: وليد توفيق
Favorite Quote: و تبقى الكلمات...
verification: ID verified and trusted writer

Re: معقول هى دى مصر ؟؟؟؟؟؟؟

مشاركة بواسطة الأمير الحائر »

موضوع حساس جدا يامريم...وهو موضوع قديم بس مافيش حد طبعا ينكر خطورته....بس زى ماقالت الإدارة فى ردها عليكى...خدى بالك من الأسلوب...انا قريت أول الموضوع قبل التعديل من الإدارة وشايف انه اسلوبه كان عامى أوى وبطريقة مش مناسبة حتى لو بتكلمى على اعداء مصر الحقيقين زى ماوصفتيهم...
بالنسبة لأحمد أنا ماشوفتش ردك قبل التعديل بس بصراحة يا أحمد أنت بتسرح ومابتخدش بالك من ردودك...بس عشان خاطرنا كلنا حتى لو هتقول رأى معارض يبقى عام ومايجرحش حد...بغض النظر عن اختلافى أو اتفاقى على رأيك...
نيجى بقى لرأيى فى الموضوع...أنا مع مريم فى حاجات ومختلف معاها فى حاجات...نبدأ بالأختلاف...الرأى ماينفعش يتصادر طالما فى حدود الأدب وبأسلوب مهذب...يبقى صاحبه مايستاهلش ( الإعتقال ) زى تعليقك اللى اتحذف...مادام الرأى فى حدود الذوق والأدب وبأسلوب مهذب وواضح من غير شتائم ولاتجريح ولا اساءة لشخصية أو رمز معين...
بالنسبة بقى للإتفاق واللى بيرتبط جزئيا بالإختلاف اللى كتبته...أنا بتفق معاكى فى كل حاجة قولتيها عن المدونين خاصة...لأنى شخصيا أعرف مدونات كتيرة جدا زيك كده وقعنى الحظ فيها...فحبيت انى اعرفها اكتر...وبجد لقيت عالم اسود بمعنى الكلمة...كله شتائم...ازدراء أديان...لأن أغلب أصحاب المدونات السياسية لا دينيين...وبيستحلو لنفسهم السب والقذف بدعوى الحرية فى المساحة اللى ليهم على الأنترنت...اللى زى ما أنتى بالظبط قلتى...عمرها ما كنا هنعرف ناخد المساحة دى ولانعرف يعنى ايه انترنت من غير تطوير كبير واضافة لكلامك مصر فى احصائيات كتير عالمية كانت من أكبر الدول اللى تطورت فى مجال التكنولجيا والأنترنت وده كان معجزة زى ماوصفتى...نيجى احنا بقى نستخدم التكنولوجيا دى ومساحة الحرية الخاصة بينا عشان نهين بلدنا؟ يبقى أقصى نكران للجميل ...
بالنسبة بقى يامريم للشباب والأطفال اللى فى الصورة...أنا عارف تاريخ الصورة دى تحديدا وزعلتنى فى حينها زى مازعلتك دلوقتى...الصورة دى ترجع لأحداث السادس من أبريل...لو فاكرة كان يوم كارثة...اختصارا كانت خطة اليوم ده اضراب عام! لكل مصر...مافيش حد يروح شغل...مافيش طالب ينزل جامعة...مافيش اى حد من انصار الاضراب يروح يأدى عمله وكل اللى هينزل ينزل بس عشان يعمل اعتصام ومظاهرة فى الشوارع.. احتجاجا على حاجة اكيد هما مش عارفنها! لأن كل اللى كان بيحرك الموضوع ده كان أشباح المدونات اللى اتكلمتى عنها..بالتعاون طبعا مع جماعات وحركات تانية مافيش داعى أذكر اسمها عشان ما أخالفش قانون الأكاديمية...وفعلا الحركات دى أثرت على قطاع كبير من مستخدمى الأنترنت تحديدا وبالتالى المحيطين بيهم...يعنى كل واحد كان بياخد عيلته وأطفاله ويشحططهم معاه فى مظاهرة! وبالتالى ايه اللى حصل؟ الناس اصلا اللى مالهمش أى علاقة بالمظاهرة والإضراب خافو ينزلو شغلهم بعد ما انتشرت أخبار الإضراب...وبالتالى يومها مافيش ولا دكتور جه ادى محاضرته عندنا فى الجامعة وفى كذا جامعة وطبعا نسبة كبيرة من الطلاب زمايلى! وأخويا الصغير اللى فى مدرسة ابتدائى قاللى يومها انه حتى فى المدرسة كان فيه 3 بس غيره فى الفصل! يعنى خلو مصر كلها فعلا تعتصم غصب عنها! بس مش احتجاجا...لأ خوفا من المحتجين! اللى حرقو وكسرو فى المحلة زى مالصورة توضح وزى ماقلتى يامريم سيارات بتتكسر ومنشأت بتتحرق ومحلات بسيطة أو كبيرة بتتدمر...كل ده ليه؟؟ احتجاج؟ لأ طبعا..لعب عيال زى ما أنتى وصفتى يامريم...بس الفرق انه لعب شياطين خفية بتحرك الناس دى...
الحاجة اللى بتذهلنى على النت بالذات وبوجه عام...لما الاقى حد مصرى بيغلط فى مصر وناسها...ولما يلاقى حد من بره مصر ييجى يغلط فيها أو فى رمز من رموزها يتنرفز ويجادل ويرفض...مع انه هو نفسه كان السبب فى الإسائة لسمعة مصر على الأنترنت وفى كل مكان برأيه...
تلاكيك...عجبنى تعبيرك البسيط ده يامريم لأنه رغم بساطته بيعبر عن حاجة مهمة أوى...نضرب مثال بأى شعب فى العالم...لما حصلت الأزمة المالية واللى لسه مستمرة...وبقى أغنى شعب فى العالم بيرشد الإنفاق! ساعتها حد اعترض؟ عملو مظاهرات وخربوا وكسروا؟ لأ ولاحاجة من دى...لأنهم مش بيتلككوا...ايوة جميل ان احنا عايزين بلدنا تبقى احسن...بس مافيش حد كامل..ولابلد مافيهاش مشاكل...احنا بس اللى بنمسك فى مشاكلنا وبنكبرها وتيجى ناس تانية خارجة علينا تهول المشاكل دى وتخليها أزمة...ويبتدى التخريب بدعوى حل الأزمة!
نهاية...عايز أقول أيوة البلد فيها مشاكل...أيوة فيه غلطات فى الإدارة بوجه عام وإهمال جسيم...بس أكيد الإدارة دى مش واحد بس...لأ دول ناس كتير أوى وكل واحد ممكن تبقاله أخطائه الخاصة بيه واللى بتأثر على باقى الإدارة...لكن مش عشان نصلح الإدارة نكسر ونخرب أو نقول رأينا بقلة أدب زى المدونات...
وهذا رأيى...
وبشكرك يامريم على موضوعك اللى حتى لو متأخر..مهم وخطير...لأنه بيمس سمعة مصر ورئيسها اللى مهما حصل بنعتز بيه وبنحترمه ولو حد نقده ( بأدب واحترام ) فده لأنه بيحبه...هأستعير كلمة محمد ( ابن مصر ) واللى المفترض يبقى شعارنا كلنا فى نقاشنا لمشاكل مصر الحساسة
" مش بتكلم عليها عشان مش بحبها...بالعكس انا نفسى تبقى احسن "
ثمة أسماء و ألقاب تبقى..بقاء الأرض..بقاء السماء..و بقاء الكلمات...
ثمة أشياء تتعلق حياتها بأماكنها..بتوابيت مغلقة تخشى الإبتعاد عنها...
رغم أن الحياة..قد تكمن فى هذا البعد...

.....

...:: و تبقى الكلمات ::...

...... صفحتى فى الأكاديمية ......
صورة العضو الرمزية
ابن مصر
أكاديمى نشيط
أكاديمى نشيط
مشاركات: 261
اشترك في: 04 نوفمبر 2008, 2:47 pm

Re: معقول هى دى مصر ؟؟؟؟؟؟؟

مشاركة بواسطة ابن مصر »

انا اسف على الحزف يا احمد و بصراحة ان الادمين هو الى حزف و بصراحة انا مش عارف انتا كنت كاتب ايه لان النت كان مفصول عنى بقاله يومين بس انا راى فى الموضوع ده ان طبيعة الشعب المصرى طيب بيحب بسرعة و بيكره بسرعة و ده كان السبب فى الى عمله هو صحيح عمل غير حضارى بس الشعب الطيب لما وجد نفسه فى ضيقة فغضب فاخرج غضبه بهذه الطريقة و هى بصراحة طريقة غير متحضرة اما بالنسبة لسيادة الرئيس.. فكل الى اقدر اقوله ان لكل انسان هفوة ولا نستطيع ان ننكر ما فعله لمصر و اعتقد ان الشعب مسئول الى جانب الحكومة عن كل الى بيحصل لمصر ده راى و لولا اختلاف الاراء لبارت السلع
ابن مصر
على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
----------------------------------------
يالا يا مصرى نشترى المنتج المصرى
--------------------------------

صورة
صورة العضو الرمزية
المهاجر
مشرف قسم المقالات و النقد الفنى
مشاركات: 779
اشترك في: 04 نوفمبر 2008, 4:48 pm
Real Name: أحمد جمال الدين أحمد
Favorite Quote: دائما إفعل ما تحب ان يراك الناس عليه
دائماً لا تفعل ما يحب الناس ان يروك عليه
verification: ID verified and trusted writer
مكان: مصر
اتصال:

Re: معقول هى دى مصر ؟؟؟؟؟؟؟

مشاركة بواسطة المهاجر »

والله انا مش شايف انى قولت حاجة مش مهذبة او فيها شئ من عدم الزوق وقلةا لادب بس لو الادارة شايفة كدا اناا سف انا كل اللى قولته انه بشر وزى كل البشر ما ليهم انجازات ليهم حاجات تانية وعبرت بكلمة ( مصايب ) ولا ايه اللى قولته انا
صورة العضو الرمزية
محمد محمود
مشرف قسم الأشعار
مشاركات: 1070
اشترك في: 06 نوفمبر 2008, 4:40 pm
Real Name: محمد محمود حسن
Favorite Quote: إلهــــي لا تعذبني فإني
مقر ٌ بالذي قد كان مني
verification: ID verified and trusted writer
مكان: الإسكندرية
اتصال:

Re: معقول هى دى مصر ؟؟؟؟؟؟؟

مشاركة بواسطة محمد محمود »

نحن كشعب عربي لا يعرف معظمنا أدب الخلاف لذلك لا يجب أن نطالب بديمقراطية أكثر لأننا سنتحول إلى من ضرب بالرصاص أصابع قدميه
فلماذا لا نختلف ويظل يحترم كل منا الآخر؟
أتذكر يوم تعرض مبارك لمحاولة أديس بابا بكى الشعب كله معارضيه قبل مؤيديه ، وهذا ما نريده أن نختلف مع بعضنا دون أن نسيء إلى رمز وطني أصبح يعرف بمصر وتعرف مصر به قد نختلف معه ولكن نقدره ولا نتحمل له أدنى إهانة وهذا هو قمة الديمقراطية أن نمارسها ونحافظ على أدبها .ِ
تواضع تكن كالبدر لاح لناظر ٍ على صفحات الماء وهو رفيع ُ
ولا تك كالدخان يعلو بنفســه إلى طبقات الجو وهو وضيـــع ُ

صورة


صفحتي الشخصية
صورة العضو الرمزية
قلب حزين
مشرفة قسم المناقشات
مشاركات: 77
اشترك في: 31 أكتوبر 2008, 8:42 pm
Favorite Quote: الحب هى النار الوحيدة التى تحب أن تحرق منها!
مكان: مصر

Re: معقول هى دى مصر ؟؟؟؟؟؟؟

مشاركة بواسطة قلب حزين »

أنا أسفة فعلا لأنى كنت مضايقة شوية بعد ماشفت الصورة والفيديو وعشان كده أول الموضوع فعلا كان over اوى وبجد انا اسفة
وأحمد شكرا على ذوقك ومعلش اذا كنت غايبة بس بيبقى فيه ظروف بس والله دايما الاكاديمية كلها على بالى.....وبالنسبة لتعليقك التانى على ردك اللى ماشوفتهوش.....انت بتقول كتبت كلمة مصايب....متهيألى مثلا لو كانت هفوات هتبقى أفضل؟ أعتقد ده قصد الإدارة بكلمة فصحى....لأن بردو انا كلامى اللى فى الأول اللى اتحذف عشان ماخدتش بالى, كان عامى جدا فعشان كده ماكنش مقبول
زى مابيقولو يا أحمد اختلاف الرأى لايفسد للود قضية وأكيد زى ماالكل قال فى ردودهم فيه مشاكل كتير بس زى ما انت نفسك قلت فى ردك.....ده رمز مصر وماينفعش ان احنا نهينه بالشكل ده, فيه اسلوب تعبير محترم....فيه أعمال أدبية ممكن نتكلم فيها عن مشاكلنا زى ماكل اللى فى الاكاديمية بيكتبوا انما يبقى التكسير والتخريب وسيلة للإعتراض؟ طبعا لأ

بشكر كل اللى كتبو ارائهم اللى بحترمها جدا ويارب الصورة السيئة دى عن بلدنا ماتحصلش تانى ابدا لأنها حاجة تزعلنا كلنا لأن رئيسنا مهما حصل هيفضل رمزنا اللى بنحترمه وزى ماقلت يامحمد لو حاجة مسته كلنا بنزعل معارضين أو مؤيدين.....ويارب مصر تتطور دايما بس من غير اعتراض بتخريب وتدمير عشان نشوف بلدنا احلى
صورة
لو ماقدرتش تضحك ماتدمعش وماتبكيش وان مافضلش معاك غير قلبك مش هتموت هتعيش
أضف رد جديد

العودة إلى ”هى دى مصر؟“