الزميل العزيز كابو .... اثناء مروري بهذا الموضوع لاحظت أن معظم الردود، ان لم تكن جميعها، من زميلات فضليات اناث ولم يرد رد رجل واحد ... انا رأيي أن الحال يختلف كثيرا من بنت لولد .. اما عن البنات فمن الصعب جدا جدا ومن القسوة أن تتعلق بنوتة بشاب وتعلق عليه أمال حياتها ومستقبلها ثم تفاجأ به يتزوج غيرها .. خاصة في مجتمعاتنا المنغلقة والتي تحكمها عادات وتقاليد مهما حاولنا التملص منها فهي باقية و راسخة ... فهي تعد بالنسبة لفتاة مأساة مصدمة ليس لها وصف ....أما عن الأولاد ... وده بقي موضوعنا ... تعالي نتكلم بصراحة ... واسمع مني كلام مصقول بخبرة سنوات من العمر وليست مجرد نظريات ... لو البنت دي عاجباني أوي كده وشايف انها فتاة أحلامي ما اتقمتش ليه وطلبتها للجواز؟... صبرك عليا .. ما تستعجلش في الرد ... هاتقولي يمكن مش جاهز ؟... وهيه وعدتك تستناك ... طيب المسكينة دي جالها الشخص المناسب .. واللي شافه أهلها انه مناسب ... تستني حضرتك أو حضرتي بمناسبة ايه ؟.. ولحد امتي ؟ .. وازاي ؟... وبعدين هيه هاتضحي عشاني ؟!... أنا عملت ايه عشان ادافع عن حبي ليها ؟ ... مانا برضه لسه صغير .. وأهلي مش هايفهموا أحساسيسي ومشاعري ... خلاص .. اكيد انا كنت شايف فيها زوجة صالحة ..وأم مثالية لأولادي في المستقبل، لكن ارادة ربنا انها مش من نصيبي وراحت لنصيبها .. ربنا يوفقها في حياتها الجديدة ويرزقني بالزوجة الصالحة لما ييجي الوقت المناسب .. يبقي خسرت زوجة وحبيبة ، لكن ما خسرتش صديقة عزيزة... انا عن نفسي حضرت فرحها ورحت باركتلها في بيت الزوجية وخدت معايا هدية متواضعة ... وروحت كتبت قصيدة سميتها ( سحابة معدية) ... هاكتبها دلوقي حالا في قسم اشعار بالعامية ... شكرا علي الموضوع الجميل والهام ده.
السيد فهيم

CaPo NiGht PrinCe

الضربة اللي ما تموتش بتقوي ................. و احب اقول لك انه حقيقي
اه حتزعل جدا و حتحس ان عمرك راح و انك ضيعت كتير من وقتك مع حد مش مستاهلك .... بس صدقني الحياة مش بتقف على حد لازم نقف على رجلينا تاني ,ونتعلم ان الاختيار السيء ضياع ........

اسوأ حاجة بجد انك تحلم وتصدق احلامك وتفوق منها كانها كابوس
تصحي علي وجع ووحدة وخوف

انا اتخانت
حبيت جدا وطلع كداب وخاين واكتشفت ان صحابنا كلهم عارفين وخايفين يقولولي عشان عارفين بحبه اد ايه وكمان عارفين اني هكدبهم واصدقه هو
كنت ليه حبيبة وام وصديقة وكل حاجة وطلع فعلا مايستاهلش
انا ماانكسرتش غير شهر وبعده كنت اشتغلت وطلعت همي في شغلي ربنا كرمني بعده وعرفت ان القدر مخبي دايما جديد واتقدملي ناس كتيييييييييير افضل منه بمراحل ودلوقتي انا اللي بتشرط وبختار.

لكن اعتقد ان لو وقاحته خلته يعزمني علي فرحه في يوم من الايام مش هروح بس هبعت بوكيه ورد في جواب صغير اوى للعروسة واخليه خاص او محدش يقراه غيرها
يااما في الفرح يااما في شقة الزوجية
وهكتب جملة واحدة
تعازينا القلبية في ماضي نقي سيدنس بزوج بارع في الخيانة والهروب
قلبي معاكي يامظلومة يامسكينة

امضاء ناس حسين بيكي وخايفين عليكي
و طبعا هي حاجة من الاتنين ياهتقوله ويتخانقوا ويبقي في نكد في اول يوم يااما هتبقي عاقلة وتخزن وفي الحالتين ابقي علمت في حياته من بعيد زي ماكنت معلمة فيها اوى من قريب

ارجو محدش يفهمني غلط بس دي الحاجة الوحيدة اللي ممكن تريحني اني اتخيل موقف زي دا لكن تنفيذه مااعتقدش اعتقد اني هوكل فيه حاكم عادل وهحسبن واسيب ربنا يردلي حقي بطريقته اللي اكيد هترضيني

بص ياكابو كان فيه واحده صاحبتى زمان تقوللى ايه بالنسبه لاى علاقه انتهت باساءة يروح كلب ييجى ميت كلب
انا طبعا مش معاها ف النظريه دى بس ببقى مقدرة احاسيسها وانفعالاتها بعد الصدمه اللى ميستهلش حبى ميستهلش وصالى بعديها والله ياعمرو انا شفت مآسى ف الموضوع دا بالذات كام بنت تروح فرح حبيبها وتتعامل اما بشكل هستيرى وترقص وتضحك كان مش هممها وهى طبعا بتتقطع مستفدتش غير شفقه اللى حواليها يااما تروح ناويه تبوظ الموضوع ويعتبروها مجنونه يااما تروح تشوف الحب والفرح ف عيونهم وترجع مكسورة الجرح لسه جديد فالاحسن متروحش وادام اخد الطرف المجروح قرار البعد يصر عليه ويبدا من ساعه الدعوة وميتمحكش باى حجه تخليه يفقد احترامه لنفسه ولو لثانيه ادام حبيب ميستهلش بس الاختلاف بينى وبينك ليه دعوة خطوبه كدة الباب بيبقى موارب للرجوع ياريته زفاف عشان الاحساس بالامل الكداب صعب قوى قوى