صفحة 1 من 1

ازاى حتعبر لو حبيت

مرسل: 07 ديسمبر 2008, 1:54 am
بواسطة تنهيدة
كل سنة والأكاديمية وكل أعضاءها طيبين وبقدم لكل عضو فيكم أاحلى وردهصورةده اولا
و ثانيا كنت عايزه ققولكم شوية كلام فى الحب طبعا كل واحد فينا أكيد حب او أتحب أو نفسه يحب وكل واحد فينا شخصيتة مختلفة عن التانى وطريقة تعبيرة عن الحب مختلفة وكمان استقباله للحب أكيد مختلف فكنت عايزة اسأل شوية أسئلة للبنات وكمان الولاد
لو انتى حبيتى شخص وحاسة ان هو كمان بيحبك لكن هو لسة مصرحلكيش بحبه ممكن انتى تروحى وتصرحى ليه انك بتحبية ؟ولو مش حتعملى كده ايه الا ممكن تعمليه عشان تعبر ليه عن حبك ؟ ولو شخص جه قالك انو بيحبك وانتى مش بتحبيه ازاى حتتعاملى مع الموقف.. ده اسئلة البنات
اما الولاد :لو حبيت ايه الاممكن تعمله عشان تعبر عن حبك ؟ولو بنت جات صرحت ليك انها بتحبك ايه حيكون رايك فيها وازاى حتتعامل مع الموقف؟ ولو مكنتش بتحبها ازاى حتقولهاده؟
ده طبعا مواقف كلنا اتعرضنا ليه ياريت الأعضاء يشاركونا بأرائهم صورة

Re: ازاى حتعبر لو حبيت

مرسل: 07 ديسمبر 2008, 2:10 pm
بواسطة الأمير الحائر
وأنت طيبة ياتنهيدة وشكرا على أحلى وردة...وليكى أنتى صورةصورةصورة
بالنسبة لموضوعك وسؤالك فهو سؤال صعب..سواء لولاد أو بنات...مش عشان مبدأ مين اللى يقول بحبك الأول...بس عشان اختلافنا على معنى الحب نفسه اللى كتبت عنه قبل كده...
أنا هأجاوب على الجزء الخاص بسؤالك للرجال...
لو حبيت واحدة...هأصارحها بحبى فورا...بس حطى خط تحت كلمة حبيت دى...لأنى بالنسبالى شخصيا معناها كبير أوى ومش فى لحظة كده ممكن أقول أنا حبيت حد...لأن الإعجاب والتعود حاجة والحب الحقيقى حاجة...وعشان كده أنا بفكر كتير جدا لو اتعلقت بحد هل ده إعجاب ولا حب لأن الإعجاب بشخص هيبقى عامل زى حد بيعجبه شكل المطر...بس لما الدنيا مش بتمطر هيزعل؟ أو هيوحشه المطر...؟ لأ طبعا بس هيستنى لو الدنيا مطرت تانى عشان يشوف المطر اللى بيعجبه...يبقى ده حد معجب بالمطر...مش بيحبه...
ممكن تطبقى المثال ده بقى على الحب...فيه إعجاب ببريق إنسان...بشخصيته...بكلامه...بشكله...بأى صفة مميزة فيه...البريق ده والصفة دى ممكن تضيع مع الوقت لأى سبب من الأسباب...وبالتالى الإعجاب بيروح...واللى كان فاكر انه بيحب حد عشان إعجابه بالصفة دى بيلاقى حبه راح وتبتدى المشاكل والصدمات...
وعلى فكرة مشكلتنا هنا فى مصر وفى الطبع الشرقى عموما ان احنا بنخلط بين الإعجاب السببى واللحظى ده ومابين الحب...وده اللى بيخلى علاقات كتير تتبنى من غير أساس وتنتهى بالفشل...
انما الحب الحقيقى بيبقى تركيبة كبيرة...كيمياء سحرية زى مابيقولوا...يعنى حد اتعامل مع حد...شاف شخصيته وأبعادها كاملة بعيد عن أى صفات ممكن تتغير...شاف مشاعره وإحساسه وأحلامه وطموحه...شاف نظرته للحب وللإرتباط...حس بمشاعر وأحاسيس حقيقية ليه..كل ده لازم يكون فى الذهن لما حد يقول بحبك....
أما بالنسبة للسؤال التانى لو بنت قالتلى بحبك مثلا...أولا رأيى فيها هيكون كل احترام ليها ولمشاعرها...لأن اللى بيسخر من مشاعر إنسان أيا كان مقدارها ده يبقى حد ماعندوش احساس...يعنى أكيد هأقدر فيها صراحتها فى التعبير عن مشاعرها...بس هيبقى الفاصل بقى اللى أنا قلته فوق فى الفرق بين الحب والإعجاب.هو فيه طبعا الأول القبول والراحة النفسية لحد ودى طبعا فى المقام الأول..بس بعد كده يعنى هأحاول أستنتج وأفهم هى حبتنى بناءا على ايه...وهل ده إعجاب أو حب بجد...عشان ما أظلمهاش وأجرح قلبها ودى أكتر حاجة هأزعل من نفسى لو حصلت...
يبقى اختصار إجابتى...فيه فرق بين الزمالة و الصداقة و الراحة النفسية والإعجاب والحب...وده اللى بيحدد مين هيقول بحبك وايه هيكون رد الطرف التانى عليه...
وأتمنى أكون قدرت أوصل رأيى بوضوح وأسف للتطويل...وبشكرك ياتنهيدة بجد على الموضوع الرائع جدا صورةصورةصورة

Re: ازاى حتعبر لو حبيت

مرسل: 08 ديسمبر 2008, 11:32 am
بواسطة همسه
الله على مواضيعك ياتنهيدهصورة
انا عن نفسى لو بحب حد عمرى مااقوله انى بحبك...اولا لانى خجوله جدا ومقدرش اقول كده ...
ثانيا ..اخاف انه مش بيحبنى ودى حاجه تجرحنى اوى...
انما بقى لو شحص بيحبنى وانا بحبه ...برده عمرى مااقوله انى بحبك المبادره لازم تبقى منه مش منى ..
لو شخص مش بحبه وهو بيحبنى..هحاول بقدر الامكان انى المح له انى مش بحبه بس مش صريحه كده يعنى علشان مش ازعله بس تبقى بذوق وكلام كويس..

Re: ازاى حتعبر لو حبيت

مرسل: 10 ديسمبر 2008, 5:50 am
بواسطة تنهيدة
بشكرك ياوليد على ردك المميز وبجد هو ده الحب الحقيقى
وانتى كمان ياأيه بشكرك على رأيك ورايك هو راى معظم البنات معظمنا مش بنبتدى بكلمة أحبك وكتيرمن الأحوال بيكون هو ده الصح..
اما عن راى كابنت انا لوشايفة انا بيحبنى وانا كمان بحبه مش ححتاج انى اروح أقولة ولو مجاش وقالهالى يبقى خايف من كلمة بحبك والا بيحب عمرة مايخاف من انه يصرح للى يحبه بحبه..
ولو ممكن الفت نظر شخص بحبى يبقى ممكن اعمل شىء واحد بس انى أظهر بشخصيتى الحقيقية وشخصيتى هى الوحيدة الا حتعبر عنى......
اما لوانسان بيحبنى وانا مش بحبه حقدر احساسه جدا ومش حفرح بكلمة احبك زى معظم البنات الا بتحب تنول الأعجاب من كل الا حوالية وححاول ابعد بشكل ميجرحوش لان لو جرحته يبقى بجرح نفسى ...بجد هوده مفهومى للحب وتعاملى معاه flower1

Re: ازاى حتعبر لو حبيت

مرسل: 12 يونيو 2010, 3:05 pm
بواسطة سندريلا
مساء الخير يا نهاد ...
كل سنة و إنتي كمان طيبة بالرغم من فروق التوقيت و التأخير بما إنه موضوع قديم ...
فكرة الموضوع حلوة أوي ... أنا رأيي الشخصي إن البنت مش ينفع تصرح بمشاعرها الأول ... و ده مش بسبب عاداتنا و تقاليدنا الشرقية ... لكن ده لازم يرجع لتكوينها كبنت تتسم بالحياء و الكبرياء ... عشان كدة مش أعتقد إني ممكن لو حبيت ف يوم من الأيام إني حصرح بمشاعري دي إلا إذا لقيت تصريح من اللي قدامي و كمان أحس فيه صدق الكلام و المشاعر و الثقة و دي حاجات أعتقد إنها صعبة دلوقتي لأن الزمن اتغير و ما بقاش في ثقة زي الأول ... بس الله أعلم طبعاً القدر مخبي إيه ... :)
بجد فكرة جميلة يا نهودة ... و سؤال فعلا مهم :) flower1

Re: ازاى حتعبر لو حبيت

مرسل: 28 يونيو 2010, 9:54 am
بواسطة walaa mohamed
ok11 حلوين يا نهاد شوية الأسئلة دول رغم صعوبتهم.
بالنسبة لأول سؤال

لو انتى حبيتى شخص وحاسة ان هو كمان بيحبك لكن هو لسة مصرحلكيش بحبه ممكن انتى تروحى وتصرحى ليه انك بتحبية ؟
أكيد طبعا طبعا لأ...أنا بيتهيألى لو البنت عملت كده هتقل فى نظره كتير
حتى لو كان بيحبها من الأول أعتقد الحب ساعتها هيتلاشى.
لأن المفروض هو اللى يسعى إليها مش العكس..دى حتى تبقى حاجة بايخة أوى.

ايه اللى ممكن تعمليه عشان تعبر ليه عن حبك ؟
ولا حاجة
ولو شخص جه قالك انو بيحبك وانتى مش بتحبيه ازاى حتتعاملى مع الموقف..

دى بتبقى صعبة شوية حتى لو كنتى بتحبيه أو مش رفضاه فما بالك لو مش بتحبيه
بس فى كل الأحوال..سأنصرف من أمامه فورا
ليس دليلا على الرفض..بس لأنى مش هبقى عارفة أقول ايه يعنى..
ورفضا كمان للأسلوب..الذى يسبب الكثير من الإحراج.