هو لسه فيه حب بجد؟

[قلب حزين]

يعنى حبيت انى اكون اول المشاركين فى قسم الحب باعتبارى اول بنت فى الموقع
وكبداية يعنى لقسم كلام فى الحب وأسئلة الحب عايزة اول سؤال يبقى هو لسه فيه اصلا حب؟
فى الايام دى اللى بقت فيها المادة هى اللى متحكمة فى الناس وفى كل احوالهم وحتى الخطوبة والجواز بقت عملية مادية مالهاش اى علاقة بالحب وبقينا كبنات بصراحة بنرضى بأننا نبقى سلعة نتخطب ونتجوز من غير حب عشان نمشى مع التيار ايوة مش كل البنات بتعمل كده وانا عن نفسى مش ناوية اتخطب واتجوز من غير حب بس الاغلبية عشان الظروف اللى بنعيشها دى مايفكروش الا فى الماديات وبينسو الحب
عشان كده بسأل الولاد والبنات هو لسه فيه حب بجد؟؟

[الأمير الحائر]

ههههه حلوة أول بنت فى الموقع دى يامريم بتفكرينى بهدى شعراوى فى شبابها
ليه الأسألة الصعبة دى انتى لازم من أول موضوع كده هو لسه فيه حب بجد؟ أكيد فيه بس فين مش عارف بصى هو صحيح مع كل الظروف اللى بقينا فيها فيه ناس بتفكر ان ماعدش حد ممكن يحب حد بجد وان أيام الحب وروميو وجولييت انتهت وان الأيام دى بقى الحب كله ماديات زى مابتقولى....كل ده مايمنعش ان فيه حب بجد فى قلوب ناس لسه ماماتش فيها الحب.. وعلى فكرة دول كتير مش نادرين ولاحاجة بس المشكلة ان الناس اللى قلوبها ميتة مافيهاش حاجة اسمها حب دول اكتر عشان كده كله بيقول هو لسه فيه حب؟ وبعدين الماديات عمرها ماكانت عامل فى الحب, مش كلام افلام ولاحاجة بس بجد الحب ماحدش يقدر يشتريه بالفلوس..فيه ناس بتبقى حالتها المادية متوسطة ومع ذلك راضيين وعايشين وبيحبو الحياة وبيحبو اللى حواليهم..وفيه ناس تانية معاها ملايين ومش لاقية لحظة حب حقيقية...عشان كده بقولك هو بس قلوب الناس اللى شوية اتغيرت مش موضوع ظروف ولاحاجة..عشان كده اجابتى يامريم هى: ايوة لسه فيه حب...حب بجد..من القلب..بس اللى يلاقيه...

[همس الحب]

أهلا يامريم وأنا كنت تانى بنت فى الموقع بس معلش إذا كنت أتأخرت على مابتديت اكتب عشان مشاغل الكلية وكده
والله يامريم هو سؤال مش سهل اجابته فى الزمن ده وزى مانتى قلتى فيه بنات مش بيكون عندهم الأمكانات المادية فبيضطروا يتخطبوا عشان قطر الخطوبة والجواز مش يفوتهم بس رأيى ان ده غلط واحنا لما نعمل كده يبقى زى مانكون بنرمى نفسنا فى حياة ومستقبل كله من غير حب
بالنسبة للحب مثلا على مستوى الجامعة ده فى العادة مش بيبقى حب خالص ده بيبقى زمالة وتعود مش حب ونادر اوى لما حكاية حب فى الجامعة تنجح
يعنى هو لسه فيه حب بس احنا اللى بنلغى الحب ده اصلا من حياتنا بالماديات اللى بتتحكم فى الناس وياريت الدنيا كلها والله تبقى حب فى حب بجد
ميرسى يامريم عالتوبيك الجميل ده
بااااى

[ابن مصر]

هو لسة فى حب اه فى بس ضاع وسط المادة.
فاصبح فى اى علاقة المادة اولا ثم الحب ياتى بعد المادة .
بجد ده عن تجربة شخصية.

[مسعدعبدالمعزأحمد]

بحب الحب وحروفه تغنيكى
وأحب القلب لما أسمع نداه ليكى
بحبك زى ماتكون الحياه أنتى
ووقت لقانا لو ممكن..أموت فيكى
هههههههه
حب ده وألا مش حب
طبعا الحب موجود
الله محبه

[asmaa ahmed mousa]

الحب ده من اقدس الاشياء اللي خلقها لينا ربنا وانا شخصيا بشجع الحب وبشبه الجواز من غير الحب زي الحياة من غير بشر

[hala]

الحب فى الدنيا زى الماء والهواء... يعنى من غيره نموت...... قد يتوارى قليلا خلف ماديات الحياة ..... لكن وجوده هو الذى يخفف علينا قسوة الظروف المحيطة ..... ثم ان اللهاث وراء لقمة العيش جعل الحب هو الحلم الوردى الذى نسعى اليه دائما..... اما الزواج بدون حب فهو مرفوض .... لكن الزواج مع الحب فقط أيضا مرفوض لأنه يفتقر الى العديد من مقومات الحياة الناجحة.( وهناك حكمة جميلة تجعلنا نستطيع التعايش والتكيف مع ظروف ليس لنا يد فيها :اذا لم تستطع ان تعمل ما تحب.. ف على الاقل حب ما تعمل )
هو علشان كدة انت قلبك حزين؟

[المصرية]

هو فيه بين الام وولادها والاخوات لكن بين راجل وست اشك .الكذب غطى على كل شيىء وبقى صعب تعرف الدهب من القشرة .