هنبتدى نكتب كمان فى قسم أحلام مجنونة اللى عاجبنى شخصيا مع ان فكرته غريبة
بصو هو اصلا سؤال من اختبار فى علم النفس والبارا سيكولوجى ( علم ماوراء الطبيعة ) كنت قريت عنه زمان فحبيت احوله لموضوع هنا..
لو قدامك تختار قوة خارقة للطبيعة ...يعنى مثلا تطير...أو تحرك الأشياء عن بعد بعقلك (السيكوكينيزيا ) ... أو مثلا تقدر تقرا أفكار اللى قدامك...يعنى دى بس أمثلة أنت ممكن تتخيل أى حاجة تانية خارقة للطبيعة أنت نفسك فيها وتقولها...مين عارف...مش جايز الأحلام المجنونة تتحقق فى يوم
يلا مستنى رأيكم ويارب بجد اعجابى بالقسم ده يتنقل ليكو وتبتدو تفكرو فى مواضيع تكتبوها فيه لأنه بجد فكرته جديدة وجميلة جدا وممكن تبقى نظرة للمستقبل لأن المستقبل أساسه الأحلام
على فكرة بالنسبالى أنا اجابتى هى الطيران عشان بحس الطيران ده حرية بحسد الطيور عليها يلا مستنى ارائكم أنتو بقى؟

ان شاء الله اوليد هتطير فيه واحد جنبنا بيبع جناحات هجيب لك منه اتنين انا عن نفسى احلامى المجنونه هى انى اقرا افكار غيرى يعنى زى الحاسه السابعه كده احب اعرف اللى قدامى بيفكر فى ايه بيقول عليه ايه بيحبنى ولا بيكرهنى بينافقنى ولا صريح معايا عايزة اعرف جوه الناس ايه هل تفكيرنا واحد او مختلف وكده يعنى بس ده حلم مستحيل تحقيقه ياسلام لو يتحقق

ههههههه جناحات؟ حلو ده ياأية اديلى عنوانه بسرعة لأحسن تخلص الكمية اللى عنده وأنا ورايا رحلة طيران بكرة ضرورى
عندك حق فعلا لو الواحد يفهم اللى قدامه بيفكر ازاى كان ارتاح بس على فكرة دى حاجة ممكن تيجى نسبيا مع الوقت والخبرة وكتر معرفة الناس والتعامل معاهم...فى وقت معين من كتر ما واحد اتعامل مع ناس فى حياته ممكن يعرف من أول مقابلة بينه وبين حد اللى قدامه ده بيفكر فى ايه..شخصيته عاملة ازاى..بس ده طبعا موضوع تقريبى مش ثابت ودايما ممكن يبقى فيه انسان يظهر الطيبة ويخبى الشر...اللى تحسبه كتكوت يطلع فرخة يعنى بس خلاص أنتى بقى بعد الحاسة السابعة ماحدش هيعرف يكلمك
بأقولك ايه ماتسيبك من موضوع الحاسة السابعة ده واشتريلك جناحين من الراجل اللى جمبكوا وتعالى نطلع رحلة طيران كده لفرنسا ولا حاجة

ياريت ياوليد يبقى عندى جناحين واطير بيهم ياسلام على فرنسا بالذات اصل انا كلية الاداب قسم فرنسى وبقولك يعنى لو عايز كورس فى الفرنساوى انا ممكن اديك واعملك تخفيض

ديما مبادر ياوليد كل أفكارك هاااااااااااااايلة تعرف أنا نفسى تكون القوة الخارقة الاعندى أية أن ااقدر أغير قلوب الناس بلمسه واحدة منى وأخرج من قلوبهم الحقد والغل واحوله لحب
بس يكون حب حقيقى نفسى أخلى الناس كلة تحب بعضها ده لوحصل العالم كله حيتغير
طبعا حتقول حلم ملائكى بس واللهى هو ده حلمى المجنون

ياسلااام قسم فرنساوى وساكتة طب قولى بونجور باردون اى حاجة انتى بتقولى فيها انا قالب الدنيا الايام دى على كورسات لغات ..انا ممتاز الحمد لله فى الأنجليزى وكنت بفكر اتعلم لغات تانية...طب حلو يا أية تدينى كورس بس على حسب بقى التخفيض اللى هتعمليه كام

تنهيدةةةةةة حمد الله على السلامة الأول..بجد الأكاديمية كانت ناقصها حاجة من غيرك والله...وكمان تيم الأحساس كان مش شغال خالص
شكرا على ذوقك بس صراحة أنا بادرت بكتابة المواضيع بعد ما محمد قال ان الأقسام اللى تحت مش شغالة وأنا عشان كده حبيت اكتب فيها وبجد لقيتها كلها أقسام جميلة كلها واجتماعية كمان بمعنى ان الكل هيكتب فيها حتى لو فيه ناس مابتكتبش حاجات أدبية كتير وكده..وده جميل حاجة هتجمعنا كلنا يعنى..
بجد كنت متأكد ان حلمك هيكون مميز....مافيش أجمل من الحلم بأن الحب يبقى مالى القلوب...وأنتى على فكرة عندك القوة السحرية دى بكلامك...الكلام والكتابة دى قوة سحرية بجد ولما توصلى فى خاطرة أو قصة أو رواية رسالتك بالحب دى تبقى أجمل قوة وسحر للى بيقرا...يعنى حلمك مش بعيد أوى ولا حاجة ...انتى بس اكتبى بالحب ده...
نورتى الأكاديمية تانى ياتنهيدة ومستنيين بقى كلام الحب والأحساس

واد ياوليد عارف..أخر واحد قالهالى كان سنة 95 فى الأبتدائى كانت الساعة ساعتها 6 ونص واتقتل الساعة 7 فى ظروف غامضة والقضية اتقيدت ضد مجهول خبى نفسك بقى النص ساعة اللى جاية
طب القنبلة على اسرائيل ماشى...بس الوزارة هتخشها ليه هتبقى وزير ايه بقى؟ وبعدين مالك ومال اليابان بلاش حقد عالناس هما قصرو من شوية

احم ...أنا جديدة هنا يا جماعة على فكرة فيا ريت تتقبلوا وجودي....وبالنسبة لموضوع القوة الخارقة دي ففكرة هايلة وأنا أتمنتها كتيييييييييييير لإن أكيد الحياة هتختلف برده كتييييييييير نفسي تبقى عندي القدرة على التنقل بين القارات والبلاد في غمضة عين...ألف الكون في يوم وأختار البلد اللي تستهواني وأعاشر أهلها...وأفهم عاداتهم وتقاليدهم وأعرف لغتهم ..اكتشف أماكن محدش فيها وارتاح وأسبح ربي في الخلا وأرجع أطير واختفي ...وازور مكان جديد.