أكاديمية ايجيبت رايت الأدبية

حال الأمة
حال الأمة وصفه محال
لا نافع شعر ولا موال
يمكن ينفع
قصة غريبة
نكتة كئيبة
ماحنا بنضحك عالبطال
قولنا كتير
وحكينا وعدنا
عمر السلك الشايك
ما هايبعدنا
ياما صلينا
وياما دعينا
يمكن يوم
ربنا يوعدنا
وييجي الفارس
اللي يحقق أمل الأمة
ويجّمعنا ويوحدنا
***
حال الأمة ؟
جاي عالجرح وليه بتعلم؟
هو احنا فينا نَفَس نتألم ؟
آآآه .. آآآه
مش كاتكلم
حال أمتنا يرد عليك
كله بيبكي علي ليلاه
سنة وشيعة
أهي تقليعة
وغزة بتصرخ
يا ويلاه
وآدي بغداد
ضاعت من إيدنا
ما نابها منا
غير تنهيدنا
نهب وسرقة
ظلم و فُرقة
طغيان بيّن
وصل لمداه
والجولان !!
تاهت
في بحور النسيان
والسودان
مش سايبنها في حالها كمان
أما القدس
فيا ولداه
آه ...آه
قلمي بيصرخ
رافض يكتب
باينه تاه !!
لأ أنا في عرضك
قول
ما تخافش
وما تيأسش
قولها صريحة
و أمرنا لله
حال أمتنا
حقيقي يغم
يجيب الهم
فين أمجادنا
فين روادنا
فين علمائنا
فين أخلاقنا
فين رسالتنا
فين حضارتنا
واللا ده كله
خلاص نسيناه ؟
طلعوا هناك رحلات للفضا
واحنا بنشكي بطالة وفضا
ولسه بنرمي اللوم عالقضا
ونقول يوم عدي وانقضي
و بكره ...
لسه بنستناه
***
حال امتنا بقولها يا ناس
مش محتاج كلمة وكراس
مش محتاج انشا وحوارات
ولا محتاج طبل وأجراس
محتاج إيد...
مليانة حماس
شايلة الفاس
تزرع .. تبني
حاملة رسالة
لكل الناس
أمة أحمد
أمة عظيمة
راس مالها كرامة
مش بترول ودهب ونحاس