طول عمر بلدنا فيها خير .. تعزم واحد و أنت مافيش في جيبك 2 جنيه ، يقولك معاك ؟!! تقوله الخير كتييييير و الحمد لله ، و الحكومه بقي قررت تثبتلنا إن الخير لسة كتييير ، و ان لازم القاهرة يبقي ليها السبق في عالم المواصلات علي جميع عواصم العالم ، و إن انت كمواطن لازم تتوفر لك الرفاهية و ده طبعا بعد بعد م إتوفرت لك كل طلباتك الأساسيه - ششششش إنت مقرتش العنوان ولا إيه - ، فعَمَلت إيه بقي الحكومه... نزلت لنا التاكسي في الشارع ، لا مش تاكسي واحد ولا 2، لا لا لأ ، دول 3 ، ثلاث أنواع من سيارات الأجرة ، و انت بقي ياعم نقي واختار ، و ده طبعا بعد دراسة دقيقة ، أصل الحكومة دي قروبة و متفتهاش فايتة ، هي شايفة إن إحنا مقسومين 3 ، ناس بتركب مواصلات ،و ناس بتركب تاكسيات خوفا من البهدلة ، و ناس بتركب عربيات ، فهي قالتلك إيه بقي - وده طبعا في إطار خطة لتحسين المرور- قالتلك الناس اللي بتركب تاكسيات دول أكيد بيكسبوا كويس و بيصرفوا نص فلوسهم علي التكاسي (جمع تاكسي) فاحنا لما نجدد التكاسي تقوم تغَّلي الأجرة يقوم الناس اللي بتركبها يبطلوا و يرجعوا للمواصلات و بكدة نوفرلهم و مستوي معيشتهم يعلي ، و في نفس ذات الوقت اللي بيركبوا عربيات يزهقوا من السواقة في الزحمة ده غير إن البنزين غلي يقوموا يبصوا يلاقو عربيات حلوه و شيك و مكيفة بسواقها فيركبوها و بكده تخف الزحمة .... شايفين بقي الحكومة شايلة همنا قد إيه و بتفكر فينا ، وبعدين ده طبعا غير الألوان أصفر و أبيض و أبيض في اسود حاجة آخر دلع .
كل ده و بتفكروا في العيش و الخضار و السكن و الجواز و المدارس و التعليم و الشغل ...يا عالم بطلوا إفترااااااا دول 3 تكاسي .... الخير كتيييييييييييير و الحمدلله.