متصحونيش
مرسل: 05 أغسطس 2009, 9:50 pm
متصحونيش
*******
إن كنت نايم متصحونيش
وان كنت صاحي سيبوني اعيش
ليه الزمان غدار وآسي وبايعنا
ليه السنين بتمر ولا حدش سامعنا
ليه العذاب ليه العتاب ليه الألم
نفسي ف يوم أبات من غير ما انظلم
مش لاقي نور وجه الغيام عم المكان
حتى السلام معدش حد فاضى كمان
ضاع الأمان د احنا ف زمان فيه البكى ما بينتهي
من كتر ما شفت الهوان بقول يا رب ننتهي
مهما حنداري الجراح باينة ف عنينا
ومهما نزعل ع اللى راح مش حيرجع لينا
أنا ف حلم ولا ف كابوس ولا إيه دا
د انا لو ف غابة وسط الوحوش مكانش حالى بأة كدا
وان كنت نايم متصحونيش
وان كنت صاحي سيبوني اعيش
وبتسألوني ليه
أصحى أشوف إيه ف زمان فيه العجب
سيبوني أرتاح من البلطجة والشغب
وكمان مشوفش ظلم اليهود لإخوانا العرب
ولا حتى اشوف على وشوش الناس الغضب
ولا عاوز اشوف مين سرق ولا مين ضرب
ولا مين راح ضحية ولا مين انطرب
ولا مين راح يشتكي ولا يكتب طلب
ولا ناس بيتها واقع ونايمة ف الترب
ولا ناس واكلنها والعة وغلابة بتتنهب
ولا مين هاجر ولا مين طفش ولا مين اغترب
ولا مين مش لاقي ياكل ولا يشرب ولا مين انعطب
ولا مين عايشين ف جنة ولا مين ف اللهب
ولا مين حقه ضاع ولا مين حقه انسلب
ولا مين اسمه انكتب ولا مين اسمه انشطب
ولا مين نجح في دايرته ولا مين رسب
ولا مين منه فايدة ولا مين علينا انحسب
ولا مين من كتر ما انحنى جاله أتب
ولا مين بيكنز ف الدهب ولا مين بيشيل حطب
ولا مين احتل أرضي ولا مين انسحب
ولا مين باع هدومه ولا مين باع الأدب
ولا مين راحت فلوسه ولا مين عليه اتنصب
د حتى السجين فرحان بسجنه ولا بيفكرش ف الهرب
وحسألكم أنا
مين السبب . . مين السبب
مش قلت لكم متصحونيش
إن كنت نايم متصحونيش
وان كنت صاحي سيبوني اعيش
سيبوني أعيش
********
*****
***
