تخاريف صيام

[Tamer Hitler]

يا جماعة دى تخاريف واحد صايم بس مش عن الاكل والشرب..دة صايم عن الفكر
معروف ان الضغط يول الانفجار..لكن شعب بلدنا (جهلستان)اثبت خطأ الرأى دة..فشعبنا الميمون اتعود انة( يكيف) نفسة على كل الانظمة سواء كانت اشتراكية او انفتاحية ولا حتى احتكارية
وانا جيت النهار دة علشان اقول لكم سر خطير بس اوعدونى انة يفضل دايما فى قعر البير
انا فى مرة قررت افكر(ربنا يغفر لى)علشان اعرف ازاى شعب بلدنا(جهلستان) بعد ما كان من اغنى الشعوب بقى مش لاقى حتى اكل الحبوب..وبعد عملتنا ما كانت بتلاتة دولار بقت ما تساويش حتى شوية خيار..اية يا ترى اسباب الانهيار..؟؟
وبعد وقت طويل م التفكير العميق الخالى من اى شبهة نهيق مخالف بذلك كل الاعراف والمواثيق ..لقيت ان شعبنا معذور دة الناس ع العيش بالطابور وبتعانى من ضعف الاجور وكمان ما حدش يقدر يتكلم احسن يقع فى المحذور...وبعد شوية لقيت ريقى ناشف ومحتاج لشربة ماء ونفسى ضيق كانة يصعد الى السماء..فهربت على طول وحضرت طبق الفول وهجمت علية زى الغول ..واكلت لحد ما بقت بطنى مليانة وعينى نعسانة ومش ناقص غير ان جسمى يدخل الجبانة...بح بحت ورح رحت وقفلت عقلى وعنيا وشخيرى انطلق وبقى مية مية...اصل احنا فى بلدنا(جهلستان)مش متعودين على التفكير...احنا عايشين زينا زى.........خخخخخخخخخ

[قلب حزين]

هو أولا نورت الأكاديمية ياتامر وسعيدة انى ابقى أول واحدة أرحب بيك وكل عيد وأنت طيب
بالنسبة لموضوعك بقى فعاجبنى ومش عاجبنى
يعنى عجبنى اوى الاسلوب الساخر اللى انت كاتب بيه, اسلوب جميل جدا ولو فكرت تكتب قصص أو مسرحيات أو مذكرات كوميدية حتى هتبقى كويسة اوى وهتوصل هدف كمان.....بس اللى مش عاجبنى بس هو وصفك لشعب مصر بتعميم اوى....يعنى ياتامر اه فيه ناس بتتعب لو فكرت وعايشة من غير العقل اللى ربنا كرمهم بيه....وفيه ناس تانية لو مافكرتش وما أبدعتش تموت......صح؟ يعنى كل مكان فيه وفيه فعشان كده ماينفعش نعمم ابدا على مصر....المفروض نقول كل عيد وأنتى طيبة يامصر
عموما نورت ومستنية أعمالك اللى جاية ان شاء الله

[همسه]

اهلا بيك ياتامر زميل جديد لينا فى الاكاديميه
الخاطره بتاعتك جميله اوى والمغزى منها واضح...بس انا مع مريم فى اللى قالته فيه ناس بتتعب لما بتفكر...بس هى مبتفكرش علشان مش عايزه مشاكل يعنى ناس بالبلدى كافيه خيرها شرها...ناس عايزه تاكل وتشرب وتنام هدفها الاسمى انها تعيش زى مابنقول كده(الباب اللى ييجى منه الريح سده واستريح)..علشان كده مش عايزين يفكروا او بمعنى اصح بيفكروا بس مش بيتكلموا....اصل بلدنا ديموقراطيه شويه

[الأمير الحائر]

أهلا ياتامر فى الأكاديمية و صراحة أعضاء حزب البنات فى الأكاديمية عملو الواجب فى رأيهم يعنى فعلا زى مامريم قالت ماينفعش نعمم.....أيوة فيه ناس كتير كافية خيرها شرها زى ما همسه عبرت بس دى مش قاعدة لأن فيه ناس كتير فى بلدنا بيفكروا وبينتجو وبيألفو وبيبدعو وبيقولوا رأيهم...فيه ناس تانية بتريح دماغها وعايزة كل حاجة عالجاهز...حتى الأفكار والأحلام عايزينها عالجاهز وعايزين حد يحققالهم...وده الغلط بجد...اللى بياكل وينام ومافيش فى دماغه أى طموحات أو أحلام بدعوى ان ظروف البلد وحشة ده يبقى انسان مستسلم ومنهزم....فيه بلاد كتير فى العالم ظروفها أصعب مننا وفيها شخصيات ناجحة وعلماء وأدباؤ ومفكرين....يبقى العيب فى البلد وفى ناسها كلها؟ لأ طبعا بس فى الناس اللى نايمة ومش عايزة تصحى....وشكرا ياتامر على أول موضوع ليك فى الأكاديمية وأنا بأيد مريم انك ممكن تكتب أعمال ساخرة وكوميدية جميلة وان شاء الله نقرالك حاجات جديدة قريب....و نورت الأكاديمية

[تنهيدة]

اهلا بيك ياتامر معانا فى الأكاديمية واهلا بيك فى قسم الخواطر
بالنسبة لأسلوبك الساخر فبجد هو جميل ومميز لكن كان نفسى اول خاطرة ليك تكون مليانة بألأمل لكن أسلوبك مشجعنى انك حتكتب مواضيع تتكلم فى أيجابيات بلدنا وكمان سلبياته لان بلدنا زى أى مكان فى الدنيا فيها الحلو والوحش لكن صدقنى لو عممنا يبقى بنظلم ناس كتير
اما راى فى الناس السلبين فى بلدنا فكل دول العالم مليانة وبلدنا فيها كمان المبدعين الا دايما كانوا رافعين اسم بلدنا فى السما
بشكرك ياتامر ومستنين مواضيعك وخواطرك الجايةنورت الأكاديمية