صفحة 1 من 1
حرااام كفاية حرق قش! تيجو نحرق الرز؟!
مرسل: 01 نوفمبر 2008, 3:30 am
بواسطة فارس معاه جواد
أولا كده بالصلاة عالنبى أنا أفخر إنى أكون أول مشارك فى القسم ده بتاع هى دى مصر ومشاكل مصر واللى شكلى هأبقى زبون دايم فيه عشان أنا أصلا بتاع مشاكل
مع انى عارف ان كلامى هيبقى دبش اصلا لأنى مش باعرف اذوق كلامى واحتمال أطرد من أول مشاركة
بس بجد بجد مش انتو اتخنقتوا؟ حرق ودخانة وسحاب أحمر فى أصفر فى بنفسجى! ولاكأننا فى حرب! وتيجى تقول ايه السبب يقولك الفلاحين بيحرقوا قش الرز! رز مين ياعم الحج؟! أنا والله كنت بحب جو الريف أيام ماكان نضيف وقال ايه كنا لما نعوز نتهوى ننزل حتة فيها زرع و بتاع دلوقتى بجد بقيت كل ماأشم الريحة بتاعة الحرق دى أكون عايز أحرق الناس اللى بيولعوا أو نعدمهم فى ميدان عام
الغريبة فى الموضوع ان احنا مش جمب المنطقة اللى ساكنين فيها اى ارض ولامنطقة زراعية لمسافة كبيرة اوى ومع ذلك الدخانة والخنقة جامدة جدا..امال اللى جمب الأراضى دى بيعملو ايه؟ بيشتروا اسطوانات اكسوجين؟
أنا عايز أعرف حاجة واحدة بس..هما اللى بيولعو فى القش دول مابيحسوش؟! مابيشموش؟! مالهمش عيال؟! يعنى مافيش واحد كده فلاح ابنه يجيله يقوله يابابا أنا اتخنقت من الدخانة دى, اطلع طفيها!
ولا الرئة بتاعتهم بقت مصفحة خلاص؟! وعايز أعرف حاجة كمان, هو فين الحكومة؟ فين وزارة البيئة اللى خنقتنا عالموبايلات رسايل " حرقك لقشك بيأذى بلدك " يافرحتى!
طب ماتعملو حاجة؟! ولاالفلاحين اللى بيولعو دول عينى عينك كده نهار وليل دول بيبقو من بتوع مجلس الشعب ولاناس كبار يعنى وماحدش يفهمنى غلط فى كلمة كبار دول ( أيوة مش قصدى حرامية يعنى
) بصوا أنا لو فضلت أكتب بجد مش هأفصل خلونى أسمع رأيكوا كده ولاأكونش أنا اللى شامم الدخانة دى لوحدى؟ يلا سمعونا الحلول العملية والجزرية والملوخية بتاعتكو
وسلملى على وزارة البيئة
Re: حرااام كفاية حرق قش! تيجو نحرق الرز؟!
مرسل: 01 نوفمبر 2008, 3:52 am
بواسطة قلب حزين
ههههههه لأ مش انت اللى شامم الدخان لوحدك يافارس كل البلد شماه اوى ومخنوقة أوى كمان بس هنعمل ايه يعنى؟
هو يمكن الحل انت من غير ماتقصد قولته فى عنوان موضوعك نحرق الرز نبطل ناكل رز من الاخر احسن ونمنع زراعته يمكن نرتاح بدل ماحتى الهوا بقى مايتشمش مش كفاية المية والاكل؟ مش هأقدر أقولك ان الحل اننا نبلغ او كده لان تقريبا زى مانت قلت فيه حاجة غريبة عمالين يقولو فى التلفزيون غرامات وحبس وكلام كده ومافيش حاجة من دى بتحصل متهيألى انا حاسة اصلا ان الحكومة هى اللى بتقولهم احرقو ولاايه ماحدش فاهم حاجة
قلبت علينا المواجع يافارس بس توبيك حلو وانت بجد هتنفع فى القسم ده اوى عشان صراحتك
سلام
Re: حرااام كفاية حرق قش! تيجو نحرق الرز؟!
مرسل: 02 نوفمبر 2008, 5:30 pm
بواسطة عاشق القلم
فعلا يافارس هى مشكلة كبيرة ومش بس اللى بجوار اراضى زراعية هما اللى بينضرو وبيتخنقو لأن الهوا هى الحاجة الوحيدة اللى مش فيها تمييز بين البشر يعنى كلنا لازم نشم نفس الهوا مش حنفية مية هنركبلها فلتر
انا رأيى ان حل المشكلة دى مش فى وزارة ولاحكومة الحل فى الناس لأن لما واحد يولع ويدخن ويلوث الهوا اللى بيتنفسو يبقى ده عاقل؟ انا بردو زيك مش فاهم دول بيعملو كده ليه؟ جايز نلاقى حد من اللى بيولعو دول يخش يقولنا هما بيعملو كده ليه شكرا يافارس على موضوعك وعلى فكرة عجبانى اوى الطريقة الساخرة اللى انت كاتب بيها الموضوع انا بحب اقرا الادب الساخر وانت شكلك بتعرف تكتب النوعية دى ان شاء الله نقرالك اعمال قريب تحياتى اخوك عاشق القلم
Re: حرااام كفاية حرق قش! تيجو نحرق الرز؟!
مرسل: 03 نوفمبر 2008, 2:10 pm
بواسطة الأمير الحائر
يخرب عقلك يافارس يابتاع المشاكل هيطردونا من الأكاديمية بسببك
أنا جالى تحذير رسمى من جهات عليا ان هما هيضربوك بالطيران عشان الموضوع ده...اجهز بقى
بالنسبة لموضوع القش ده فعلا بقى مشكلة كبيرة وزى ماقال الأخ عاشق القلم ان دى مش مية ملوثة هنركبلها فلتر ولاهنشترى مية معدنية ( من الملوثة بردو
) ده هوا كلنا بنتفسه عشان كده كل الناس حتى اللى فى أماكن متحضرة جدا الدخانة هى هى, انت نسيت ايام السحابة السودة يعنى كانت اكتر من كده فى كل مصر
لو فيه حد كان بيعاقب الناس دى كانو فعلا خافوا, دول مش عايزين غرامة دول عايزين الإعدام رميا بأى حاجة عشان يبقو عبرة
ربنا يهدى وعقبال سحابة السنة الجاية وعليك خير طول ماوزارة البيئة مقضياها رسايل وميسدات فى الشعب
Re: حرااام كفاية حرق قش! تيجو نحرق الرز؟!
مرسل: 05 نوفمبر 2008, 1:12 am
بواسطة ابن مصر
ده غير الى بتعمله دلوقتى فى الاطفال على الاقل الكبار ممكن يستحملوا لكن الاطفال يعملوا ايه
يا بخت مستشفى الصدر
فعلا يا فارس هيا مشكلة خطيرة جدا وللاسف هنحس بيها اكتر بعدين
Re: حرااام كفاية حرق قش! تيجو نحرق الرز؟!
مرسل: 17 نوفمبر 2008, 11:29 am
بواسطة المهاجر
السلام عليكم
بصوا يا جماعة اولا انا من الفلاحين وبنزرع رز وكل حاجة وبضايق جدا من اننا نقول ان السبب فى تلوث الجو فى القاهرة او فى اى مكان هو قش الرز بس لا غلط لان التلوث خليط من عدة عوامل من بينها قش الرز والتلوث موجود طول السنة اشمعنى وقت قش الرز كله بيتكلم عليه لان مع قش الرز بيزيد التلوث وما يبقاش يتشم الدخان بس لا بقينا نشوفه كمان عشان كدا كله بيقول قش الرز والناس هتعمل ايه واحد حصد الرز ودرسه زى ما احنا بنقول عندنا فى الفلاحين هيودى القش فين كان الاول ما فيش حد عارف له استخدامات فكله كان بيحرق عشان حاجتين يخلص من القش والحاجة التانية تراب القش دا مع الزمن بيتحول لسماد عضوى مفيد للارض يبقى كدا الفلاح مستفيد من الناحيتين
نيجى بقى لما ظهر استخدامات اكتر منها انه يقوم بدرسه مرة تانية وتحويله لحاجة اسمه تبن يأكل منه المواشى بتاعته بقى ما بيحرقش غير اللى ما عنودش مواشى
ولما بقى سعر حمل التبن بتاع القش وصل 140 جنيه ما بقاش حد بيحرق حتى اللى ما عنودش مواشى بقى يبيع للى عنده فحرام يعنى نرمى كل حاجة على قش الرز ولازم نبص من جديد نظرة تانية على الفلاحين
فرجاء يعنى بلاش تلميح بالكلام اخى الكريم
فلاح وافتخر