أكاديمية ايجيبت رايت الأدبية

صورة
*******
رسمتك في العيون دمعه
وآهه من الألم واجعه
صورة حلم متكتف
وأيام رايحه ومش راجعه
رسمتك جوه كراستي
ولونتك بألواني بمعرفتي
ضميتك والعيون نايمه
وروحي في السما هايمه
صحيتي وف عنيكي
شايف من بعيد صورتي
**** ****
انتي .. انتي ياحبيبتي
ورده بالجمال ملفوفه
نغم هادي وطير شادي
غنوة من زمان معروفه
وطيبة قلب مألوفه
انتي ياحلم في الحاضر
أمل ناضر..
نهار..وشمسه بتكابر
نشوة فرح
بتخلق فيا وتعافر
*******
مستنيكي أنا بكرة
واوعي تكوني مش فاكرة
مكان ما كنا نتقابل
ونتكلم ونتجادل
ونتبادل محبه وخوف
وشوق ملهوف
ولا بنكدب ولا نجامل
..............
هغمض عيني عشان شايفك
ف أحلامي بريئه ب ملامحك
ونيلك خالق جمال وردك
وأولادك كتير حواليكي
لماهم نظرة ف عنيكي
ده حنيه
متحنية بيها إديكي
حبي ليكي ده عباده
ومش عاده
ده فطرة ف قلبي مخلوقه
ساعات باليأس مخنوقه
وكتير بالحب مغلوبه
..............
رسمتك حلم ف كياني
منجى من يأسي وأحزاني
صورة ضمير ..وهمسة خير
ف سكوتي وكلامي
صورة ومحفورة
يمكن دلوقت مكسورة
لكن بكره هتتحرر..وتتخضر
وهتكمل الصورة
************************************************************
*************

الزميلة / منال
كلماتك جميلة ورقيقة جداً ومعانيها توضح إحساسك أثناء كتابتها .
تحياتي لكي مع تمنياتي بالتوفيق والنجاح .

أهلا وسهلا بك زميلتي الكريمة
قصيدة بالعامية جميلة الكلمات وفي منتهى الشاعرية
أسلوبها مميز وتعبيراتها رقيقة للغاية ولا تخلو من اللحن الجذاب
فمرحبًا بك مبدعة معنا في هذا المكان الرائع الذي سعد بتواجدك وستسعدين به بإذن الله
تمنياتي لك بالتوفيق الدائم

كلماتك رائعة جدا

ومنورة الاكاديمية يا جميلة