أكاديمية ايجيبت رايت الأدبية

ياحبيبتى من غير ماتحبينى...ولا أحبك...
ياعمرى من غير قلبى...ولافلبك...
ياحياتى من غير لمسة ايدينا...من غير لقا عينينا...
من غير كل كلام الحب...
شايفك...
شايفك بقلبى...ونفسى أقولك...
انك كل مافيا خلاص...
ولاعرفتك...ولاتعرفينى...و لاحد ليه..
فى حياة التانى أساس...
مجرد...حلم...فى عقلى عايش...بيستنى يتحقق فى يوم...
مجرد خيال...طيف معايا عايش...بألمسه وبأحس بيه...
كل ما أغمض عنيا...
شايفك...فى وسط الضلمة...جوه عينيكى الأمل...شايلة فى ايديكى النور...
أمشى فى طريقك...يمكن الأقيكى...ولما أوصلك أفتح عينيا...ولا لاقيكى...
ولامجنون ولا أنتى ليلى...
أنا بس أمير...وأنتى أميرة أحلامه...
مجرد خيال
بس فى أحلامه...
شايفك...

حلوة اوى الخاطرة ياوليد الا عجبنى كمان انك بتكتب روايات ومع ذلك بتكتب فى الخواطر الابتعتبر بداية كل كاتب بس بجد موضوع الخاطرة جميل وهو ان ممكن يكون الأنسان بيحب لكن الحب يكون فى خيالة وكمان بيعبر عن حبه لان عنده امل أنه يتحقق ويشوفه حقيقة
عجبنى اوى تعبير "شايلة فى أيدكى النور"
بس تعرف ان احلى حاجة فى الخاطرة انها بتتكلم عن الحب للحب
كل كلماتك معبرة ياوليد ربنا يوفقك

شكرا ياتنهيدة على رأيك...وعارفة...أنا شخصيا بحب الخواطر أكتر من أى نوع أدبى تانى لأنها مابتقيدش بأسلوب معين ولاوزن...ولاأركان قصة...ولا أسلوب روائى...فبتخلى الكلام يطلع من القلب بجد و عشان كده انا بحب كمان اقرا خواطر عن ما أقرا اى حاجة تانية وأحترم جدا عقلية اللى بيكتب خواطر لأنها يمكن زى ماقولتى هى بداية أى كاتب بس مش بالسهولة دى ومحتاجة حد كتابته وإحساسه مميز عشان يقدر يوصل ده فى خاطرته...ومع ذلك الفترة اللى فاتت أنا تقريبا مابقتش أكتب خواطر كتير الا لما بكون مضايق أو كده زى امبارح لما كتبت الخاطرة دى...لأنى بحس الخاطرة أكتر حاجة ممكن تزيل مشاعر الحزن...
شكرا على رأيك ياتنهيدة ومستنى قصتك

روعة..على فكرة أنت وأنت تنهيدة بتكتبوا كويس في أي حاجة..أنا ما بعرفش أكتب كويس غير في القصة..

مستنية أعمال جاية كثير

هبة

شكرا ياهبة على رأيك جدا وعلى فكرة انتى كتابتك هايلة وممكن تكتبى أى نوع بس لو حسيتى فكرة معينة بجد وقررتى توصليها فى أى شكل هتلاقى الموضوع سهل...انما أنتى لو فكرتى فى فكرة قصة مش هتقدرى تغيريها لأى نوع تانى...فهو الموضوع كله موضوع إحساسك بالفكرة بغض النظر عن القالب اللى هتكونى فيه فكرتك وتحوليها لعمل أدبى...وعلى فكرة بالذات فى الخواطر والشعر الإحساس ليه الأولوية عن الفكرة يعنى لو أنتى حاسة حاجة دلوقتى حالا حزن أو فرح أو حب...هتعرفى تعبرى عنها فى خاطرة أو قصيدة بكل بساطة...جربى وان شاء الله ياهبة نشوف النتايج الجميلة كده فى مرة

جميله الخاطره.واحساسك رائع فيها انت عبرت عن شعور بيحس بيه ناس كتير . عبرت عن حلم كل واحد وواحده نفسهم يلاقوا حلمهم

لارا كتب:جميله الخاطره.واحساسك رائع فيها انت عبرت عن شعور بيحس بيه ناس كتير . عبرت عن حلم كل واحد وواحده نفسهم يلاقوا حلمهم

بشكرك جدا يا لارا على رأيك وسعيد انى قدرت أوصل مشاعرى وأعبر عن إحساس وأحلام ناس كتير زيى..ويارب أحلام الكل تتحقق
نورتى الأكاديمية يالارا ومستنيين مشاركاتك معانا ان شاء الله

خاطرة رقيقة جدا ...بإحساس عالي و صادق و يوصل بانسيابة جميلة للقاريء .

الحلم الجميل الرومانسي اللي بيسكن في القلب و الخيال عن توأم الروح و أميرة الأحلام فريدة المواصفات ... عبرت عنه بشكل موجود في كل إنسان فينا في وقت من الأوقات ...

لم لا تكتب المزيد من هذه الخواطر الرقيقة ؟

إلى المزيد من الكتابات المميزة دائما يا وليد في كل المجالات الأدبية

هايل اسلوب جميل وبسيط ورائع واحساس عميق ياريت تستمر فى الكتابه هنا انتا حقا موهوب اشكرك على هذه الخاطره واتمنى لك التوفيق دائما وليك منى احلى ورده

كلمات جميله ومعنى راقى للحب حتى لو فى الخيال المهم معايشته والاحساس به
شكرا على الكلمات المميزة