موضوع جميل جدا ياغادة وأنا حاولت أكتب رد كذا مرة عليه الأيام اللى فاتت بس بسبب انشغالى مالحقتش للاسف...وأدينى أخيرا هأعرف أرد على الأسألة الجميلة دى ويمكن هى استكمال لموضوع امتحان تعارف بس من ناحية أدبية أكتر منها شخصية ودى حاجة رائعة بجد
1- يا ترى اكتشفت امتى وازاي حبك للكتابة ؟
من وأنا صغير جدا يعنى فى الإبتدائى مثلا كنت بأرسم كاريكاتير كده بسيط من ناحية الرسم بس كنت بركز فيه على الكتابة الساخرة بشكل كبير أوى وكانت بتعجب أصحابى أوى...بعد كده بدأت الكتابة الفعلية وأنا عندى 14 سنة كخواطر وقصص.
2- فيه حد شجعك أو وجهك ؟
فى البيت لأ خالص
كنت أنا الوحيد اللى بيحب القراية أصلا فى البيت وبالتالى الكتابة..أصلا هما كانوا وما زالو بيتريقوا على موضوع القراية والكتابة
...أما اللى شجعنى بجد أبى الروحى وأظن الأستاذ لجيل كامل..دكتور نبيل فاروق...هو اللى شجعنى اولا بباب عزيزى القارئ فى سلسلة كوكتيل 2000 واللى حاولت أبعتله فى بداية كتابتى وطبعا كان أيامها لسه عايشين فى عصر الجوابات ومافيش حاجة اسمها نت ولا ايميل انتشر وعشان كده تقريبا الجواب كلته القطة
المهم إن بعد كام سنة كان بدأت مسابقة روايتى للدكتور نبيل فاروق فى الرواية..ودى كانت أول تجربة ليا إنى أحول فكرة لرواية أو لأى نوع تانى عموما..وبدأت رواية الأمير..وحاوت أتقدم بس للأسف ماكملتش الرواية بسبب ظروف شخصية أيامها...بس بدأت بقى حبى للكتابة ككتابة وابتديت اِكتب فى منتديات أدبية كتير...كقسم أدبى فى منتدى عام..وكانت تجارب مالهاش فايدة...لحد مالقيت الأكاديمية هنا...وبعدها حدث ولا حرج...أعتقد كانت بحر كتابات غصت فيه منذ دخولها وانضمامى لبيت العيلة على حد تعبير هالة الجميل
3- جربت تكتب لمجلات أو جرايد ؟
لأ..خالص
4- فزت بأي مسابقات أدبية؟
أنا مش (مسابقاتى) بطبعى
...يعنى مش بحب أشترك فى مسابقات إلا نادرا وأغلب كتابتى هى لرصد إحساس شخصى أو تحويل فكرة عابرة لعمل...بس ساعات كتير كانوا أصحابى اللى عارفين إنى بحب الكتابة بيدعونى لمسابقات ونادر لما كنت بشترك...و عمليا من يوم ما بدأت كتابة من 6 سنين ما اشتركتش غير فى مسابقة واحدة هى مسابقة الأديبة نجلاء محرم فى القصة القصيرة السنة دى...وحتى دى كانت بداية تعرفى على مؤسسة نجلاء محرم وحضورى فيها لتطوير كتابتى أكتر يعنى كانت المؤسسة ليها فايدة وأهمية أكبر عندى من المسابقة
5- إيه هدفك من الكتابة ؟
متهيألى رديت على جزء من السؤال ده فى ردى اللى فات..الكتابة للكتابة..وفى أحيان تانية بتبقى الكتابة للتعبير عن وجهة نظر أو مبدأ أو حالة إنسانية تخيلتها وهكذا...يعنى الكتابة بالنسبالى زى متنفس وحيز للتعبير عن آراء وأحاسيس ومشاعر...
6- عندك هوايات غير الكتابة ؟
كان زمان كتير جدا...كنت بلعب جودو لمدة طويلة وكنت ابتديت أدخل بطولات وكده قبل الثانوية العامة - ربنا يخدها - ما تبدأ...وبعد كده جت الكلية - ربنا يخدها بردو -
وماعرفش أكمل أى هواية أو نشاط حتى الكتابة اللى مارجعتش ليها الا حديثا جدا...
7- بتقرأ لمين؟
دكتور نبيل فاروق طبعا...وحديثا الأديبة القديرة نجلاء محرم واللى ابتديت أتعلم منها الطريقة التصورية فى الكتابة وأستخدم التشبيهات والإستعارات اللى كنت مش بجأ ليها رغم تمكنى منها...ويمكن هى الفضل فى أن أخر قصة " ذلك اللامع " كانت من أفضل القصص اللى كتبتها كأسلوب لأنها كانت محتاجة التعبيرات التصورية الحالمة دى...
وحاليا كمان بقرأ لتنهيدة...المهاجر..غادة...وهمسة وكل اللى بيكتبوا فى الأكاديمية هنا رغم بعدى عن الأكاديمية الأيام اللى فاتت بس بجد دايما بحب كل الأعمال اللى بتكتب فيها...
8- بتكتب لمين ؟
لمصر..للناس..للقضايا..للظلم..للمشاعر..و للحب...
9- بتحلم تحترف الكتابة ؟ولا تبقى هواية و بس!
وحدها الأيام يمكن أن تجيب على هذا السؤال...
10-ايه المجال الأدبي اللي لقيت نفسك فيه أكتر من غيره ؟
أنا بحاول ما اتقيدش بمجال معين فى الكتابة..أو حتى أسلوب معين...بس عموما أنا شخصيا بحب أكتب الروايات الرومانسية...
أنا إزاى كتبت كل الكلام ده؟ ربنا يكون فى عون اللى هيقرا بقى
وبجد شكرا على الأسألة الجميلة ياغادة