يعنى بجد ولا أجمل حلقات كوميدية قرتها ولا شوفتها..
![مبتسم :)](./images/smilies/icon_e_smile.gif)
كنت مفتقد قراية السلسلة دى جداً و مفتقد الكوميديا و الفايدة فى نفس الوقت اللى فى كل حلقاتها..و ما فيش أجمل طبعاً من فرصة الفكرة الممتازة ( كتابنا تحت الأضواء ) و إنك نجمة الأسبوع عشان أقرى اللى فاتنى من الأجزاء..ده موضوع تانى ان شاء الله أقوله فى ردى هناك..انا مستعجل أكتر بجد على الرد على كل الأعمال اللى افتقدها...
نرجع للجزء الرائع..فكرة التلفزيون و الكرتون بجد تناولتيها كويس أوى و إزاى ممكن الأطفال يتحولوا من مصدر للسعادة لكل اللى حواليهم و إسمتاع حتى بشقاوتهم لمصدر إزعاج يوصل لحد الخطر ساعات زى ما وصفتى و زى ما تابعت فى الردود و أكيد حالات تانية كتير أكبر بتبقى المشكلة فيها عدم متابعة الأهل للى بيشوفوه أولادهم..و مش بيركزوا فى إختيار حتى نوع الكرتون اللى هيشوفوه و مناسبته لسنهم..شخصياُ انا كنت دايماً لحد فترة قريبة قبل ما انشغل بأنزل أفلام كرتون بنفسى لأمير أخويا و أتفرج عليها بالكامل معاه..أو اتابع معاه الحلقات اللى بيحبها على سبيس تون مثلاً..زى ما بعمل بالظبط فيما يخص الكتب و مجلات الأطفال اللى بقراها معاه..بحيث أولاً أبقى عارف إن اللى هيتفرج عليه ده هيفيده..ثانياُ للتوجيه عشان يفهم المعنى من ورا الفيلم أو حلقة الكرتون.. و لو فيه حاجة مش فاهمها أوصلهاله و أسيبه هو يحس بمعناها و الهدف منها..
لكن للأسف إن المجهود الطويل ده مع اطفالنا فى إختيار حاجة مناسبة لسنهم و تساعدهم على التفكير و الإدراك..ممكن يضيع فى ساعة نسيب طفل فيها يتفرج معانا أو من غيرنا على فيلم من أفلامنا العادية اللى بقت كلها درجة عاشرة..و ده فى رأيى بقى ظاهرة اخطر ألف مرة فى أيامنا دى من كرتون المقالب و الشخصيات السيئة رغم خطورته على الأطفال..
الموضوع بجد طويل و محتاج لكلام اكتر من كده بكتير..كتبتى ياغادة بشكل كوميدى جميل و مميز قضية مهمة.. بالنسبة ليا شخصياُ و اعتقد بالنسبة لأى حد يهمه إنه يزرع حاجة جميلة فى أطفاله سواء أخوة او أبناء..ويارب بجد يعين الكل على مسؤلية القدوة و تعليم الأطفال من صغرهم كل اخلاق و عادات جميلة
و ربنا يوفقك دايماً يا غادة فى كل مجال أدبى تكتبى فيه بنفس المستوى الرائع
![وردة متفتحة flower1](./images/smilies/orangeflower.gif)