طبعا سؤال ..أو تساؤل غريب .. بس ليه صحيح؟
هو فعلا سؤال غريب لكن تلقائى كمان..ليه بنرد على مواضيع غيرنا...؟ أنا شخصيا بحس إن العمل الأدبى دايما بيبقى أجمل بقرائته..يعنى زى الكتاب..ماينفعش يتعمل عشان صاحبه..لازم ينشر ويتقرى والناس تقول رأيها فيه..وبالتالى أنا بفترض بما أننا فى مجتمع أدبى فكأننا فى صفحات كتاب كبير..وكل حد كاتب عمل فى الكتاب ده..لما هأقراه أنا ممكن أستفيد من أسلوبه أو لغته أو إحساسه..ولما أرد عليه هأفيده برأيى عن أى نقطة شايفها مش واضحة أو نقد للعمل..أو حتى ثناء مع إيضاح نقاط تميز العمل اللى ممكن كاتبه نفسه مش انتبه ليها وهو بيكتب العمل..وعلى حسب ذكاء الكاتب ده هيستفاد من كل الأراء على عمله أو موضوعه..لو نقاط قوة يركز عليها..لو عيب يقلل منه.. حتى لو نقد وحتى لو سلبى يقدر بذكاء يحوله لإيجابيه زى ما قلت قبل كده...يعنى الردود غير إنها أولا وأخيرا متعة قراءة وحب لها...هى أيضا إفادة وإستفادة..عطاء وأخذ لقيمة غير مادية لكنها قيمة معنوية كبيرة لمن يفهمها و يقدرها...
هل بتحس إنه واجب لازم تعمله؟ و لا فرصة لمجاملة أصدقاءك و اكتساب محبتهم ؟
لأ طبعا مش واجب زى ما وضحت فوق..حب فى القراءة..فالكاتب مرحلته الطبيعية إنه قارئ وبعد كده كاتب..ومش لازم أبدا ينفصل عن القراءة لغيره عشان بقى بيكتب..
لأ طبعا مش مجاملة..بدليل إنى شخصيا بأنقد العمل كعمل بغض النظر عن كاتبه جديد أو قديم..أعرفة أو ما أعرفوش..وفى مرات عديدة نقدت أعمال لأعضاء قريبين ليا جدا فى الأكاديمية..و الحمد لله انهم دايما كانوا بيفهموا نقدى صح انه حب ورغبة فى الإفادة وعدم النفاق.. ونقد للعمل مش لشخص كاتبه أبدا...
و لا عشان زي ما بترد على مواضيعهم ...هم كمان يهتموا بالرد على مواضيعك ؟
إطلاقا..أنا مش بربط ده بده أبدا..لكن الغريب فى الموضوع إنى ممكن أضايق لو حد بيرد على أعمالى أنا بس ومش بيرد على حد تانى مثلا! وكمان يعنى مش بحب زى ماوضحت مرارا النوعية الأنانية اللى بتبقى عندها وقت كافى وما بتقراش أعمال غيرها أو مابتعلقش عليها وبتكتب أعمالها بس وبتنتظر رأى الناس على أعمالها وخلاص..أنا شخصيا واحد من الناس يمكن لو حد لاحظ بفضل لما بكون مشغول زى الفترة دى مش أكتب أعمال فى الأكاديمية رغم سهولة ذلك..بسبب إنى مش لاقى الوقت الكافى أبدا الفترة دى إنى أعلق على أعمال حد تانى إلا القليل..وبالتالى ما أحبش إنى أحس إنى حد أنانى..لأنى حتى أخر قصة كتبتها فى الأكاديمية من مدة كانت قصة ( بريق ) لحد دلوقتى لسه ما لحقتش أكمل ردى وتقديرى لتعليقات اللى علقوا عليها! لأنى بحاول لما بدخل فى أخر الأسبوع لبضع ساعات أنى أتابع اللى أقدر عليه من المواضيع وأرد عليها رد لائق سواءا بنقد أو بتحية دون مجاملة أو نفاق.
و لا هواية عندك : أقصد التحليل أو النقد ؟
لست ناقدا..لكن استفدت من أديبة كبيرة ورائعة..بحضور ورشة قصة قصيرة فى مؤسستها الأدبية..تعرفت فيها على الكثير من أسرار الكتابة أفادتنى جدا جدا...ولهذا أحاول قدر الإستطاعة أن أنقل أى فكرة أو معلومة بخصوص نقد فنى أو نقطة ما فى العمل, لكن ليس النقد هواية شخصية لى على الإطلاق..فقط ما أعرفه لا أكتمه وأشارك به زملائى فى الأكاديمية دائما.
و لا بترد فعلا بحب و رغبة في اسعاد الآخرين ؟ أو إفادتهم بمعلوماتك ؟
أعتقد الجزء اللى فات جاوب على السؤال ده بالظبط
2 - طيب ..بكل صراحة ...ليه بترد على مواضيع و تسيب مواضيع تانية ؟
مع إن السؤال ده هو اللى عمل الأزمة كلها..لكن أعتقد أن هذا السؤال بالنسبة لى غير وارد لأنى ما دمت متواجدا فى الأكاديمية كل الأعمال عندى سواء..كنت كذلك فى الفترة الماضية قبل دخول موجة الإمتحانات فجأة بسبب قصر مدة الفصل الدراسى الثانى..و سأعود للتعليق على كل الأعمال بلا استثناء كما كنت.. بعد الإمتحانات إن شاء الله...
لكن...
لكن أريد أن أضيف شيئا هاما..بفرض أنى متفرغ حاليا وموجود بشكل دائم فى الأكاديمية..واشترك عضو جديد..عمل..تلاه عمل..تلاه أخر..وأخر وأخر..! سأرد على موضوعه الأول..والثانى..والثالث..وبعدين...؟
مالوش أى ردود خالص على أى موضوع فى الأكاديمية ( مش مواضيعى أنا الشخصية ) رغم أنه - وأرجوا ملاحظة هذه النقطة - متواجد فى الأكاديمية بشكل دائم والوقت متوافر له والحمد لله...إذن المشكلة ليست فى الوقت..لكن الواضح أن هذا العضو لا يعرف معنى كلمة ( موقع أدبى )! وبالتالى..سأجد نفسى بعد ذلك تلقائيا أترك التعليق على أعماله إطلاقا..حدث هذا قبلا مع عضو كان متواجد معنا..ونبهناه بشكل مهذب لكنه غضب وترك الموقع كله من الأساس! إذن فهناك أيضا عوامل أخرى غير مجرد جودة العمل تتحكم فى الردود..وأعتقد أن هذه العوامل منطقية جدا...
فيما عدا ذلك...فأسعد بالتعليق على أى عمل سواءا أعجبنى أو لم يعجبنى...وأعتقد أن الفقرة السابقة أجابت عن تساؤلات كثيرة بخصوص إقتراح الردود
3 - لما تعرض موضوع ... تحب كل الأعضاء يردوا عليه ؟ ليه؟
بالتأكيد..ما دمت متواجد فى الأكاديمية دائما..و لا أقوم بإغراق قسم ما بخمسة أو عشرة أعمال فى يوم واحد!
فعندما أعرض عمل أسعد بردود الأعضاء عليه لمعرفة أرائهم..سواء بالنقد أو بالتحليل أو التحية..وأستفيد من كل رأى مهما كان بسيطا...
انتهت الأسألة.. بالنظر الأن لردى على الموضوع هنا..كم هو طويل..وبالطبع إحتاج لوقت طويل لكتابته..لكن مادام ذلك الموضوع جيد ومعروض بشكل مشجع على الإجابة فبالتأكيد يسعد أى شخص بالرد عليه مهما أخذ وقتا فى الرد دون أن يشعر..وهذه نقطة أخرى!
تحية ياغادة على مناقشاتك المتميزة دائما و المشجعة على المناقشة و الرد بكل صدق..وكما رأيت فى وصف أحد الزملاء لكى ( ضمير الأكاديمية )