قل لي ماذا ترسم وأنت سارح، أقل لك ما هي شخصيتك؟

[هبة الله محمد]

اختبار نفسي

ترى ماذا ترسم على جوانب الصفحة عندما تكون شارد الذهن ؟



احيانا عندما تمل من حصة او محاضرة معينة ، او عندما تكون شارد الذهن

ترسم خرابيش تظن ان لا معنى لها ولكن نحن نقول لك انه لها معنى وتفسير اختر واحدة من الرسوم التالية:

(../الوجوه-أشخاص بلا وجوه-../الثعابين- المكعبات-الزهور- الأسهم-النجوم- العيون-القلوب-الدوائر-الزخارف-الدوامات-البيوت)..

[الزهراء]

مساء الخير يا هبة

ح نشتغل على النفسيات و لا إيه ؟ أنا ح جاوب بس خايفة أصلك قلتي و نحن نقول لك ، إنت جايبة معاكِ فريق من الأطباء النفسيين الموضوع كدة مش مطمئن و شكلنا ح نتفضح و الحمد لله .

بصي بقى و أنا في مراهقتي كنت برسم عين و بارسمها بطريقة حلوة و أجملها و تطلع حلوة بس عمري ما عرفت ليه
ساعات كمان بحب أرسم قلب ساعات بيزبط معايا و باقي الأوقات ...عينك ما تشوف إلا النور
و لما بتقلي بنت أخويا الصغيرة ارسميلي يا إما بارسملها عين أو بيت و شمس و عصافير
بس الصراحة معظم الوقت بارسم عيون ..لو حاجة وحشة قوليلي بيني و بينك و لا أقلك اجي العيادة أحسن
سلام و مشكورة جدا على الموضوع الحلو دة و ما تتأخريش بالنتيجة
ربنا يستر

[هبة الله محمد]

أول واحدة هنمارس عليها الدكترة النفسية..


ما تخافيش حظك حلو، اللي بيرسم عيون كل صفاته جميلة، يعني عديتي من تحت إيدي..معلش المرة الجاية نصطاد حد تاني

../العيون

شخصية تنطوي على غموض وتدل العيون الصغيرة الضيقة على الحزن

اما العيون التي تعاني حولا فتدل على روح المرح والفكاهة

وتدل الرموش المنمقة على شخصية جذابة .

شكرا يا زهراء يا عسولة على مرورك..بس سؤال رخم بترسمي عيون ضيقة ولا واسعة ولا محولة..

[Ghadat2009]

يا سلام ....هي دي المواضيع الجامدة

بس اللي بنعمله في الناس هيطلع علينا و لاّ إيييه ؟؟؟

عموما ..د. هــبة ...باين عليها طيبة ...و مش هتطلع فينا كوارث كتير

أنا كنت برسم حاجات كتر لأني بحب الرسم و كنت شاطرة فيه ..

بس في المحاضرات ...كنت دايما أرسم وجوه ...ممكن وجه الدكتور اللي بيحاضر ...و جه زميلة ..وجه مر عليّ و أنا في الطريق ..وجه شخصية كرتونية ( وجوه عجيبة مضحكة)..... الخ
و معظم الوقت كنت بارسم عيون عربية جميلة ..بس غالبا حزينة أو فيها دمعة بتنزل ...صور العيون دي كانت تقريبا في كل مكان : حتى على هوامش الجرايد ...دي كانت حاجة صعبة بجد

و أحيانا لما كانت المحاضرة تبقى يعني في منتهى الملل ...كنت بارسم لوحة كاملة ...فيها بيت رائع على النمط الأمريكي ( سقفه مائل )حواليه جنينة فيها ورد و شجر ...

إيه رأيك ؟ فيه أمل ...و لاّ.....

في انتظار نتيجة الجلسة ...طمنيني ...

[محمد محمود]

ليه النواحي النفسية دي بس
مبلاش فضايح
عموما ً أنا معظم الوقت بارسم زهور وقلوب وأحيانا بعض الزخارف
لو طلعت الروشتة فيها عقدة نفسية بلاش تنشريها على الملأ

[نورانة]

طيب نقول واحدة صاحبتا
كانت بتحب ترسم فساتين
يا رب متكونش الحالة متاخرة
موضوع لذيذ

[ابن مصر]

اااااااااااااااه ربنا يسطر يا هبة و اللهى انا ما بقلقش الا منك و نفسيات و كده و انا اساسا حاسس انى على نهاية السنة دى هاروح للدوكتور النفسانى مع شهادة التخرج يالا ربنا يستر عموما انا هجاوب و ربنا يسطر

الى برسمه و انا سرحان برسم (الزخارف) ...... هااااااااا الحالة خطيرة مش بقولك انا عايز دكتور نفسانى و اللهى.. الله يكون فى عون كل طالب و ربنا يهد الدكاترة قولو امين

بجد موضوع جميل جدا يا دكتورة هبة و ياريت نتيجة التحاليل و ياريت تكتبى فى الروجتة ولو حتى رز باللبن علشان الواحد جعان

[تنهيدة]

بتغيبى ياهبة وترجعى بمواضيع جميلة .انا عن نفسى بموت فى التحليلات النفسية وخصوصا لما تكون مع محلله شطره زيك

أنا بئة لما أسرح وأرسم ببتكر حاجات غريبة ...بفضل ارسم فراشات عجيبة ...أو شمس بتضحك متقوليش بئه بتضحك ازاى انا وانا صغيرة كنت برسم شمس وليها عنين وبتضحك ولحد دلوقت برسمها

وحكايات القلوب دى بئة حكاية لوحدها طول الوقت وانا بكتب أى حاجة أفضل ارسم قلوب ...وساعات كدا بتجنن وأرسمها على أيدى بالألوان

أنا عارفة ان حالتى صعبة لكن أنا واثقة فى الدكتورة النفسية الا بتعالجنى ...بس أرجوكى يادكتورة قوليلى على الحقيقة ومتخبيش عليه حاجة

[ريم]

حقيقي فكرة جميلة بس المشكلة والله أعلم هيحصل إيه آخر الجلسة وما تكونش الحالة متأخرة خالص ...
أنا عندي الرسم بيكون حسب الحالة النفسية
يعني أحيانا أرسم عيون إما دامعة أو في وقت آخر عين مرحة وبها حول..أو فاكهة لها وجه وعيون بها حول!_وجوه ضاحكة_دوائر أحيانا_دوامات عند الاكتئاب_زهور كثيرة أو باقة زهور أو زهرة واحدة (ودي لسة راسماها الصبح!!)
طمنيني يا دكتورة ..الحالة متأخرة.. ولا برضه ما فيش أمل

[المهاجر]

اولا رائع موضوعك هو
ثانيا انا احيانا ارسم زهرة وفى كثير من الاحيان لا تعيش اكثر من دقيقة لانى بكون قطعت الورقة وما فكرتش ارسم عيون دامعة غير مرة واحدة بس ولكن فى اغلب الاحيان برسم قلب خارج منه سهم