يوم للكآبة

[فرانكلين55]

ايه رأيكوا نعمل يوم خاص للكآبة ,فكرة اليوم ده ان كل واحد فينا لما يجى يوم الكابة يعيط طول اليوم ولو عايز يفتكر الايام الحزينة ف حياته وماله مفيش مانع بس يقضى بقيت السنة فريش يعنى رايق بقيت السنة بس ياريت اللى عنده الضغط ميحتفلش معانا لانه ممكن يجيله جلطة خاصة لو كانت قصة حياته مأسوية وياريت اليوم ده يبقى يوم 3/1/1991 اكيد انتم عرفتم انا اخترت التاريخ دة ليه؟ ايه رايكم؟؟؟؟؟؟؟؟؟

[ابن مصر]

معرفش ليه يا فرانكلين حاسس انه يوم ميلادك ....... طيب ليه يا عم عايز تعمله يوم نكد ده المفروض انه يكون اجمل يوم ... اجمل يوم تعرف ليه لانك بتترك سنة بحلوها و بمرها و بتبدا سنة جديدة بس بجد عايز تحس بعيد ميلادك و تعشق اليوم ده اعمل تجربة حلوة قوى كل عيد ميلاد ليك هات ورقة و قلم و اكتب ايه الاحلام الى انتا حققتها فى خلال السنة و ايه الاخطاء الى عملتها فى خلال السنة و ابدا عيد حساباتك و استقبل السنة الجديدة من عمرك كانها عمر جديد اكيد هتلاقى احلام لسة ما حققتهاش و اكيد هتلاقى فى اخطاء كتير عايزة تتصلح يعنى بتعمل اعادة تهيئة لاوضاعك صدقنى ساعتها هتحس انه اجمل يوم فى حياتك


اما بالنسبة (ليوم الكابة) : فبصراحة الشعب مش ناقص كابة لاننا اصبحنا يوميا نعيش فى كابة طيب ايه رايك ما يبقى يوم سعادة او يوم ضحك و برده ما فيش مشكلة انه يكون يوم عيد ميلادك لان ده الى بجد عايزينه عايزين يوم نضحك فيه .. يوم نبتسم فيه .. بجد هيفرق معانا و معاك مش صح ...يا رب تكون رسالتى و صلتلك و ربنا يوفقك فى حياتك و يوفقنا جميعا


و تحياتى لك

[rawan432]

طب والله ضحكت من جرعة النكد ده ههههههههههه

طب قول يوم للضحك نخرج فيه من الكأبة شوية اهو برضه تغير ومين عارف يمكن الشعب كله يضحك بس مش عارفه هيضحكعهلى مين اكيد على نفسه

ادينى اكتئبت عجبكوكوا كده

[تنهيدة]

ليه يافرانكلين كدا أحنا مش محتاجين يوم للكآية هى بتيجى لوحده مش لازم نخصص يوم لانك مهما عملت هتلاقى فى حاجات نكدت علينا فى غير يوم الكآبة فالأحسن نعبش أيامنا زى ماهى ما نفكرش فى يوم للكآبة نسيب نفسنا للأمل ولو جت الحاجات الا ممكن تنكد علينا يمكن أملنا فى أيامنا الا فاتت بخففها علينا ..لان بجد حياتنا تستحق نعشها بكل حب وتفاؤل ..وصدقنى مهم شاف الأنسان فى حياتة من صعاب وتخيل أن يوم ميلادة هو يوم تعاستة لانه جه فى الدنيا هتيجى لحظة لو نويت فيها تحقق شىء مفيد أد أية هتحس وقتها أن الحياة جميلة لان أحلامنا وسعينا فى تحققها هو الا بيحلى أيامنا ...سيبك بئة من الأحلام المجنونة دى وإن شاء الله تكون حياتك أجمل حياة والسنة الجاية تحتفل معانا بيوم ميلادك وصدقنى هيكون أجمل عيد ميلاد ....

[Ghadat2009]

يا صباح الأمل و التفاؤل

مش عارفة ليه دايما تعبير ( أحلام مجنونة ) بيوحيلي بحاجات مفرحة ؟ يعني كلمة حلم ممكن يكون معناها هروب من واقع أو محاولة لتجميله أو تطويره .... و كلمة مجنونة بتخليني أحس إن فيه أمل و إن مافيش مستحيل بإذن الله

إنما يوم للكآبة ؟ على قد ما ضحّكني تعليق روان بس حسيت إنه كلام حقيقي إلى حد كبير
و أفكار محمد جميلة و مرتبة ...و التاريخ اللي ذكرتيه أكيد يوم ميلادك ..و طبعا فكرتيني بالأغنية الشريرة اللي دايما يغنوها في أيام الميلاد على ألحان Happy birthday 2 u و هي ( كان يوم اسود يوم ما جيييت ) بس أنا متأكدة انك كنت متضايقة من حاجة أو محبطة من موقف مثلا و ياريتك تبتسمي عشان تهوني على نفسك الكآبة دي

و اسمعي كلام و نصائح تنهيدة لأنها فعلا جميلة جدا ..

و ياريت تحلميلنا حلم مجنون بجد يطلّعنا من الحالة اللي جبتيهالنا دي ...ممكن

سلام يا فرانكلين ...و مستنية الحلم اللي اتفقنا عليه

[سندريلا]

و الله هي فكرة حلوة ...... بس احنا المفروض نعمل يوم للفرح لانه لما بيجي بيكون حاجة جديدة علينا ..... انما الكآبة خلاص بقت ملازمانا

يعني بقت جزء مننا مش نقدر نستغنى عنه .........

بس اشمعنى التاريخ ده بالذات ؟

عامة هي فكرة غريبة بس اعتقد انها ضحكتنا بالرغم من كآبتها .......

عامة تسلم ايديك و يا رب ما حد في هنا في الاكاديمية او برا الاكاديمية يشوف كآبة .......

[المهاجر]

يالله بينا نكتئب وانا اولكم بالرغم ان لو اكتئبت يبقى العوض على الله مش هخرج غير بعد طلوع الروح

[fromayka]

طبعا مشجعاكى جدا على اليوم دا ياللا ياشيخه كفايه فرح بقى احسن قربنا نبقى تافهين من كتر عدم المشاكل كل حاجه متيسره ادامنا كل حاجه حلوة حوالينا الكل بيشتغل والكل معاه فلوس بذيادة هموم الامه انتهت و التعليم مجانا دا حتى العيال بطلت تعيط وتنرفز اهاليها ياسلام اما هيبقى يوم بيييييييييييييز1 يييييييييييييييس نكد نكد نكد