يا أهل الجزاير
عقلي حاير
م اللي حاصل
و اللي داير
لو خواجة ؟!
هاقول حسودي
لو عدو ؟!
هاقول يهودي
إنما مسلم .. وعربي !!
زي أحفادي وجدودي !!
شيء يمخول
شيء يخلي العقل يفصل
تنقري فيه الدفاتر
آآه .. يا ساتر
ده اللي فينا مكفينا
ليه نشمت حد فينا
ده احنا أهل
وعزوة ليكم
وانتو برضه
عزوة لينا
أرض واحدة
و رب واحد
ده بدل مانروح نجاهد
ونرجع أراضينا ؟!
واللا احنا خلاص
سامحنا
اللي داير قتل فينا
ونسينا يا ناس
جراحنا
و أوجاعنا الدفينة
و فضينا لماتش كورة
و بالجهل اكتفينا
ده لسه الظلم ساير
و لسه القهر جاير
و هاتدور الدواير
عليكم و علينا
هوه برضه
مش احنا وانتم
راكبين نفس السفينة؟!