الطفولة .......وكما قلت من قبل يلا بينا يلا نلعب فى التراب ....... ودا ملخص لجزء من طفولتى
أولا لم اتمتع بطفولتى من سن سنة لسن 7 سنين لظروفى الصحية
ثانيا بعد ال 7 سنوات هذه بعض طفولتى منها :-
1 - كان ليا ابن خالتى الله يرحمه مات غريق كنا دايما نيجى على سطح جدتى اللى مبنى بالطين والطوب الفلاحى الطينى دا ونتحدى بعض على اللى يفض من على السطخ فى الشارع
2- فى رمضان اللعب بسلك المواعين ازاى بقى اقولكم بنولع في السلك ونقعد نجرى بيه فى الشارع وفى مرة الشرارة وقعت فى جيب الجاكيت بتاع واحد حرقتله الجاكيت وكانت هتولع فيه
3- كنت احب الكلاب جدا وفى مرة عمى كان مربى كلب بس ما كانش واخد عليا فجيت فى مرة اخذت نايب الفراخ بتاعى وروحت رميته له
راح هازز ليا ديله وبتاع وحسست عليه ..... لكن بعدها بعشر دقايق لما روحت وراجع رايح اصلى راح جارى ورايا الخاين الغشاش
4- كنت وانا صغير لما بروح الجامع كان فيه راجل اسمه السيد ابو منسى فجه فى مرة العيال هيصت راح جاى طايح فيهم ضرب بالعصاية وانا كنت بصلى لقيته راح ضاربنى انا كمان وبعدها ما دخلتش الجامع تقريباً لمدة سنة المهم كان كل ما ابويا يسألنى صليت اكدب عليه واقوله ايوة صليت يقولى فين اقوله فى الجامع القديم فكان هو بيصلى فى الجامع الجديد لان كان جامع السنية
فجه فى مرة راح جاى مصلى فى الجامع القديم وجه بيقولى صليت قولتله اه قالى تب مين كان الإمام فطبعاً انا ما صليتش روحت جاى ضارب اسم وخلاص راح جاى قاعد يشتم فيه ويضرب وبعدها اتعلمت بقى اروح الجامع اشوف مين الامام وابويا بيصلى جمب مين ولما ييجى يسالنى اقوله المعلومات صح يروح يقولى ربنا يبارك فيك يا ابنى
![صورة](http://egyptwrite.com/w/images/smilies/icon_lol.gif)
5-فى سنة أولى إعدادى كنت شايل مادتين فى التيرم الأول المهم انا ايه روحت مألف درجات من دماغى ووريتها لابويا جه بقى الدرجات دى كانت مخليانى الاول على المدرسة فابويا بيسأل عنى المدرسين فى التيرم التانى قالوله مستوى فى تحسن قالهم ازاى دا جايب درجات كذا التيرم الاول ...... وهنا تم اكتشاف الجريمة
6- فى مرة فى الابتدائى كنت فى الشرطة المدرسية ... المهم السلم فى الدور الارضى كانت العيال بتفط من عليه على الارض كان عالى فجيت انا فى مرة كلفت بحراسة السلم دا ففيه عيال اتسللت من السلم التانى وفطوا فجيت مسكتهم وموديهم للمشرف راح واحد منهم قايلى انت متغاظ ليه عشان ما بتعرفش تفط قولتله لا بعرف قالى ورينا كدا .... روحت جاى فاطط وبمجرد انى نزلت على الارض ولقيت العصاية نازلة طراخ ..... واتابيه المشرف وبعدها ما شمتش ريحت الشرطة المدرسية نهائيا
7- برضه فى مرة كنا بنلعب فى دورى المدرسة كان فصل 4/1 بتاعنا مع فصل 5/2 فجيت كنت انا مبدع فى الماتش دا وجبت جونين والمدرسة عمالة تهتف باسمى فالمهم كنت انا بحب بنت بقى معايا فقولت ايه فرصة اعمل لنفسى سيط روحت جاى جايب جون تالت وبعد الماتش ما طلعنا فوق فى الفصل بقولها ايه رايك يا شيماء رغم انا ما كنتش بعرف اكلم بنت لقيتها صدمتنى ما بتعرفش تلعب دا احمد محمد كان مبهدلكوا روحت جاى فى الماتش النهائى كان بينا وبين 5/2 برضه المهم انا سيت الكورة ومسكت احمد دا وكل شوية اكعبله وهو اكبر حجماً مش عايز يقع اخر ما زهقت منه روحت جاى سايبه وواقف جون وساعت ما جه هو عند الجون بالكورة روحت جاى طاير فيه مقص طاير خابطه فى الحيطة وانطردت من الماتش وخسرنا الدورى بتاع المدرسة
وفى النهاية ..... هى دى قصة تشردى