السيد فهيم كتب:الزميلة العزيزة ghadat عليكم السلام ورحمة الله وبركاته ... نخش في الموضوع دوغري قبل ما يرجعوا في كلامهم ويسحبوا خيط الطيارة .... المكان الأول ان شاء الله هايكون الأراضي السعودية لعمل عمرة لبيت الله ,هاخد معايا زوجتي واختي الصغري , هاخد معايا مصحف و طبعا سبحة وطاقية لزوم الشيء ..... المكان التاني هايكون بيت المقدس .. القدس يعني وهاخد معايا زوجتي وابنائي أحمد ومحمد عشان أحكيلهم عن أولي القبلتين ومسري رسول الله صلي الله عليه وسلم وتاريخ المكان واحكيلهم عن القضية الأزلية عشان دايما يفضلوا فاكرينها ويحكوها لجيل بعد جيل....هاخد معايا شال فلسطين و كاميرا ديجيتال وشوية حجارة هاملا بيهم جيوبي.... المكان التالت بأه بعد العبادة و النضال هايكون فوق سطح القمر ... هناك مفيش دوشة ومفيش ازعاج ، مفيش بني آدمين من أساسه ... يعني شوية هدوء وسكينة ... طبعا مش هاخد حد معايا ولا حتي المدام من غير زعل ... هاخد معايا قلمي ودفتر أوراقي وتلسكوب فلكي عشان أبقي اطمن عالحبايب وانا قاعد علي سطح القمر و مدلدل رجليا فوق في الفضا ... ياريت ما حدش يصحيني قبل الحلم ما يخلص
السيد فهيم
الزميل العزيز المتميز السيد فهيم
واضح الشجاعة و الجسارة لتكون أول المشاركين في هذا الحلم المجنون ..و ماتخافش هاوصيهم يسيبوا خيط الطيارة شويتين
على فكرة ..عندك روح مرحة رائعة جدا ...و تصورات خلتني أضحك بجد ..بالذات موضوع خيط الطيارة و مدلدل رجلي في الفضا
نيجي بقى للرحلات بتاعتك :
1- رحلة العمرة هايلة طبعا و بارك الله لك في زوجتك العزيزة و أختك الكريمة ...صحبة طيبة و جميلة ..و الأغراض الشخصية ممتازة و مناسبة للرحلة

بس كده يبقى فيه مكان فاضي لشخص إضافي مدفوع التكاليف ( تتنازل عنه لصديق ؟ و لا لعضو زميل؟ و لا لمثل أعلى ليك ؟)
2- رحلة للقدس طبعا أخدت معاك الأسرة الجميلة ..ربنا يجعل أحمد و محمد من الذرية الصالحة إن شاء الله ...بس شجاعة إنك تروح معاهم ..محسيتش بالخوف عليهم ؟ و هل هم كمان هيكونوا مرحبين بالفكرة ؟ بس الهدف ممتاز جدا و الأغراض اللي اخترتها هايلة ..أعجبتني جدا ..لها معنى رائع فعلا
3- يا سلام ! هنا تظهر الموهبة التخيلية العاقلة جدا

بس بجد فكرة حلوة ...و كانوا في بعض روايات الخيال العلمي الأجنبية بيتخيلوا فعلا ان هييجي يوم ممكن نقطع فيه تذكرة للقمر !! و انه ممكن يكون فيه زي مطار هناك مجهز لاستقبال الزوار ..بس للأسف في الحالة دي هيتملي بني آدمين ...و نضطر نحلم بالمريخ و لاّ المشتري !
نورت الأحلام المجنونة بأحلام جنونها في منتهى العقل و الخيال
و أخيرا ...هقول لكل العالم ...هدوووووء ...محدّش يصحي الأستاذ فهيم لحد الحلم ما يخلص على خير
