هاي عمرو...
بصراحة انا شفت الموضوع قبل كدا..لكن ما رضيتش ارد..
لاني لقيت ان جيجي وغادة ما شاء الله قالوا كل حاجة..
وان ردي هيكون تكرار بدون اي فايدة..ومش هيضيف حاجة..
ولا هيقول اكتر من اللي قالوه..
لكن لما دخلت وشفت ردك عليهم..بصراحة استغربت من
ردك لانه فعلا متناقض مع بعضه..في ردك على جيجي قلت
انك مؤمن بالمثل القائل(الضربه اللي متموتش بتقوي) وانك مؤمن
ان ربنا هيعوضك..
وبعديها في ردك على غادة قلت انك مبقيتش
تثق في اي بنت وبتكره البنات كمان..وقلت انه مش عشان اتجرحت
لكن عشان بنات الزمن دا كدا بيقلدوا وخلاص..!!
اسمحلي اقولك ان فعلا الردين في منتهى التناقض..
لو انك حقيقي مقتنع بالمثل اللي جيجي قالته..وان ربنا هيعوضك خير
مكنتش عمرك تقول انك بقيت تكره البنات ومش بتثق فيهم..
بالعكس..كنت هتعيش حياتك كأن شيئا لم يكن..المهم انك اتعلمت
حاجة وخلاص..ودا كان رأي جيجي من البداية..انك ليك حق تتوجع وتحس
بالضياع لان الحكاية مش سهلة طبعا..لكن لازم تاخد بالك ان وقتك بيضيع..
حتى جيجي قالت هما 10 ايام بس..وهقف علي رجلي تاني..
لكن انت قررت بينك وبين نفسك انك تفترض ان كل البنات كدا..معنى كدا
ان اللي حصل فعلا هو السبب..وانه اثر على مبادئك في الحياة..
وحكمك فعلا قاسي..لان مش كل البنات كدا...صعب جدا اننا نعمم
مكان او جنس او طائفة معينة بصفة معينة..لان كل مكان وكل حاجة فيها الكويس
وفيها الوحش..ما انكرش ان في بنات كتير بتقلد..لكن بردو في كتير بيبتكروا
وبيلتزموا بمبادئهم ودينهم قبل كل شئ..
لو في قلبك ايمان بجد ان ربنا هيعوضك..هيبقى عندك ثقة انك تلاقي بنت محترمة
ومتدينة ومخلصة تعوضك عن كل حاجة ان شاء الله....
وعلى فكرة كونك قلت انك حاسس بدا مش عشان اتجرحت لكن عشان دا مجرد
احساس حسيت بيه ممكن يكون صح وممكن يكون غلط..سبب مش مقنع..
لان النظرة دي للبنات مكنتش موجودة قبل كدا لحد ما حصل الموضوع دا..
ممكن تكون انت مش واخد بالك ان فعلا اللي سبب الاحساس دا هو اللي حصل..
ودا الطبيعي..ان الانسان بياخد فترة يحاول فيها يتعرف على كل حاجة من جديد..
ويفوق من اي حاجة حصلتله..بس الشاطر اللي مش يضيع وقت كتير.. ومش يخللي
اي حاجة تأثر في نظرته للناس عما كانت قبل كدا..بتخليه بس يختار صح..وياخد باله حبتين..
انا مقدرة كل كلامك...وواثقة انك مع التفكير العميق هتغير رأيك..المسألة بس مسألة وقت..
مش أكتر..
وان شاء الله بكرا ربنا يكرمك وتلاقي بنوتة مخلصة ومتدينة تغير حياتك كلها..وتقول انها فعلا
فترة وعدت..
![زغروطة ز1](./images/smilies/lololo.gif)
بس ابقى اعزمنا على الفرح ..
ياريت ما اكونش ضايقتك بتعليقي الطويل على كلامك..لكن للامانة كان لازم اقوله..