اقتراح للنقاش: ماسنجر الأكاديمية

[Egypt Write]

مرحبا بكل الأعضاء الأعزاء,
بناءا على اقتراح أحد مشرفى الأكاديمية منذ أسبوع, جعل صفحة خاصة للتواصل السريع بين أعضاء الأكاديمية لمناقشة المواضيع بشكل سريع وعرض الأعضاء لنصائح عامة أدبية أو لأستخدام الموقع بشكل عام, وكذلك لتوجيه أى أسألة من الأعضاء الجدد حول الأكاديمية ونظام الكتابة والمسابقة.
لذا فبعد التفرغ من تصميم الأكاديمية والتجهيز للمسابقة, رأينا أن نطرح هذا الموضوع بين الأعضاء للنقاش لأنهم كما نذكر دائما هم مالكو الأكاديمية الأساسيين .
الطريقة ستكون مثل رسائل الماسنجر أو البريد الألكترونى, لانريده كونه شات أو محادثة ولكن فقط طبقا للإقتراح نود جعله كوسيلة للتواصل بين الأعضاء بسرعة حول مشاكل الأكاديمية, والتواصل بين الأعضاء والمشرفين لتأييد فكرة فريق عمل الأكاديمية.
شرح الفكرة بإختصار, صفحة واحدة اسمها شات مثلا يمكن للأعضاء فقط دخولها, وبدخول الصفحة يكتب اسمك فى قائمة المجتمعين ويقوم كل عضو بكتابة رأيه ومحادثاته ويعرض فى الحال كما فى الماسنجر, هذه الصفحة ستسهل إجتماع جميع الأعضاء لتقوية الروابط بينهم وكذلك لتبادل الخبرة أو الأفكار أو الإقتراحات بين الأعضاء.
هل تؤيد الفكرة أم لا؟ طبقا لأرائكم هنا سيتم البدء فى تطبيق الإقتراح أولا
مع أطيب التمنيات,
إدارة الأكاديمية.

[الأمير الحائر]

هو اقتراح جميل جدا من ناحية انه هيسهل النقاش بين الأعضاء فى مواضيع سريعة وماتناسبش أى أقسام...ده غير انه أول ماقريت الإقتراح لقيته هيحقق الصورة الخيالية اللى اتخيلها أحمد الصياد فى مسرحيته يعنى أعضاء الأكاديمية فى إجتماع مغلق... حاسس كده مش بعيد يكون أحمد اللى مقترح الإقتراح عشان نناقش أمور الوزارة
بس إقتراح هايل وأنا اخترت ( نعم ) لأنى مع الإقتراح جدا لأنه هيسهل حاجات كتيرة بين الأعضاء.
وشكرا للإدارة على اعتمادها على مناقشة الأراء دايما قبل إضافة جديد إلى الأكاديمية..إتجاه جميل جدا

[المهاجر]

والله يا وليد ما اعرف حاجة عن الاقتراح دا وهو اقتراح كويس واهو بالمرة نجهز للانقلاب فيه عايز تودينى فى داهية يا وليد وتقول انا صاحب الاقتراح

[محمد محمود]

فكرة الماسنجر الخاص بالأكاديمية فكرة جميلة للتواصل بين الأعضاء وبعضهم وبينهم وبين الإدارة
وأتوسم خيرا في الأعضاء الحاليين أن يكونوا على قدر المسؤولية ويحافظوا على إحترام هذا المنتدى
ولكن لابد أن يكون للأعضاء الحاليين الرقابة على هذه الفكرة وأن يتناوبوا الإشراف على الماسنجر
كل حسب ما تسمح به مواعيده بحيث يكون ال 24 ساعة تحت الرقابة وذلك ممكن من خلال الإتفاق بين
الإدارة والأعضاء الحاليين والتنسيق فيما بينهم لأن هؤلاء الأعضاء هم أءمن على الأكاديمية من غيرهم
وبالتوفبق إن شاء الله .

[قلب حزين]

هو أنا ما اخترتش ولا نعم ولا لا أنه موضوع يحير وعشان كده اكيد الادارة عرضته للأعضاء عشان يبقى اختيارنا كلنا
انا مع وليد انه هيسهل الإجتماع بين الأعضاء بس الاجتماع ده كده كده ممكن يتعمل فى مواضيع فى الاقسام النقاشية وبالذات قسم النقاش العام يعنى اى موضوع ممكن ينكتب فيه حتى لو مش مناسب لأى قسم, طبعا مش بقول كده عشان انا مشرفة القسم بس انا قصدى ان موضوع الماسنجر ده موجود فعلا بس فى شكل مواضيع ممكن تطلع كتابات اجمل للأعضاء وتفضل
دايما موجودة فى المواضيع بدل ماتضيع الكتابات فى صفحة الشات
وكمان انا مع محمد فى نقطة انه لو اتعمل الفكرة دى لازم يبقى فيه رقابة عشان مش يبقى زى شات او كده ويبقى خاص بس بأمور الأكاديمية
فأنا من حيرتى مش عارفة أختار نعم أو لا بس ادينى قولت رأيى, وفعلا زى وليد ماقال شكرا ان الاكاديمية بتعتمد على اراء الاعضاء, شكرا

[تنهيدة]

أنا كمان محتارة جدا لأنى حاسة اننا فى تواصل دائم من خلال كل كتاباتنا وارئنا الا بنقولة لبعض من خلال ردودنا لكن مش عارفة ان فكرة الماسنجر حتكون مفيدة ولا لا بس انا راى ان اكاديميتنا مميزه فى كل الأحوال بماسنجر او من غير ماسنجر وبشكر ادارة الأكاديمية فى سعيها الدائم فى التقدم

[المهاجر]

الحق يا وليد البنات عملوا الحزب بتاعهم ودلوقتى بيفعلوه بقى فيه معارضة يا معلم انا احتج وانا اعترض خاف على منصبك فى الوزارة يا حاج

[الأمير الحائر]

خليك جنتل مان يا أحمد وبعدين احنا فى أكاديمية ديموقراطية وهما ماقالوش نعم ولا قالو محتارين بس يبقى فين الحزب بس
وبعدين الإدارة خدت برأى كل الاعضاء بقى من غير أحزاب...هو بس مريم حزب لوحدها عشان هى دايما معترضة وعلى فكرة رأى وحيرة مريم وتنهيدة فيه بعض الصحة لو فكرنا فيه شوية لأن هما مش عايزينه يبقى شات ودى حاجة انا موافق عليها بس ماوضحتهاش فى إجابتى لأن كان فكرتى عن الماسنجر كمكان للإجتماعات زى ماقلت..يعنى مثلا نتفق كلنا على معاد معين أسبوعيا نتناقش فيه عن الاكاديمية والأعمال الأدبية اللى فيها انما ماجاش فى بالى خالص فكرة الشات دى طول الوقت لأن ده مش عاوزينه ابدا...ده انا من يوم مادخلت الاكاديمية وانا مابفتحش ايميلى اصلا ودايما وانا عالنت بكتب فى الاكاديمية عشان أحس بأنى بعمل حاجة مفيدة بكتب وبقرا لكل الاكاديمية
فأنا ردى نعم على فكرة الإجتماع إنما لو شات لأ ابدا ...وابعد عن حزب البنات يا أحمد وامشى جمب الحيط

[تنهيدة]

ياسلام على الدميقراطية ياوليد هو ده الكلام انا فعلا برفض جدا لو الموضع حيبقى شات زى كتير من المنتديات التانيه الا انا برفض الأشتراك فيهما بسبب الموضوع ده لكن أقتراحك بتاع نتجمع كل اسبوع هو ده اقتراح هايل وحاجة حتفيد الأكاديمية وبالنسبة اموضوع حزب البنات فخاف على نفسك يأحمد عشان انت حتكون مستهدف وخلى بالك احنا داخلين على عيد

[الأمير الحائر]

يبقى احنا كده متفقين ياتنهيدة إجتماع فى وقت معين تحدده الإدارة أو نحدده احنا سوا فى موضوع عام عشان مايبقاش شات...يبقى بس مكان للإجتماع بين الأعضاء على خلفية الأكاديمية والأعمال الأدبية اللى انكتبت أو نصيحة لبعض وهكذا..انما زى ماقلتى ياتنهيدة لو عالشات فده فى منتديات كتير جدا واكيد الاكاديمية لتميز فكرتها وهدفها مش عاوزة ده والا كانو عملته ادارة الاكاديمية من الأول من غير اقتراح ولانقاش...وأنا كده بأوصل رأيى بعد التوضيح ولسه اكيد لو باقى الأعضاء يأيدو فكرتنا يبقى اتفقنا كلنا